17th Jan2019

ກະຊວງ ປກສ ສຳເລັດກອງປະຊຸມສະຫຼຸບວຽກງານປະຈຳປີ 2018 ແລະ ວາງທິດທາງແຜນການຈຸດສຸມ 2019

by somchan

ກອງປະຊຸມສະຫຼຸບວຽກງານປ້ອງກັນຄວາມສະຫງົບ ທົ່ວປະເທດປະຈຳປີ 2018 ແລະ ວາງທິດທາງແຜນການປີ 2019 ໄດ້ສຳເລັດໃນວັນທີ 16 ມັງກອນ ນີ້ ຢູ່ທີ່ຫ້ອງປະຊຸມກະຊວງ ປກສ ພາຍຫຼັງທີ່ດຳເນີນມາເປັນເວລາ 2 ວັນ ພາຍໃຕ້ການເປັນປະທານຂອງ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ, ມີຄະນະພັກກະຊວງດ ຄະນະພັກກົມໃຫ່ຍ, ກົມກອງອ້ອມຂ້າງກະຊວງ ແລະ ບັນດາຄະນະບັນຊາ ປກສ ແຂວງ ຂອບເຂດທົ່ວປະເທດເຂົ້າຮ່ວມ.

ກອງປະຊຸມໄດ້ສະຫຼຸບຕີລາຄາຄືືນການຈັດຕັ້ງປະຕິບັດ ວຽກງານປ້ອງກັນຄວາມສະຫງົບ ໃນຂອບເຂດທົ່ວປະເທດ ໃນໄລຍະ 1 ປີຜ່ານມາ ໃນນີ້ກຳລັງປ້ອງກັນຄວາມສະຫງົບທຸກເລົ່າຮົບວິຊາສະເພາະ ນັບແຕ່ສູນກາງລົງຮອດທ້ອງຖິ່ນ ໄດ້ສຸມໃສ່ປະຕິບັດໜ້າທີ່ຢ່າງຕັ້ງໜ້າ ສາມາດຍາດໄດ້ຜົນງານຫຼາຍດ້ານ ເຮັດໃຫ້ປະເທດຊາດມີຄວາມໜັ້ນຄົງ, ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ປະຊາຊົນດຳລົງຊີວິດດ້ວຍຄວາມປອດໄພ.

ພົທ ວິໄລ ຫຼ້າຄຳຟອງ ປະທານກອງປະຊຸມ ໄດ້ມີຄຳເຫັນ ແລະ ກ່າວໄຂກອງປະຊຸມຢ່າງເປັນທາງການ ເຊິ່ງເນື້ອໃນສຳຄັນບາງຕອນ ທ່ານໄດ້ກ່າວວ່າ ກອງປະຊຸມສະຫຼຸບຕີລາຄາວຽກງານປ້ອງກັນຄວາມສະຫງົບ ການຮັກສາຄວາມເປັນລະບຽບຮຽບຮ້ອຍທາງສັງຄົມທົ່ວປະເທດ ຄັ້ງນີ້ແມ່ນສຸມໃສ່ຄົ້ນຄວ້າພິຈາລະນາ ແລະ ທົບທວນຄືນການຈັດຕັ້ງປະຕິບັດ 4 ຄາດໝາຍ 4 ແຜນງານໃຫ່ຍ ແລະ 41 ໂຄງການ ທີ່ກະຊວງ ປກສ ວາງອອກ ຂອງບັນດາກົມໃຫ່ຍ, ກົມ-ກອງອ້ອມຂ້າງກະຊວງ, ວິທະຍາຄານ, ກອງບັນຊາການ ປກສ ນະຄອນຫຼວງວຽງຈັນ ແລະ ປກສ ແຂວງທົ່ວປະເທດໃນປີ 2018 ຜ່ານມາ ພ້ອມທັງຄົ້ນຄວ້າປຶກສາຫາລືເພື່ອກຳນົດ ແລະ ວາງທິດທາງແຜນການວຽກງານຈຸດສຸມໃນປີ 2019.

ໂອກາດດຽວກັນ ພົຈວ ສີສະຫວາດ ແກ້ວມາລາວົງ ຄະນະປະຈຳພັກກະຊວງ ຫົວໜ້າຫ້ອງວ່າການກະຊວງ ປກສ ໄດ້ສະຫຼຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານປ້ອງກັນຄວາມສະຫງົບ ການຮັກສາຄວາມເປັນລະບຽບຮຽບຮ້ອຍທາງສັງຄົມທົ່ວປະເທດ ໂດຍສະເພາະແມ່ນການຈັດຕັ້ງປະຕິບັດ 4 ຄາດໝາຍ 4 ແຜນງານໃຫ່ຍ 41 ໂຄງການໃນປີຜ່ານມາ ແລະ ທິດທາງແຜນການໃນປີຕໍ່ໜ້າ ຈາກນັ້ນຕົວແທນຈາກບັນດາກົມໃຫ່ຍ, ວິທະຍາຄານ, ປກສ ນະຄອນຫຼວງວຽງຈັນ ແລະ ປກສ ແຂວງທົ່ວປະເທດ ກໍ່ໄດ້ປະກອບຄຳຄິດເຫັນຕໍ່ບົດສະຫຼຸບ ແລະ ທິດທາງແຜນການ ໂດຍສະເພາະດ້ານອ່ອນ-ຂໍ້ຄົງຄ້າງ ແລະ ວິທີການນຳພາຢູ່ກົມກອງຂອງຕົນ ເພື່ອແລກປ່ຽນບົດຮຽນຮ່ວມກັນຢ່າງກົງໄປກົງມາ ແລະ ມີວິທະຍາສາດ.

ພ້ອມນີ້ໃນກອງປະຊຸມ ພົຈວ ອາລູ ວາລືຊື ຫົວໜ້າກົມໃຫ່ຍການເມືອງ ປ້ອງກັນຄວາມສະຫງົບ ຍັງໄດ້ຜ່ານລັດຖະດຳລັດຂອງປະທານປະເທດ ວ່າດ້ວຍການເລື່ອນຊັ້ນ ພັອ ຂື້ນ ພົນຈັດຕະວາ ໃຫ້ນາຍຕຳຫຼວດຂັ້ນສູງໃນກຳລັງ ປກສ ຈຳນວນ 7 ທ່ານຄື: ພັອ ບົວພັນ ຍໍລະວົງສາ ຫົວໜ້າກອງບັນຊາການປ້ອງກັນທີ່ຕັ້ງ; ພັອ ພິມພາ ສີໂພໄຊ ຫົວໜ້າກົມສື່ສານ; ພັອ ສຸວັນນີ ສີສຸພາບມີໄຊ, ພັອ ຄຳກິ່ງ ຜຸຍຫຼ້າມະນີວົງ, ຮອງຫົວໜ້າກົມໃຫ່ຍການ ປກສ; ພັອ ບົວວັນ ວົງສາວັນທອງ ຮອງຫົວໜ້າກົມໃຫ່ຍສັນຕິບານ, ພັອ ກິແກ້ວ ເນົາວະລັດ ຮອງຫົວໜ້າກົມໃຫ່ຍພະລາທິການ ປກສ ອລະ ທ່ານ ພັອ ນິລະວົງ ເຈືອງຕະວະລາດ ຫົວໜ້າກອງບັນຊາການ ປກສ ແຂວງອຸດົມໄຊ.

ໃຫ້ກຽດປະດັບຊັ້ນ ໂດຍ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ.

 

 

Off

Comments are closed.