22nd Jan2019

ພິທີມອບ-ຮັບ ຍົນບິນຝຶກແອບ-ສູ້ຮົບ ຍັກ 130

by somchan

ພິທີມອບ-ຮັບ ຍົນບິນຝຶກແອບ-ສູ້ຮົບ ຍັກ 130 ລະຫວ່າງບໍລິສັດ ໂຣອາບາໂລນ ເອັກສະປອດ ແຫ່ງ ສ ລັດເຊຍ ກັບກະຊວງປ້ອງກັນປະເທດ ສປປ ລາວ ໄດ້ຈັດຂື້ນໃນວັນທີ 21 ມັງກອນ ນີ້ ໂດຍການເປັນກຽດເຂົ້າຮ່ວມຂອງ ພົອ ຈັນສະໜອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ມີທ່ານ ມິຄາອິນ ວາລາດີ ເມຍໂຣວິກ ບາຣານ໊ອບ ເອກອັກຄະລັດຖະທູດ ຜູ້ມີອຳນາດເຕັມ ແຫ່ງ ສ ລັດເຊຍ ປະຈຳ ສປປ ລາວ, ມີຄະນະນຳກະຊວງ ປ້ອງກັນປະເທດ ຜູ້ແທນຝ່າຍລາວ ແລະ ລັດເຊຍເຂົ້າຮ່ວມ.

ພົຈວ ປະສິດ ທ່ຽງທຳ ຮອງຫົວໜ້າກົມໃຫ່ຍເສນາກອງທັບ ໄດ້ກ່າວວ່າ: ການຈັດຕັ້ງປະຕິບັດ ສັນຍາການຈັດຊື້ ຍົນຫັດແອບ-ສູ້ຮົບ ຍັກ 130 ຈຳນວນ 4 ລຳ ທັງສອງຝ່າຍໄດ້ມີການປະສານສົມທົບ, ແລກປ່ຽນຄຳຄິດຄຳເຫັນ ແລະ ພ້ອມກັນສູ້ຊົນຈັດຕັ້ງປະຕິບັດຕາມແຜນການທີ່ຄາດໄວ້. ການໄດ້ຮັບຍົນຫັດແອບ-ສູ້ຮົບ ດັ່ງກ່າວນີ້ເປັນການປະກອບສ່ວນອັນສຳຄັນ ໃນການຍົກສູງຄວາມສາມາດ ໃນການປະຕິບັດໜ້າທີ່ ຂອງກອງທັບປະຊາຊົນລາວໃຫ້ສູງຂື້ນ ເປັນການສ້າງຄວາມເຂັ້ມແຂງ ແລະ ເພີ່ມທະວີປະສິດທິພາບໃຫ້ແກ່ວຽກງານປັບປຸງກໍ່ສ້າງກອງທັບ ໃນການປົກປັກຮັກສາເຂດນ້ຳແດນດິນຂອງ ສປປ ລາວ ໄວ້ໄດ້ຢ່າງໜັ້ນຄົງ.

ໂອກາດນີ້ກໍໄດ້ມີການເຊັນມອບ-ຮັບ ຕາງໜ້າຝ່າຍລາວໂດຍ ພັອ ຄຳເຫຼັກ ແສງພະຈັນ ຮັກສາການຫົວໜ້າກົມທະຫານອາກາດ ກະຊວງປ້ອງກັນປະເທດ, ຝ່າຍລັດເຊຍໂດຍ ທ່ານ ອາເລັກ ຊານເດີ ເມລິກ ດາວີດ໊ອບ ຕາງໜ້າບໍລິສັດໂຣອາບາໂລນ ເອັກສະປອດ.

Off

Comments are closed.