26th Jul2018

6 ບ້ານຂອງເມືອງສະໜາມໄຊ ແຂວງອັດຕະປື ຖືກນໍ້າຖ້ວມຢ່າງໜັກ

by somchan

ຕາມການລາຍງານຂອງອຳນາດການປົກຄອງເມືອງ ສະໜາມໄຊ ໃຫ້ຮູ້ວ່າ: ໃນວັນທີ 23 ກໍລະກົດ 2018ນີ້ ເກີດເຫດການນໍ້າຖ້ວມຢ່າງແຮງເຊິ່ງເປັນ ຜົນກະທົບສືບເນື່ອງມາຈາກອິດທິພົນຂອງ ພາຍຸ ເຮັດໃຫ້ມີຝົນຕົກຕໍ່ເນື່ອງກັນຫຼາຍວັນ ໃນພື້ນທີ່ເຂດ ເມືອງສະໜາມໄຊ ໂດຍສະເພາະແມ່ນພື້ນທີ່ອ່າງເກັບນໍ້າ ເຂື່ອນເຊປຽນ, ເຊນໍ້ານ້ອຍ ມີປະລິມານນໍ້າເກີນຂະໜາດຄວາມຈຸຂອງອ່າງບໍ່ສາມາດຮັບໄດ້ ເຮັດໃຫ້ຄູກັນນໍ້າເຂື່ອນດັ່ງກ່າວເຈື່ອນ, ນໍ້າຈຳນວນຫຼາຍໄດ້ໄຫຼລົງໃສ່ 6 ບ້ານລຽບຕາມແມ່ນໍ້າເຊປຽນ ເຊິ່ງໄດ້ສົ່ງຜົນເສຍຫາຍໃຫ້ແກ່ໄຮ່ນາ,ຮົ້ວສວນ,ສັດລ້ຽງ ລວມໄປເຖິງຊີວິດ ແລະ ຊັບສິນຂອງປະຊາຊົນ ເຊິ່ງຍັງບໍ່ທັນສາມາດສະຫຼຸບໄດ້.

ບ້ານທີ່ໄດ້ຮັບຜົນກະທົບຈາກໄພນໍ້າຖ້ວມໃນຄັ້ງນີ້ມີ: ບ້ານໄໝ່, ບ້ານຫີນລາດ, ບ້ານທ່າຫີນໃຕ້, ບ້ານທ່າແສງຈັນ, ບ້ານສະໜອງ, ບ້ານແທ ຄຸ້ມໂຄກກ່ອງ. ຕໍ່ກັບເຫດການດັ່ງກ່າວ ອຳນາດການປົກຄອງເມືອງ, ແຂວງ, ອົງການຈັດຕັ້ງທຸກພາກສ່ວນ ກໍໄດ້ເຂົ້າໄປຊ່ວຍເຫຼືອທາງດ້ານພາຫະນະຂົນສົ່ງ ເປັນຕົ້ນແມ່ນລົດຂົນສົ່ງ, ເຮືອ ພ້ອມທັງໄດ້ຊ່ວຍເຫຼືອທາງດ້ານເຄື່ອງອຸປະໂພກ-ບໍລິໂພກ ອັນຈຳເປັນຢ່າງເຕັມກຳລັງຢ່າງສຸດຄວາມສາມາດ.ປັດຈຸບັນຄະນະນຳຂອງແຂວງ, ຄະນະນຳຈາກບັນດາພະແນກການອ້ອມຂ້າງແຂວງ, ພະນັກງານ,ທະຫານ,ຕຳຫຼວດ ໄດ້ພ້ອມພາກັນກະກຽມເຄື່ອງບໍລິໂພກ ທີ່ຈະນຳໄປຊ່ວຍເຫຼືອປະຊາຊົນ ທີ່ຖືກຜົນກະທົບຈາກໄພນໍ້າຖ້ວມຢ່າງຮຸນແຮງໃນຫຼາຍບ້ານ ຂອງເມືອງສະໜາມໄຊ ແຂວງອັດຕະປື. ເຄື່ອງບໍລິໂພກທີ່ນຳໄປຊ່ວຍເຫຼືອຄັ້ງນີ້ ປະກອບມີເຂົ້າສານຈຳນວນ 5 ໂຕນ, ນໍ້າດື່ມ,ໝີ່,ປາກະປ໋ອງເປັນຕົ້ນ, ລວມມູນຄ່າປະມານ 30 ກວ່າລ້ານກີບ ເຊິ່ງໄດ້ມາຈາກງົບປະມານຂອງແຂວງ ສົມທົບກັບພະແນກການອ້ອມຂ້າງ ແລະ ພາກສ່ວນບຸກຄົນ ທີ່ໃຫ້ການຊ່ວຍເຫຼືອ.

 

 

Off

Comments are closed.