15th May2017

ຮອງລັດຖະມົນຕີ ກະຊວງ ປກສ ເນັ້ນການ ເພີ່ມທະວີ ວຽກງານ ກວດກາ ໃນກຳລັງ ປກສ ທຸກຂັ້ນ ໃຫ້ໜັກແໜ້ນ ເຂັ້ມແຂງ

by somchan

ພົຈວ ປອ ສົມ​ຫວັງ ທຳ​ມະ​ສິດ ປະ​ທານ ກວດກາ​ ພັກ​ກະຊວງ ຮອງ​ລັດຖະມົນຕີ ​ກະຊວງ ປກສ ​ໄດ້​ເນັ້ນ​ໜັກ ​ໃຫ້​ຄະນະ​ພັກ – ​ຄະນະ​ບັນຊາ ​ແລະ ຄະນະ​ກວດກາ ​ທຸກ​ຂັ້ນ ​ເພີ່ມ​ທະວີ ​ຄວາມ​ຮັບຜິດຊອບ ຊີ້​ນຳ-​ນຳພາ​ ວຽກ​ງານ​ກວດກາ ​ໃຫ້​ໜັກ​ແໜ້ນ ​ເຂັ້ນ​ແຂງ ​ໃນ​ໂອກາດ ​ທີ່​ທ່ານ​ເຂົ້າ​ຮ່ວມ ກອງ​ປະຊຸມ ​ຕີ​ລາຄາ​ການ ​ເຄື່ອນ​ໄຫວ ວຽກງານ​ ກວດກາ-ກວດກາ​ນ ຂອງ​ກະຊວງ ປກສ ປະຈຳ​ປີ 2016 ​ແລະ ທິດ​ທາງ​ ແຜນການ​ປີ 2017 ​ໃນ​ວັນ​ທີ 11 ພຶດສະພາ ນີ້.

ທ່ານ​ຮອງ​ລັດຖະມົນຕີ ​ໄດ້​ກ່າວ​ວ່າ ​ໃນ​ຊຸມ​ປີຜ່ານມາ ວຽກ​ງານ​ກວດກາ ​ແລະ ຕ້ານ​ການ​ສໍ້​ລາດ​ບັງ​ຫຼວງ​ຂອງ​ກຳລັງ​ປ້ອງ​ກັນ​ຄວາມ​ສະຫງົບ ມີ​ການ​ປັບປຸງ​ດີ​ຂື້ນ ​ເປັນ​ຕົ້ນ​ແມ່ນ​ພະນັກ​ງານ​ທີ່​ເຮັດ​ວຽກ​ງານ​ດັ່ງກ່າວ ​ໄດ້​ຕັ້ງໜ້າ​ເຄື່ອນ​ໄຫວ​ປະຕິບັດ​ໜ້າ​ທີ່​ຕາມ​ພາລະ​ບົດບາດ ​ແລະ ມີ​ຜົນສຳ​ເລັດ​ຫຼາຍ​ດ້າ​ນ ​ເປັນ​ຕົ້ນ​ແມ່ນ​ການ​ຊຸກຍູ້​ວຽກ​ງານ​ຕິດຕາມກວດກາ ​ໄປ​ພ້ອມ​ກັບ​ການ​ສຶກສາ​ອົບຮົມ​ການ​ເມືອງ​ແນວ​ຄິດ ​ເຮັດ​ໃຫ້​ສະມາຊິກ​ພັກ,​ພະນັກງານ​-ນັກຮົບຮັບ​ຮູ້​ເຂົ້າ​ໃຈ​ຕໍ່​ແນວທາງ​ນະ​ໂຍບາຍ​ຂອງ​ພັກ,ກົດໝາຍ​ຂອງ​ລັດ,ມີ​ຄວາມ​ຈົ່ງ​ຮັກ​ພັກດີ,ຊື່ສັດ​ບໍ​ລິ​ສຸດ​ຕໍ່​ພັກ ຕໍ່​ປະ​ເທດ​ຊາດ ​ແລະ ປະຊາຊົນ​ຊົ​ນ ພ້ອມ​ທັງ​ເປັນ​ເຈົ້າ​ການ​ຕອບ​ຕ້ານ​ກົນອຸບາຍ​ຫັນປ່ຽນ​ໂດຍ​ສັນຕິ​ຂອງ​ສັດຕູ, ສະກັດ​ກັ້ນ​ແກ້​ໄຂ​ປະກົດ​ການ​ຫຍໍ້​ທໍ້ ​ແລະ ສໍ້​ລາດ​ບັງ​ຫຼວງ​ໃນ​ຖັນ​ແຖວ​ກຳລັງ ປກສ ທີ່​ພົ້ນ​ເດັ່ນ​ແມ່ນ ທຸກ​ສະຫາຍ​ໄດ້​ສູ້​ຊົນ​ປະຕິບັດ​ໜ້າ​ທີ່​ວິຊາ​ສະ​ເພາະ ດ້ວຍ​ຄວາມ​ຮັບຜິດຊອບ​ສູງ, ​ເອົາ​ໃຈ​ໃສ່​ຕິດຕາມ, ກວດກາ​ການ​ປະຕິບັດ ​ແລະ ການລະ​ເມີດ​ແນວທາງ​ນະ​ໂຍບາຍ​ຂອງ​ພັກ, ກົດໝາຍ​ຂອງ​ລັດ, ຂໍ້​ກຳນົດ, ​ລະບຽບວິ​ໄນ​ຂອງກຳລັງ ປກສ ກວດກາ​ການ​ປັບປຸງ​​ກົນ​ຈັກການຈັດ​ຕັ້ງ, ດຳ​ເນີນ​ການ ​ແຈ້ງ​ຊັບ​ສິນ​ຂອງ​ນາຍ ​ແລະ ພົນ​ຕຳຫຼວດ​ທົ່ວ​ປະ​ເທດ ສຳ​ເລັດ​ໂດຍ​ພື້ນຖານ.ນອກ​ນີ້​ຍັງ​ໄດ້ຜັນ​ຂະຫຍາຍດຳລັດ​ຂອງ​ລັດຖະບານ ​ເປັນ​ແຜນການ​ລະອຽດ ຂອງ​ກະຊວງ ກ່ຽວ​ກັບ​ການ​ຕິດຕາມ​ກວດກາ​ບັນດາ​ໂຄງການ​ກໍ່ສ້າງ​ດ້ວຍ​ທຶນຂອງ​ລັດ.

