26th May2017

ພົຈວ ສີສະຫວາດ ແກ້ວມາລາວົງ ຫົວໜ້າ ຫ້ອງວ່າການ ກະຊວງ ປກສ ເປັນປະທານ ກອງປະຊຸມ ເປີດກວ້າງ ເຈົ້າໜ້າທີ່ ອາວຸດໂສ ອາຊຽນ ວ່າດ້ວຍ ອາຊະຍາກຳ ຂ້າມຊາດ ຄັ້ງທີ 17

by somchan

​ໃນ​ວັນ​ທີ 25 ພຶດສະພາ 2017 ພົຈວ ສີສະ​ຫວາດ ​ແກ້ວ​ມາລາ​ວົງ ຫົວໜ້າ ​ຫ້ອງ​ວ່າການ​ ກະຊວງ ​ປກສ ທັງ​ເປັນ​ຫົວໜ້າ ​ເຈົ້າ​ໜ້າ​ທີ່​ອາວຸດ​ໂສ​ ອາ​ຊຽນ ວ່າ​ດ້ວຍ​ ອາ​ຊະ​ຍາ​ກຳ ​ຂ້າມ​ຊາດ ຄັ້ງ​ທີ 17 ​ໄດ້​ເປັນ​ປະທານ ກອງ​ປະຊຸມ ​ເປີດ​ກວ້າງ ​ເຈົ້າ​ໜ້​າທີ່ ​ອາວຸດ​ໂສ​ ອາ​ຊຽນ ວ່າ​ດ້ວຍ ອາ​ຊະ​ຍາ​ກຳ ຂ້າມ​ຊາດ ຄັ້ງ​ທີ 17 ມີ​ບັນດາ​ ຫົວໜ້າ, ຄະນະ​ເຈົ້າ​ໜ້າ​ທີ່​ ອາວຸດ​ໂສ ອາ​ຊຽນ, ກອງ​ເລຂາ​ອາ​ຊຽນ, ຜູ້ຕາງໜ້າ ​ອົງການ​ສະຫະ​ປະຊາ​ຊາດ ​ເພື່ອຄວບ​ຄຸມ ​ຢາ​ເສບ​ຕິດ ​ແລະ ຕ້ານ​ອາ​ຊະ​ຍາ​ກຳ​ (UNODC) ​ແລະ ອົງການ​ ອົດ​ສະ​ຕາ​ລີ​ ອາຊີ ກ່ຽວ​ກັບ ​ການ​ຕ້ານ ​ການ​ຄ້າ​ມະນຸດ ​ເຂົ້າ​ຮ່ວມ.

​ໃນ​ກອງ​ປະຊຸມ 2 ຄູ່​ຮ່ວມ​ມື​ຄື ອົງການ​ສະຫະ​ປະຊາ​ຊາດ ​ເພື່ອ​ຄວບ​ຄຸມ​ຢາ​ເສບ​ຕິດ ແລະ ຕ້ານ​ອາ​ຊະ​ຍາ​ກຳ​ (UNODC) ​ ​ແລະ ອົງການ​ອົດ​ສະ​ຕາ​ລີ​ອາຊີ ກ່ຽວ​ກັບ​ການ​ຕ້ານ​ການ​ຄ້າ​ມະນຸດ​ໄດ້ຜັດປ່ຽນ​ກັນ ລາຍ​ງານ​ຄວາມ​ຄືບ​ໜ້າ ການ​ຮ່ວມ​ມື​ກັບ​ບັນດາ​ປະ​ເທດ​ສະມາຊິກ​ອາ​ຊຽນ ກ່ຽວ​ກັບ​ການ​ຕ້ານ​ການ​ຄ້າ​ມະນຸດ ​ແລະ ກິດຈະກຳ​ອື່ນໆ ທີ່​ໄດ້​ຈັດ​ຕັ້ງປະຕິບັດ​ຮ່ວມ​ກັນ​ໃນ​ໄລຍະ​ຜ່ານ​ມາ ​ໂດຍ​ສະ​ເພາະ​ແມ່ນ​ການ​ເຜີຍ​ແຜ່, ການ​ສົ່ງ​ຄວາມ​ຮູ້, ການ​ສ້າງ​ນິຕິ​ກຳ, ການ​ຝຶກ​ອົບຮົມ, ການ​ສຳ​ມະ​ນາ ​ເຈົ້າ​ໜ້າ​ທີ່​ປະຕິບັດ​ກົດໝາຍ ພ້ອມ​ນັ້ນ​ອົງການ​ດັ່ງກ່າວ ຍັງ​ຍິນ​ດີ​ໃຫ້​ທຶນ​ສະໜັບສະໜູນ ປະ​ເທດ​ສະມາຊິກ​ອາ​ຊຽນ ​ໃນ​ການ​ຕ້ານການ​ຄ້າ​ມະນຸດ. ນອກ​ນັ້ນ ປະ​ເທດ ຟິລິປິ​ນ ຍັງ​ໄດ້​ແຈ້ງ​ການ​ກະກຽມ​ເປັນ​ເຈົ້າພາບ​ກອງ​ປະຊຸມ​ສະ​ໄໝ​ພິ​ເສດ ລັດຖະມົນຕີ​ອາ​ຊຽນ ວ່າ​ດ້ວຍ​ການ​ຕ້ານ​ການ​ກໍ່​ຄວາມບໍ່​ສະຫງົບ ​ແລະ ​ໃຊ້​ຄວາມ​ຮຸນ​ແຮງ​ຄັ້ງ​ທີ 2 ​ແລະ ການ​ກະກຽມ​ກອງ​ປະຊຸມ​ລັດຖະມົນຕີ​ອາ​ຊຽນ ວ່າ​ດ້ວຍ​ອາ​ຊະ​ຍາ​ກຳ​ຂ້າມ​ຊາດ ຄັ້ງ​ທີ 11 ຊຶ່ງ​ຈະ​ຈັດ​ຂື້ນ​ທີ່​ປະ​ເທດ ຟິລິປິ​ນ ​ໃນ​ທ້າຍ​ປີ 2017.

