6 ເດືອນຕົ້ນປີ 2018 ທົ່ວປະເທດສາມາດ ແກ້ໄຂຄະດີຢາເສບຕິດໄດ້ 1.379 ເລື່ອງ,

ໃນວັນທີ 5 ກໍລະກົດ 2018 ນີ້ ພັອ ຄຳແພງ ໄຊຍະລາດ ຫົວໜ້າຕຳຫຼວດສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໄດ້ໃຫ້ສຳພາດ ກ່ຽວກັບການເຄື່ອນໄຫວປະຕິບັດໜ້າທີ່ ວຽກງານສະກັດກັ້ນ ແລະ ຕ້ານຢາເສບຕິດ ໃນຂອບເຂດທົ່ວປະເທດ ຂອງກົມຕຳຫຼວດສະກັດກັ້ນ ແລະ ຕ້ານຢາເສບຕິດໃນໄລຍະ 6 ເດືອນຕົ້ນປີ 2018 ນີ້ວ່າ: ບັນຫາຢາເສບຕິດ ບໍ່ພຽງແຕ່ເປັນອັນຕະລາຍຕໍ່ສັງຄົມລາວ, ມັນໄດ້ກາຍເປັນບັນຫາລວມຂອງໂລກ, ເປັນໄພອັນຕະລາຍຮ້າຍແຮງຕໍ່ມວນມະນຸດ, ​ເປັນອຸປະສັກກົດໜ່ວງທ່ວງດຶງ ການສ້າງສາພັດທະນາເສດຖະກິດ-ສັງຄົມຂອງປະເທດຊາດ, ທັງຍັງນຳເອົາຄວາມຫາຍະນະມາສູ່ຊິວິດ ແລະ ຄອບຄົວ ຜູ້ທີ່ຕົກເປັນທາດຂອງມັນ, ຍ້ອນແນວນັ້ນ ໃນໄລຍະຊຸມປີຜ່ານມາ ພັກ ແລະ ລັດຖະບານ ຈຶ່ງໄດ້ຖືກເອົາການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດ ເປັນໜ້າທີ່ສຳຄັນ ແລະ ໄດ້ຊີ້ນຳ-ນຳພາການຈັດຕັ້ງປະຕິບັດວຽກງານດັ່ງກ່າວນີ້ ແລະ ເຈົ້າໜ້າທີ່ກໍ່ໄດ້ມ້າງກຸ່ມແກ້ງຄ້າຂາຍຢາເສບຕິດ ທັງລາຍນ້ອຍ ແລະ ລາຍໃຫຍ່ໄດ້ຫຼາຍລາຍ, ຍຶດຊັບສິນໄດ້ຈຳນວນຫຼວງຫຼາຍ, ​ແຕ່ກຸ່ມເປົ້າໝາຍຄ້າຂາຍຢາເສບຕິດ ທັງພາຍໃນ ແລະ ຕ່າງປະເທດຍັງບໍ່ລົດລະ ໃນການເຄື່ອນໄຫວຄ້າຂາຍຢາເສບຕິດ ພວກເຂົາໄດ້ອາໄສພູມມີປະເທດ ທີ່ມີພູຜາປ່າດົງ ແລະ ແມ່ນ້ຳລຳເຊ,​ເຄື່ອນໄຫວລັກລອບນຳເຂົ້າຢາເສບຕິດປະເທດຕ່າງໆເຊັ່ນ: ຢາບ້າ, ​ເຮໂລອິນ, ຢາໄອສ ແລະ ສານເຄມີ ການນຳເຂົ້າຕົ້ນຕໍແມ່ນມາຈາກເຂດສາມຫຼ່ຽມຄຳ ໂດຍແມ່ນບັນດາແຂວງພາກເໜືອເປັນບ່ອນພັກຢາເສບຕິດ, ແລ້ວລຳລ່ຽງນຳສົ່ງມາບັນດາແຂວງພາກກາງ ແລະ ພາກໃຕ້ເພື່ອນຳສົ່ງໄປປະເທດທີສາມ.

ສະເພາະ 6 ເດືອນຕົ້ນປີ 2018 ທົ່ວປະເທດສາມາດແກ້ໄຂຄະດີຢາເສບຕິດໄດ້ 1.379 ເລື່ອງ, ຜູ້ຖືກຫາ 1.944 ຄົນ ຍິງ 240 ຄົນ, ​ຄົນຕ່າງປະເທດ 32 ຄົນ, ຍິງ 5 ຄົນ, ຍືດຢາເສບຕິດປະເພດຕ່າງໆຄື: ເຮໂລອິນ 71,13 ກິໂລກຣາມ,​ ຢາບ້າ ນ້ຳໜັກ 262 ກິໂລກຣາມ, ຝິ່ນ 53 ກິໂລກຣາມ, ແກ່ນຝິ່ນ 3 ກິໂລກຣາມ, ກັນຊາ 5 ກິໂລກຣາມ, ຢາໄອສ 102 ກິໂລກຣາມ, ​ແປ້ງ ແລະ ສານເຄມີ ອື່ນໆ ຈຳນວນໜຶ່ງ, ຍຶດລົດໃຫຍ່ໄດ້ 35 ຄັນ, ລົດຈັກ 221 ຄັນ, ວັດຖຸເງິນ, ຄຳ ແລະ ແລະ ອາຢັດເຮືອນ ດິນໄດ້ຈຳນວນຫຼວງຫຼາຍ.

