25th Jan2019

ລັດຖະມົນຕີກະຊວງ ປກສ ຊີ້ນຳວຽກງານວິຊາສະເພາະ ຢູ່ກອງ ບັນຊາການ ປກສ ແຂວງສາລະວັນ ແລະ ແຂວງເຊກອງ

by somchan

ໃນວັນທີ 22-23 ມັງກອນ 2019 ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງ ປກສ ໄດ້ພົບປະ ແລະ ຊີ້ນຳວຽກງານວິຊາສະເພາະ ຢູ່ກອງບັນຊາການ ປກສ ແຂວງສາລະວັນ ແລະ ແຂວງເຊກອງ ໂດຍການຕ້ອນຮັບຂອງ ຄະນະພັກ-ຄະນະນຳ ແລະ ພະນັກງານຫຼັກແຫຼ່ງ ກອງບັນຊາການ ປກສ ທັງສອງແຂວງເຂົ້າຮ່ວມ.

ໃນໂອກາດນີ້ ຫົວໜ້າກອງບັນຊາການ ປກສ ແຂວງສາລະວັນ ແລະ ແຂວງເຊກອງ ໄດ້ລາຍງານກ່ຽວກັບການຊີ້ນຳ-ນຳພາກຳລັງ ປກສ ແຂວງຂອງຕົນ ຕະຫຼອດໄລຍະຜ່ານມາ ເປັນຕົ້ນແມ່ນການນຳພາດ້ານການເມືອງແນວຄິດ ຂອງຄະນະພັກຄະນະບັນຊາແຕ່ລະຂັ້ນ ແລະ ພະນັກງານນັກຮົບໃຫ້ມີຄວາມໜັກແໜ້ນ ສ້າງຄວາມເຂັ້ມແຂງທາງດ້ານການຈັດຕັ້ງ, ມີລະບຽບວິໄນເຂັ້ມງວດ ມີຄວາມຮັບຜິດຊອບຕໍ່ໜ້າທີ່ ທີ່ການຈັດຕັ້ງມອບໝາຍໃຫ້ ທາງດ້ານວຽກງານວິຊາສະເພາະ ໄດ້ສຸມໃສ່ປະຕິບັດຕາມທິດຊີ້ນຳຂອງຂັ້ນເທິງ ໂດຍສະເພາະແມ່ນການປ້ອງກັນສະກັດກັ້ນ ແລະ ແກ້ໄຂ ກຸ່ມຄົນບໍ່ດີທີ່ເຄື່ອນໄຫວສ້າງຄວາມບໍ່ສະຫງົບ ຄວາມບໍ່ເປັນລະບຽບຮຽບຮ້ອຍໃຫ້ແກ່ສັງຄົມ, ການໂຄສະນາໃສ່ຮ້າຍປ້າຍສີຕໍ່ການນຳພາຂອງພັກ ປຸກລະດົມປະຊາຊົນຜູ້ຮູ້ເທົ່າບໍ່ເຖິງການເຄື່ອນໄຫວກະທຳຜິດຕໍ່ກົດໝາຍ ເປັນຕົ້ນແມ່ນ ບັນຫາຂີ້ລັກ-ງັດແງະ, ປຸ້ນຈີ້ຊິງຊັບ, ບັນຫາຢາເສບຕິດ ແລະ ອື່ນໆ ເປັນບັນຫາທີ່ທ້າທາຍຕໍ່ຄວາມສະຫງົບ ທັງເປັນການກົດໜ່ວງທ່ວງດຶງການພັດທະນາປະເທດຊາດ, ໃນໄລຍະຜ່ານມາກໍ່ສາມາດແກ້ໄຂໄດ້ຫຼາຍກໍລະນີດຳເນີນຄະດີຕໍ່ຜູ້ທີ່ເຄື່ອນໄຫວກະທຳຜິດຕາມຂັ້ນຕອນຂອງກົດໝາຍ, ເພື່ອເຮັດໃຫ້ແຂວງສາລະວັນ ແລະ ແຂວງເຊກອງ ມີຄວາມສະຫງົບ ມີຄວາມເປັນລະບຽບຮຽບຮ້ອຍ.

ໃນໂອກາດດັ່ງກ່າວ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງ ປກສ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ຜົນສຳເລັດ ທີ່ຄະນະພັກ-ຄະນະບັນຊາ ພະນັກງານ-ນັກຮົບທົ່ວກອງບັນຊາການ ປກສ ທັງສອງແຂວງ ຍາດມາໄດ້ໃນໄລຍຜ່ານມາ ພ້ອມນັ້ນ ທ່ານ ກໍ່ໄດ້ເນັ້ນໜັກ ໃຫ້ຄະນະພັກ-ຄະນະບັນຊາ ພະນັກງານ-ນັກຮົບ ສືບຕໍ່ເສີມຂະຫຍາຍດ້ານດີຜົນງານ ທີ່ເປັນມູນເຊື້ອ ແລະ ເພີ່ມທະວີປັບປຸງແກ້ໄຂຂໍ້ບົກຜ່ອງທີ່ເປັນບັນຫາຫຍໍ້ທໍ້ ໂດຍກຳແໜ້ນສະພາບການໃຫ້ທົ່ວເຖິງ, ເອົາໃຈໃສ່ປັບປຸງກຳລັງໃຫ້ໜັກແໜ້ນທາງດ້ານການເມືອງ-ແນວຄິດເຂັ້ມແຂງທາງດ້ານການຈັດຕັ້ງ ມີທັດສະນະຄຸນສົມບັດ, ມີລະບຽບວິໄນທີ່ເຂັ້ມງວດ, ມີແບບແຜນໃນການເຄື່ອນໄຫວວິຊາສະເພາະໃຫ້ຖືກຕ້ອງຕາມກົດໝາຍ, ສຸມໃສ່ແກ້ໄຂປະກົດການຫຍໍ້ທໍ້ຢູ່ໃນກຳລັງ, ຕ້ານ ແລະ ສະກັດກັ້ນການສໍ້ລາດບັງຫຼວງໃຫ້ເດັດຂາດ ຫາກເກີດຂື້ນບ່ອນໃດແກ້ໄຂຢູ່ບ່ອນນັ້ນໃຫ້ທັນເວລາ ແລະ ຖືກຕ້ອງ, ຈັດຕັ້ງລະບອບປະຈຳການໃຫ້ເຂັ້ມງວດ ຫັນພະນັກງານລົງກໍ່ສ້າງຮາກຖານ ປຸກລະດົມປະຊາຊົນໃຫ້ເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ເພື່ອສະກັດກັ້ນ ແກ້ໄຂບັນດາໜໍ່ແໜງທີ່ສ້າງຄວາມບໍ່ສະຫງົບ ໃຫ້ວ່ອງໄວທັນການ ຖືກຕ້ອງ ແລະ ຍຸດຕິທຳ. ເພື່ອຄວາມສະຫງົບສຸກຂອງປະຊາຊົນ ຄວາມເປັນລະບຽບຮຽບຮ້ອຍຂອງສັງຄົມ ແລະ ເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງ.

Off

Comments are closed.