18th Feb2019

ສະເຫຼີມສະຫຼອງວັນສ້າງຕັ້ງກຳລັງ 504 ຄົບຮອບ 40 ປີ

by somchan

ພິທີສະເຫຼີມສະຫຼອງວັນສ້າງຕັ້ງກຳລັງ 504 ຄົບຮອບ 40 ປີ ຄືວັນທີ 18 ກຸມພາ 1979 – 18 ກຸມພາ 2019 ໄດ້ຈັດໃນວັນທີ 18 ກຸມພາ ນີ້ ໂດຍການເປັນກຽດເຂົ້າຮ່ວມຂອງ ພົຕ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ມີຄະນະກົມ, ບັນດາກົມກອງອ້ອມຂ້າງກະຊວງ, ພະນັກງານອາວຸໂສບຳນານ, ຫ້ອງ 504 ປກສ ແຂວງທົ່ວປະເທດ ແລະ ພະນັກງານຫຼັກແຫຼ່ງພາຍໃນກົມ 504 ເຂົ້າຮ່ວມ.

ພັອ ປອ ວັນທອນ ສຸລິສັກ ຮັກສາການຫົວໜ້າກົມ 504 ກະຊວງປ້ອງກັນຄວາມສະຫງົບ ໄດ້ເລົ່າປະຫວັດມູນເຊື້ອການກຳເນີດເຕີບໃຫ່ຍ ແລະ ຂະຫຍາຍຕົວຂອງກຳລັງ 504 ຕະຫຼອດ 40 ປີ ຜ່ານມາ ໃນຖານະເປັນເສນາທິການຂ່າວໃຫ້ແກ່ການນຳພັກ-ລັດ ກໍຄືລັດຖະມົນຕີກະຊວງປ້ອງກັນຄວາມສະຫງົບ, ກຳລັງ 504 ໄດ້ມີຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ສຸມໃສ່ຈັດຕັ້ງເຄື່ອນໄຫວເກັບກຳຂ່າວ, ປະມວນຂ່າວ ແລະ ລາຍງານຂ່າວໃຫ້ຂັ້ນເທີງ, ຈາກຜົນງານ ແລະ ໄຊຊະນະກຳລັງ 504 ຈຶ່ງໄດ້ຮັບຄວາມໄວ້ເນື້ອເຊື່ອໃຈ ແລະ ໄດ້ຮັບການຍ້ອງຍໍຊົມເຊີຍຈາກພັກ-ລັດຖະບານ ກໍຄືກະຊວງປ້ອງກັນຄວາມສະຫງົບ ແລະ ຂະແໜງການທີ່ກ່ຽວຂ້ອງທັງສູນກາງ ແລະ ທ້ອງຖິ່ນ ສະແດງອອກ ໄດ້ຮັບໃບຍ້ອງຍໍ, ຫຼຽນໄຊ, ຫຼຽນກາປະເພດຕ່າງໆ ເປັນຈຳນວນຫຼວງຫຼາຍ.

ເພື່ອສືບຕໍ່ເສີມຂະຫຍາຍມູນເຊື້ອອັນສະຫງ່າງງາມຂອງກຳລັງ 504 , ຄະນະກົມ 504 ຈະສືບຕໍ່ຈັດຕັ້ງປະຕິບັດບັນດາວຽກງານຈຸດສຸມຄື: ສືບຕໍ່ສຶກສາອົບຮົມການເມືອງນຳພາແນວຄິດໃຫ້ພະນັກງານ-ນັກຮົບໃຫ້ມີຄວາມອຸ່ນອ່ຽນທຸ່ນທ່ຽງຕັ້ງໜ້າປະຕິບັດໜ້າທີ່ວຽກງານຂອງຕົນໃຫ້ມີຜົນສຳເລັດ, ສືບຕໍ່ບຳລຸງກໍ່ສ້າງກຳລັງ 504 ໃຫ້ຮັບປະກັນທາງດ້ານປະລິມານ ແລະ ຄຸນນະພາບ, ຮູ້ນຳໃຊ້ເຕັກໂນໂລຢີທີ່ທັນສະໄໝຮັບໃຊ້ໃນການເຄື່ອນໄຫວວິຊາສະເພາະໃນປະຈຸບັນ ແລະ ໃນຕໍ່ໜ້າ ເພີ່ມທະວີການປະສານສົມທົບກັບບັນດາກົມກອງ, ຂະແໜງການອ້ອມຂ້າງສູນກາງ ແລະ ທ້ອງຖິ່ນ ເພື່ອຈັດຕັ້ງດຳເນີນວຽກງານໃຫ້ເປັນລະບົບ ແລະ ມີຄວາມຄ່ອງຕົວທັງຮັບປະກັນຫຼັກການວິຊາສະເພາະ ແລະ ສ້າງໃຫ້ໄດ້ກຳລັງແຮງສັງລວມເພື່ອຈັດຕັ້ງປະຕິບັດວຽກງານໃຫ້ໄດ້ຮັບຜົນດີ.

Off

Comments are closed.