ພັອ ຄຳແພງ ໄຊຍະລາດ ຫົວໜ້າກົມຕຳຫຼວດສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໃຫ້ຮູ້ຕື່ມອີກວ່າ: ຢາເສບຕິດຍັງແມ່ນສາເຫດຕົ້ນຕໍທີ່ພາໃຫ້ເກີດມີປະກົດການຫຍໍ້ທໍ້ໃນສັງຄົມ ບໍ່ມີຄວາມສະຫງົບ, ບໍ່ມີຄວາມເປັນລະບຽບຮ້ອຍຮຽບ ເປັນຕົ້ນ ການປຸ້ນຈີ,​ ຊິງຊັບ ລັກຊັບ, ຄາດຕະກຳ, ອາລະວາດຕີກັນ, ການເປັນນັກເລງອັນຕະພານຂອງກຸ່ມໄວໜຸ່ມ ນອກນີ້, ໄວໜຸ່ມ ມີການມົ້ວສຸມຢາເສບຕິດຢູ່ຕາມຮ້ານບັນເທິງ, ຮ້ານອາຫານ, ຮ້ານເກມ, ເຮືອນພັກ, ໂຮງແຮມ, ຫ້ອງແຖວ ໃຫ້ເຊົ່າ ແລະ ອື່ນໆ. ຜ່ານມາ ພັກ ແລະ ລັດຖະບານຍາມໃດ ກໍ່ຖືເອົາການສຶກສາອົບຮົມເປັນບັນຫາສຳຄັນ ໂດຍໄດ້ໂຄສະນາເຜີຍແຜ່ແນວທາງນະໂຍບາຍຂອງພັກ, ກົດໝາຍຂອງລັດ, ບັນດາຂໍ້ກຳນົດ, ​ກົດລະບຽບ, ມະຕິຄຳສັ່ງ, ກົດໝາຍວ່າດ້ວຍຢາເສບຕິດ ມາດຕາ 146 ແລະ ຜົນຮ້າຍອັນຕະລາຍຂອງຢາເສບຕິດຢ່າງກວ້າງຂວາງ, ທາງວິທະຍຸ, ​ໜັງສືພິມ, ໂທລະພາບ ເພື່ອສ້າງຈິດສຳນຶກທີ່ຖືກຕ້ອງ ແລະຊ່ວຍກັນສະກັດກັ້ນ ການແຜ່ລະບາດຂອງຢາເສບຕິດ ແລະ ພ້ອມກັນຫ່າງໄກຈາກຢາເສບຕິດ. ສຳລັບໃນຕໍ່ໜ້ານີ້ ກົມຕຳຫຼວດສະກັດກັ້ນ ແລະ ຕ້ານຢາເສບຕິດ ຈະສືບຕໍ່ເຮັດວຽກງານສຶກສາອົບຮົມການເມືອງແນວຄິດໃຫ້ພະນັກງານທີ່ປະຕິບັດວຽກງານວິຊາສະເພາະ ໃຫ້ມີຄຸນທາດການເມືອງໜັກແໜ້ນ ກຳໄດ້ສະພາບກົນອຸບາຍເລ່ຫຼ່ຽມການເຄື່ອນໄຫວຂອງພວກເປົ້າໝາຍຄ້າຂາຍຢາເສບຕິດໃຫ້ເປັນລະບົບ, ປັບປຸງຍົກລະດັບຄຸນນະພາບວຽກງານສືບສວນ-ສອບສວນ ດຳເນີນຄະດີໃຫ້ຈະແຈ້ງ,​ ຊັດເຈນ, ຮັດກຸມ, ວ່ອງໄວ, ໂປ່ງໃສການດຳເນີນຄະດີ, ເຮັດວຽກງານໂຄສະນາສຶກສາອົບຮົມ ໃຫ້ປະຊາຊົນ ແລະ ກຸ່ມເປົ້າໝາຍ ທີ່ມີຄວາມສ່ຽງຕໍ່ກັບບັນຫາຢາເສບຕິດ, ເພີ່ມທະວີການຮ່ວມມືກັບປະເທດເພື່ອນບ້ານ, ອົງການຈັດຕັ້ງສາກົນຕ່າງໆ, ເພື່ອແລກປ່ຽນຂໍ້ມູນຂ່າວສານ, ເປົ້າໝາຍຄ້າຂາຍຢາເສບຕິດຂ້າມຊາດ, ເຂົ້າຮ່ວມໂຄງການຮັກສາຄວາມປອດໄພຕາມລຳແມ່ນ້ຳຂອງ 6 ປະເທດຄື: ລາວ, ຈີນ, ມຽນມາ,​ ໄທ,​ ກຳປູເຈຍ ແລະ ຫວຽດນາມ, ເພື່ອສືບຕໍ່ຈັດຕັ້ງປະຕິບັດໂຄງການສະກັດກັ້ນ ແລະ ຕ້ານຢາເສບຕິດແຕ່ປີ 2016-2020.