ກອງ​ປະຊຸມ​ຄັ້ງ​ນີ້ ມີ​ຄວາມ​ສຳຄັນ​ໃນ​ການ​ສົ່ງ​ເສີມ​ການ​ພົວພັນ ​ແລະ ​ແລກປ່ຽນ​ຄວາມ​ຄິດ​ເຫັນ ລະຫວ່າງ ສະມາຊິກ​ອາ​ຊຽນ ອົງການ​ສະຫະ​ປະຊາ​ຊາດ ​ເພື່ອ​ຄວບ​ຄຸມ​ຢາ​ເສບ​ຕິດ ​ແລະ ຕ້ານ​ອາ​ຊະ​ຍາ​ກຳ (UNODC) ​ແລະ ​ອົງການ​ອົດ​ສະ​ຕາ​ລີ​ອາຊີ ກ່ຽວ​ກັບ​ການ​ຕ້ານ​ການ​ຄ້າ​ມະນຸດ ພ້ອມ​ນັ້ນ​ຍັງ​ເປັນ​ການ​ຕີ​ລາຄາ​ສູງ​ຕໍ່​ບົດບາດ​ອັນ​ສຳຄັນ ​ເປັນ​ການ​ປະກອບສ່ວນ​ເຂົ້າ​ໃນ​ຂະ​ບວນການ​ສ້າງ​ປະຊາ​ຄົມ​ອາ​ຊຽນ ກອງ​ປະຊຸມ​ຍັງ​ໄດ້​ຊຸກຍູ້​ໃຫ້​ບັນດາ​ຫົວໜ້າ​ເຈົ້າ​ໜ້າ​ທີ່​ອາວຸດ​ໂສ​ອາ​ຊຽນ ສືບ​ຕໍ່​ເພີ່ມ​ທະວີ​ການ​ປະກອບສ່ວນ​ອັນ​ສຳຄັນ​ຂອງ​ຕົນ ​ໂດຍ​ການ​ຊຸກຍູ້​ການຈັດ​ຕັ້ງ​ວິ​ໃສ​ທັດ ປະຊາ​ຄົມ​ອາ​ຊຽນ ພ້ອມ​ທັງ​ເປັນ​ການສົ່ງ​ເສີມ​ໃຫ້ ປະຊາ​ຄົມ​ອາ​ຊຽນ ​ໃຫ້​ເຂັ້ມ​ແຂງ ​ແລະ ພັດທະນາ ຮັບປະກັນ​ຜົນ​ປະ​ໂຫຍ​ດຢ່າງ​ບໍ່​ຢຸດ​ຢັ້ງ​ຂອງ​ປະ​ຊາ​ຊົນ​ບັນດາ​ປະ​ເທດ​ອາ​ຊຽນ.

​ໂອກາດ​ດຽວ​ກັນ​ນີ້ ​ອົງການ​ສະຫະ​ປະຊາ​ຊາດ ​ເພື່ອ​ຄວບ​ຄຸມ​ຢາ​ເສບ​ຕິດ ​ແລະ ຕ້ານ​ອາ​ຊະ​ຍາ​(UNODC) ​ແລະ ອົງການ​ອົດ​ສະຕາ​ລີອາຊີ ກ່ຽວ​ກັບ​ການ​ຕ້ານ​ການ​ຄ້າ​ມະນຸດ ກໍ່​ໄດ້​ສະ​ແດງ​ຄວາມ​ຊົມ​ເຊີຍ ຕໍ່​ລັດຖະບານ​ລາວ ທີ່​ໄດ້​ໃຫ້​ສັດຕະຍາບັນ​ໃນ​ການ​ຕ້ານ​ການ​ຄ້າ​ມະນຸດ ​ໂດຍ​ສະ​ເພາະ​ແມ່ນ ​ແມ່ຍິງ ​ແລະ ​ເດັກ​ນ້ອຍ ພ້ອມ​ທັງ​ອວຍພອນ​ໃຫ້​ກອງ​ປະຊຸມ​ເຈົ້າ​ໜ້າ​ທີ່​ອາວຸດ​ໂສ​ອາ​ຊຽນ ວ່າ​ດ້ວຍ​ອາ​ຊະ​ຍາ​ກຳ​ຂ້າມ​ຊາດ ຄັ້ງ​ທີ 17 ​ແລ​ະ ກອງ​ປະຊຸມ​ອື່ນໆ​ທີ່​ກ່ຽວຂ້ອງ ທີ່​ຈັດ​ຂື້ນ​ໄດ້ຮັບ​ຜົນສຳ​ເລັດ​ຢ່າງ​ຈົບງາມ.

Off

Comments are closed.