21st Sep2017

ຮອງລັດຖະມົນຕີ ຕ້ອນຮັບແຂກ ສ ເກົາຫຼີ

by somchan

ໃນວັນທີ 20 ກັນຍາ 2017 ນີ້ ພົນຕີ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນ ຄວາມສະຫງົບໄດ້ຕ້ອນຮັບການເຂົ້າຢ້ຽມອຳລາ ຂອງທ່ານ ຢຸນກັງຮອນ ໃນໂອກາດສິ້ນສຸດວາລະ ດຳລົງຕຳແໜ່ງເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສປປລາວ. ໃນໂອກາດເຂົ້າຢ້ຽມອຳລາໃນຄັ້ງນີ້ ທ່ານ ຢຸນກັງຮອນ ໄດ້ລາຍງານການຮ່ວມມືຂອງລັດຖະບານ ສ ເກົາຫຼີ ກັບລັດຖະບານ ສປປລາວ ໃນໄລຍະຜ່ານມາ ເວົ້າລວມ ເວົ້າສະເພາະ ແມ່ນການຮ່ວມມືກັບກະຊວງປ້ອງກັນຄວາມສະຫງົບ ມີຫຼາຍດ້ານໄດ້ຮັບຜົນສຳເລັດ, ພ້ອມນີ້ ສ ເກົາຫຼີ ຍັງຈະສຶບຕໍ່ໃນການພົວພັນຮ່ວມມື ແລະ ຊ່ວຍເຫຼືອກຳລັງປ້ອງກັນຄວາມສະຫງົບລາວ ເປັນຕົ້ນແມ່ນໂຄງການກໍ່ສ້າງໂຮງໝໍ 5 ເມສາ, ການຝຶກອົບຮົມດ້ານວິຊາສະເພາະໃຫ້ກຳລັງປ້ອງກັນຄວາມສະຫງົບລາວ ແລະ ການຮ່ວມມືດ້ານຕ່າງໆ ທີ່ພົວພັນເຖິງຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສອງປະເທດ.

ໂອກາດດຽວກັນ ພົນຕີ ກົງທອງ ພົງພິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ສະແດງຄວາມຕ້ອນຮັບຢ່າງອົບອຸ່ນ ຕໍ່ການເຂົ້າຢ້ຽມອຳລາຄັ້ງນີ້, ພ້ອມທັງສະແດງຄວາມຂອບໃຈນຳ ສ ເກົາຫຼີ ທີ່ໃຫ້ການຮ່ວມມືກັບ ສປປລາວ ເວົ້າລວມ ເວົ້າສະເພາະ ແມ່ນກຳລັງປ້ອງກັນຄວາມສະຫງົບລາວ, ພ້ອມທັງສະແດງຄວາມຊົມເຊີຍຕໍ່ຜົນງານຕະຫຼອດໄລຍະທີ່ທ່ານ ຢຸນກັງຮອນ ດຳລົງຕຳແໜ່ງເປັນເອກອັກຄະລັດຖະທູດ ປະຈຳລາວ ແລະ ອວຍພອນໃຫ້ທ່ານພ້ອມຄອບຄົວກັບຄືນປະເທດດ້ວຍຄວາມສະຫວັດດີພາບ ແລະ ມີຄວາມສຳເລັດໃນໜ້າທີ່ວຽກງານໃນຕໍ່ໜ້າ.

 

Off

Comments are closed.