10th Dec2018

ບໍລິສັດລັດວິສາຫະກິດ ລາວໂທລະຄົມ ມະນາຄົມ ເຊັນສັນຍາໂຄງລ່າງ ແລະ ການບໍລິການ ດ້ານໂທລະຄົມມະນາຄົມ ກັບກຸ່ມບໍລິສັດ ພັດທະນາເຂດ ເສດຖະກິດສະເພາະ ບໍ່ເຕ່ນລາວຈຳກັດ

by somchan

ໃນວັນທີ 6 ທັນວາ 2018 ຢູ່ທີ່ສຳນັກງານໃຫ່ຍ ບໍລິສັດລັດວິສາຫະກິດ ລາວໂທລະຄົມມະນາຄົມ ໄດ້ມີພິທີລົງນາມເຊັນສັນຍາຮ່ວມມື ການໃຫ້ບໍລິການ ດ້ານໂທລະຄົມມະນາຄົມ ໃນເຂດເສດຖະກິດສະເພາະ ບໍ່ເຕ່ນ ແດງງາມ ຂອງຫຼວງນ້ຳທາ ສປປ ລາວ ລະຫວ່າງ ບໍລິສັດລັດວິສາຫະກິດ ລາວໂທລະຄົມມະນາຄົມ  ແລະ ກຸ່ມ ບໍລິສັດພັດທະນາ ເຂດເສດຖະກິດສະເພາະ ບໍ່ເຕ່ນລາວ ຈຳກັດ ຂື້ນ ໂດຍການເຂົ້າຮ່ວມ ເປັນປະທານຂອງ ທ່ານ ທອງໃສ ຊານໄຊຍະ ຮອງລັດຖະມົນຕີ ກະຊວງໄປສະນີ-ໂທລະຄົມມະນາຄົມ ແລະ ການສື່ສານ , ທ່ານ ພົນຕີ ກົງທອງ ພົງວິຈິດ ຮອງລັດຖະມົນຕີ ກະຊວງ ປກສ, ຫົວໜ້າກົມ, ຮອງກົມ, ຫົວໜ້າຫ້ອງການ ກະຊວງ ປທສ, ຫົວໜ້າພະແນກ ປທສ ແຂວງ, ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ຫົວໜ້າຄະນະກຳມະການຮ່ວມມືລາວ-ຈີນ, ແຂກຮັບເຊີນພ້ອມດ້ວຍຄະນະຜູ້ບໍລິຫານທັງສອງບໍລິສັດ ເຂົ້າຮ່ວມ.

 

 

ການລົງນາມເຊັນສັນຍາໃນຄັ້ງນີ້ ແມ່ນທ່ານ ຈິດປະສົງ ໜູແກ້ວໄກສອນ ຮອງຜູ້ອຳນວຍການໃຫ່ຍ ບໍລິສັດລັດວິສາຫະກິດລາວ ໂທລະຄົມມະນາຄົມ ແລະ ທ່ານ ນາງ ຢາງຢ້າຫົງ ຮອງຜູ້ອຳນວຍການປະຈຳການ ກຸ່ມບໍລິສັດພັດທະນາເຂດເສດຖະກິດສະເພາະ ບໍ່ເຕ່ນລາວຈຳກັດ.

ການລົງນາມເຊັນສັນຍາໃນຄັ້ງນີ້ແມ່ນ ກຸ່ມບໍລິສັດພັດທະນາເຂດເສດຖະກິດສະເພາະ ບໍ່ເຕ່ນລາວຈຳກັດ ໄດ້ໃຫ້ ບໍລິສັດລັດວິສາຫະກິດລາວ ໂທລະຄົມມະນາຄົມ ເປັນຜູ້ດຳເນີນການພັດທະນາ ແລະ ສະໜອງການບໍລິການທາງດ້ານການສື່ສານໂທລະຄົມມະນາຄົມ ແບບຄົບວົງຈອນ ໃນເຂດເສກຖະກິດສະເພາະ ບໍ່ເຕ່ນແດນງາມ ບ້ານບໍ່ເຕ່ນ, ເມືອງຫຼວງນ້ຳທາ ແຂວງຫຼວງນ້ຳທາ ພາຍໃນກຳນົດເວລາ 5 ປີ, ເພື່ອເອື້ອອຳນວຍຄວາມສະດວກທາງດ້ານພື້ນຖານ ໂຄງລ່າງການສື່ສານໂທລະຄົມມະນາຄົມ ທີ່ສະດວກສະບາຍ, ທັນສະໄໝ ແລະ ໄດ້ມາດຕະຖານ ໃຫ້ແກ່ການຈັດຕັ້ງປະຕິບັດແຜນງານການພັດທະນາຂອງ ກຸ່ມບໍລິສັດພັດທະນາເຂດເສດຖະກິດສະເພາະ ບໍ່ເຕ່ນລາວຈຳກັດ ໃຫ້ບັນລຸຕາມຈຸດປະສົງທີ່ວາງໄວ້ໃນການຮ່ວມມືພັດທະນາ ໝຶ່ງແລວທາງໜຶ່ງເສດຖະກິດ ລະຫວ່າງສອງພັກ-ລັດ ລາວ ແລະ ຈີນ ທີ່ໄດ້ລົງນາມຫັນໄວ້ ແລະ ຖືເປັນວຽກງານທີ່ສຳຄັນ ເພື່ອຊ່ວຍພັດທະນາເສດຖະກິດຂອງປະເທດ ເພື່ອປະກອບສ່ວນສ້າງໃຫ້ເສດຖະກະກິດ-ສັງຄົມແຫ່ງຊາດຂະຫຍາຍຕົວໄວຍິ່ງຂື້ນ.

 

Off

Comments are closed.