​        ເຖິງ​ຢ່າງ​ໃດ​ກໍ່ຕາມ ຜ່ານ​ມາ​ເຖິງ​ວ່າ​ມີ​ການ​ເຄື່ອນ​ໄຫວ​ຢ່າງ​ຕັ້ງໜ້າ ​ແລະ ມີ​ຜົນງານ​ຫຼາຍ​ດ້ານ ​ແຕ່​ກໍ່​ເຫັນ​ວ່າ​ຍັງ​ມີ​ດ້ານ​ອ່ອນ ຂໍ້ຄົງຄ້າງ​ທີ່​ຕິດ​ພັນ​ໂດຍ​ກົງກັບຄວາມ​ຮັບຜິດຊອບ ຂອງ​ຄະນະ​ພັກ-​ຄະນະ​ບັນຊາ ​ແລະ ພະນັກງານ​ກວດກາ​ເປັນ​ຕົ້ນ​ແມ່ນ​ການ​ແກ້​ໄຂ​ບັນຫາ ຍັງ​ມີ​ຂໍ້​ຈຳກັດ​ຫຼາຍ​ດ້ານ. ​ແບບ​ແຜນ​ວິທີ​ນຳພາ​ຍັງ​ເກີດ​ມີ​ປະກົດ​ການ​ອາດຍາ​ສິດ​ຫ່າງ​ເຫີ​ນ ​ແລະ ລະ​ເມີດ​ສິດ​ເປັນ​ເຈົ້າ​ຂອງ​ປະຊາຊົນ, ບັນຫາ​ສຽງ​ວິພາກ​ວິຈານ ​ຈາກ​ສັງຄົມ​ກ່ຽວ​ກັບ​ການ​ດຳ​ເນີນຄະດີ​ບໍ່​ມີ​ຄວາມ ​ໂປ່​ງ​ໃສ, ການ​ຈັບ​ກຸ່ມ​ຄຸມ​ຂັງ​ບໍ່​ສອດຄ່ອງ​ກັບ​ກົດໝາຍ, ການ​ສວຍ​ໃຊ້​ໜ້າ​ທີ່​ຕຳ​ແໜ່​ງຫາ​ຜົນປະ​ໂຫຍ​ດ, ລະ​ເມີດ​ກົດໝາຍ ​ແລະ ການ​ສໍ້​ລາດ​ບັງ​ຫຼວງ ທີ່​ມີ​ລັກສະນະ​ແກ່ຍາວ​ຫຼາຍ​ປີ ທັງ​ມີ​ທ່າ​ອ່ຽງ​ແຜ່​ຫຼາຍ, ມີ​ບາງ​ກໍລະນີ ສະມາຊິກ​ພັກ​ຍັງ​ກ່ຽວຂ້ອງ​ໂດຍ​ກົງ ກັບ​ການ​ຄ້າຂາຍ​ເຖື່ອນ ​ເຊັ່ນ: ບັນ​ຫາ​ລົດ,​ໄມ້,ຢາ​ເສບ​ຕິດ, ຮັບ​ສິນ​ບົນ​ນຳ​ຍາດ​ຜູ້​ຖືກ​ຫາ ​ແລະ ນັກ​ໂທດ ​ແຕ່​ການ​ກວດກາ ຍັງ​ບໍ່​ທັນ​ທົ່ວ​ເຖິງ, ບາງ​ບັນຫາ​ຮູ້​ແຕ່​ຍັງ​ບໍ່​ມີ​ວິທີ​ແກ້​ໄຂ​ຢ່າງ​ຂາດ​ຕົວ, ຈາກ​ບັນຫາ​ດັ່ງກ່າວ ມັນ​ໄດ້ ​ເລັ່ງທວງ​ໃຫ້​ຄະນະ​ພັກ-​ຄະນະ​ບັນຊາ ​ແລະ ຄະນະ​ກວດກາ​ແຕ່ລະ​ຂັ້ນ ຕ້ອງ​ໄດ້​ສືບ​ຕໍ່​ເພີ່ມ​ທະວີ​ຄວາມ​ຮັບຜິດຊອບ​ຊີ້​ນຳ-​ນຳພາ ວຽກ​ງານ​ກວດກາ ​ໃຫ້​ໜັກ​ແໜ້ນ ​ແລະ ​ເຂັ້ມ​ແຂງ.

Off

Comments are closed.