13th Jul2018

ກັກຕົວຜູ້ຖືກຫາ 2 ຄົນພ້ອມຂອງກາງ ຢາບ້າເກືອບ 6 ແສນເມັດ

by somchan

ໃນວັນທີ 18 ມິຖຸນາ 2018 ນີ້ ທະຫານຊາຍແດນ ກອງຮ້ອຍ 123 ກອງບັນຊາການທະຫານ ແຂວງບໍ່ແກ້ວ ໄດ້ກັກຕົວຜູ້ຖືກຫາລັກລອບຄ້າຂາຍ ຢາເສບຕິດປະເພດຢາບ້າ 2 ຄົນ ພ້ອມຂອງກາງ ຢາເສບຕິດເກືອບ 600,000 ເມັດ, ຜູ້ຕ້ອງຫາທັງສອງຄື: ​ທ້າວແຊງໂຟ ແຊ່ຜ່ານ ອາຍຸ 62 ປີ ແລະ ທ້າວຈຽວຈິງ ແຊ່ຟຸ່ງ ອາຍຸ 45 ປີ ບ້ານຫວຍແມງ ເມືອງປາກທາ ແຂວງບໍ່ແກ້ວ.

ເຈົ້າໜ້າທີ່ ປກສ ແຂວງບໍ່ແກ້ວໃຫ້ຮູ້ວ່າ: ພາຍຫຼັງທີ່ໄດ້ຮັບລາຍງານວ່າມີການຊຸກເຊືອງຢາບ້າໄວ້ແຄມນ້ຳຂອງ ເຂດປ່າຊ້າບ້າ ບ້ານຫ້ວຍທຸຍ ເມືອງຫ້ວຍຊາຍ ທະຫານຊາຍແດນກອງຮ້ອຍ 123 ໄດ້ສົມທົບກັບອຳນາດການປົກຄອງບ້ານ ເຂົ້າກວດສອບສະຖານທີ່ສົງໄສຊຸກເຊືອງຢາບ້າ, ພໍໄປຮອດສະຖານທີ່ສົງໄສໄດ້ພົບເຫັນຊາຍ 2 ຄົນ ທ່າທາງມີພິລຸດ ຈຶ່ງກັກຕົວຊາຍ 2 ຄົນໄວ້ ພ້ອມກວດຄົ້ນສະຖານທີ່ໃກ້ຄ່ຽງ ພົບເຫັນຖົງເປ້ບາໂລ 3 ຖົງຊຸກເຊືອງໄວ້ເຂດດັ່ງກ່າວ; ເຊິ່ງພາຍໃນເປ້ບາໂລມີຢາບ້າຈຳນວນ 297 ມັດເທົ່າກັບ 594.000 ເມັດ. ດັ່ງນັ້ນ ທະຫານຊາຍແດນກອງຮ້ອຍ 123 ຈຶ່ງໄດ້ສົ່ງຕົວຊາຍສອງຄົນ ພ້ອມທັງຂອງກາງໃຫ້ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງ ບໍ່ແກ້ວ ສືບຕໍ່ດຳເນີນການສືບສວນ-ສອບສວນ.

ຜ່ານການສືບສວນ-ສອບສວນຂອງເຈົ້າໜ້າທີ່ ພວກກ່ຽວຮັບສາລະພາບວ່າ: ຢາເສບຕິດນຳນວນດັ່ງກ່າວແມ່ນຮັບຈ້າງຂົນສົ່ງໃຫ້ຄົນປະເທດເພື່ອນບ້ານ ແລະ ຈະນຳສົ່ງໃຊ້ຜູ້ຮ່ວມຂະບວນການຢູ່ປະເທດທີ່ສາມແຕ່ຖືກເຈົ້າໜ້າທີ່ກັກຕົວໄດ້ກ່ອນ.

ປັດຈຸບັນ, ເຈົ້າໜ້າທີ່ ປກສ ແຂວງບໍ່ແກ້ວ ພວມສືບສວນ-ສອບສວນ ຂະຫຍາຍຜົນຫາກຸ່ມແກ້ງຄ້າຂາຍຢາເສບຕິດກຸ່ມນີ້ມາດຳເນີນຄະດີຕາມລະບຽບກົດໝາຍ.

Off

Comments are closed.