26th Jul2018

6 ເດືອນຕົ້ນປີ 2018 ເມືອງສີສັດຕະນາກ ມີຄະດີເກີດຂຶ້ນທັງໝົດ 143 ເລື່ອງ.

by somchan

ພັທ ທອງສະຫວັດ ສານສຸວາດ ຫົວໜ້າ ກອງບັນຊາການ ປກສ ເມືອງສີສັດຕະນາກ ໄດ້ໃຫ້ສຳພາດກ່ຽວກັບການຮັກສາຄວາມສະຫງົບ ຄວາມເປັນລະບຽບຮຽບຮ້ອຍ ພາຍໃນເມືອງ ສີສັດຕະນາກ ໃນໄລຍະ 6 ເດືອນຕົ້ນປີ 2018 ທ່ານໃຫ້ຮູ້ວ່າ: ເມືອງສີສັດຕະນາກ ເປັນເມືອງໜຶ່ງທີ່ເປັນສູນກາງທາງດ້ານການເມືອງ, ເສດຖະກິດ,​ວັດທະນະທຳ-ສັງຄົມ, ມີປະຊາກອນອາໄສຢູ່ຢ່າງໜາແໜ້ນ ທັງເປັນສູນກາງທາງດ້ານການບໍລິຫານ ແລະ ການລົງທຶນຕ່າງໆ. ດັ່ງນັ້ນ, ຈິ່ງໄດ້ເກີດມີປະກົດການຫຍໍ້ທໍ້ຫລາຍພໍສົມຄວນ ເປັນຕົ້ນແມ່ນບັນຫາການປຸ້ນຈີ້ຊິງຊັບ, ລັກຊັບພົນລະເມືອງ, ບັນຫາຢາເສບຕິດ, ກຸ້ມແກ້ງກວນເມືອງ ແລະ ອື່ນໆ ໃຫ້ສັງຄົມເກີດມີຄວາມບໍ່ສະຫງົບ ສົ່ງຜົນກະທົບຕໍ່ການດຳລົງຊີວິດ, ຊັບສິນ ແລະ ຊີວິດອິນຊີຂອງປະຊາຊົນ. ໃນໄລຍະ 6 ເດືອນຜ່ານມາ ກອງບັນຊາການເມືອງສີສັດຕະນາກໄດ້ສຸມໃສ່ໃນການແກ້ໄຂປະກົດການຫຍໍ້ທໍ້ ໂດຍສະເພາະແມ່ນໄດ້ຂຶ້ນບັນຊີຕິດຕາມການເຄື່ອນໄຫວຂອງກຸ່ມຄົນບໍ່ດີ ກຸ່ມເປົ້າໝາຍທີ່ເຄື່ອນໄຫວຂີ້ລັກງັດແງະ, ຄ້າຂາຍຢາເສບຕິດ ກຸ້ມແກ້ງຂີ້ລົດກວນເມືອງ. ພ້ອມທັງປະສານສົມທົບກັບກຳລັງກໍ່ສ້າງຮາກຖານການເມືອງ ທີ່ປະຈຳຢູ່ບັນດາກຸ່ມບ້ານ ອອກກວດກາລາດຕະເວນ ຮັກສາຄວາມສະຫງົບ ເອົາໃຈໃສ່ຕິດຕາມກວດກາ ຄົນພັກເຊົ່າຢ່າງເປັນລະບົບ ໃນໄລຍະ 6 ເດືອນຕົ້ນປີ ເມືອງສີສັດຕະນາກ ມີຄະດີເກີດຂຶ້ນທັງໝົດ 143 ເລື່ອງ, ແກ້ໄຂໄດ້ 35 ເລື່ອງ, ກັກຕົວຜູ້ກະທຳຜິດໄດ້ 73 ຄົນ. ໃນນີ້ ເກີດຂຶ້ນຫຼາຍກວ່າໝູ່່ ແມ່ນບັນຫາລັກຊັບພົນລະເມືອງ ໂດຍສະເພາະແມ່ນລັກລົດຈັກ, 6ເດືອນຕົ້ນປີຜ່ານມາ ສາມາດເກັບກູ້ລົດຈັກຄືນມາໄດ້ 13 ຄັນ. ພ້ອມດຽວກັນນີ້, ບັນຫາຢາເສບຕິດສາມາດແກ້ໄຂໄດ້ 69 ລາຍ, ຈັບຕົວຜູ້ກະທຳຜິດໄດ້ 61 ຄົນ, ຍິງ 9 ຄົນ, ສາມາດຍືດຂອງການຢາບ້າໄດ້ 22.035 ເມັດຢາໄອ 310 ກຣາມ.

Off

Comments are closed.