26th Sep2017

ກອງປະຊຸມລະຫວ່າງເຈົ້າແຂວງ ແລະ ຜູ້ວ່າຣາຊະການຈັງຫວັດຊາຍແດນລາວ-ໄທ

by somchan

ກອງປະຊຸມລະຫວ່າງເຈົ້າແຂວງ ແລະ ຜູ້ວ່າຣາຊະການຈັງຫວັດຊາຍແດນລາວ-ໄທ  ໄດ້ຈັດຂຶ້ນໃນວັນທີ 26 ກັນຍາ 2017 ນີ້ ທີ່ໂຮງແຮມລາວພຣາຊາ ນະຄອນຫຼວງວຽງຈັນ. ໂດຍການເປັນປະທານຮ່ວມຂອງທ່ານ ບຸນຖອງ ດີວິໄຊ ເຈົ້າແຂວງຈຳປາສັກ ແລະ ທ່ານສົມສັກ ຈັງຕະກູນ ຜູ້ວ່າລາດຊະການຈັງຫວັດອຸບົນ ຣາຊະທານີ ມີບັນດາເຈົ້າແຂວງ, ຜູ້ວ່າ ແລະ ຄະນະຜູ້ແທນທັງສອງຝ່າຍເຂົ້າຮ່ວມ.

ທ່ານ ບຸນຖອງ ດີວິໄຊ ເຈົ້າແຂວງຈຳປາສັກ ໄດ້ຕີລາຄາຄືນການຈັດຕັ້ງປະຕິບັດເນື້ອໃນຂອງກອງປະຊຸມຄັ້ງທີ 9 ຜ່ານມາ ເຫັນວ່າສະພາບການພົວພັນຮ່ວມມືລະຫວ່າງແຂວງ ແລະ ຈັງຫວັດຊາຍແດນ ໄດ້ຮັບການຈັດຕັ້ງປະຕິບັດເປັນຮູບປະທຳໃນຫຼາຍດ້ານ ເປັນຕົ້ນ ໄດ້ຮ່ວມມືຈັດກອງປະຊຸມຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລະດັບແຂວງ-ຈັງຫວັດ ເຮັດໃຫ້ສະພາບການຊາຍແດນ ລາວ-ໄທ ໂດຍພື້ນຖານແລ້ວແມ່ນມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ມີຄວາມສະຫງົບ, ການແລກປ່ຽນດ້ານເສດຖະກິດ-ການຄ້າ, ການແລກປ່ຽນທາງດ້ານສິລະປະວັດທະນະທຳ-ກິລາ, ການໄປມາຢ້ຽມຢາມຍາດພີ່ນ້ອງ ລະຫວ່າງປະຊາຊົນສອງປະເທດ, ເຫັນວ່າໄດ້ພັດທະນາສູ່ລວງເລີກ ແລະ ເພີ່ມຂຶ້ນຢ່າງຕໍ່ເນື່ອງ.

ພ້ອມນີ້, ຍັງໄດ້ຕີລາຄາບັຫາທີ່ຍັງຄົງຄ້າງ ເປັນຕົ້ນແມ່ນ ປະກົດການຫຍໍ້ທໍ້ທີ່ເກີດຂຶ້ນຕາມບໍລິເວນຊາຍແດນ ລາວ-ໄທ ເປັນຕົ້ນແມ່ນການລັກລອບເຂົ້າ-ອອກເມືອງຜິດກົດໝາຍ, ການຄ້າຂາຍຢາເສບຕິດ, ຄ້າຂາຍແຮງງານເຖືອນ, ການຄ້າມະນຸດ, ຄ້າປະເວນີ, ການລັກແຕ່ງງານ ແລະ ອື່ນໆ. ກອງປະຊຸມຄັ້ງນີ້ ໄດ້ພ້ອມກັນຊອກຫາວິທີທາງ ແລະ ມາດຕະການເພື່ອແກ້ໄຂບັນຫາດັ່ງກ່າວ ໂດຍໄດ ແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ດ້ວຍຄວາມຈິງໃຈ ແລະ ກົງໄປກົງມາ ທັງນີ້ ເພື່ອນຳເອົາຜົນປະໂຫຍດມາສູ່ປະຊາຊົນສອງປະເທດ ທີ່ດຳລົງຊີວິດຢູ່ບັນດາແຂວງ ຈັງຫວັດຕາມຊາຍແດນຂອງສອງປະເທດໃຫ້ດີຂຶ້ນກ່າວທຸກໆປີທີ່ຜ່ານມາ.

Off

Comments are closed.