20th Feb2019

ປກສ ແຂວງສະຫວັນນະເຂດ ກັກຕົວຜູ້ຄ້າຂາຍ ຢາເສບຕິດ 01 ຄົນ ຢືດຢາບ້າ ໄດ້ 9 ໝື່ນກວ່າເມັດ

by somchan

ໃນວັນທີ 14 ກຸມພາ 2019 ນີ້ ເຈົ້າໜ້າທີ່ພະແນກຕຳຫຼວດ ສະກັດກັ້ນ ແລະ ຕ້ານຢາເສບຕິດ ປກສ ແຂວງສະຫວັນນະເຂດ ໄດ້ສົມທົບກັບເຈົ້າໜ້າທີ່ພວກສ່ວນກ່ຽວຂ້ອງ ກັກຕົວຜູ້ຖືກຫາຄ້າຂາຍຢາເສບຕິດໄດ້ 01 ຄົນ ຢືດຂອງກາງ ຢາບ້າ ໄດ້ 46 ມັດ ແລະ 10 ຖົງ ມີ 93,931 ເມັດ ແລະ ໂທລະສັບ 02 ໜ່ວຍ ຜູ້ຖືກຫາລາຍນີ້ ຄື:  ທ້າວ ພາດີ ນວນຄຳເກສອນ ຫຼື ນ໋ອກ ອາຍຸ 24 ປີ ຢູ່ບ້ານ ທ່າສີດາ ເມືອງເຊບັ້ງໄຟ ແຂວງຄຳມ່ວນ, ຜ່ານການສືບສວນ-ສອບສວນຂອງເຈົ້າໜ້າທີ່ ຜູ້ກ່ຽວໃຫ້ການສະລະພາບວ່າ ໄດ້ຮັບຢາບ້າຈໍານວນດັ່ງກ່າວ ມາຈາກຜູ້ຮ່ວມຂະບວນການ ແລ້ວ ຈະນຳມາສົ່ງຕໍ່ໃຫ້ລູກຄ້າ ຢູ່ຂອບເຂດ ບ້ານດົງໝາກແງວ ເມືອງອຸທຸມພອນ ແຂວງສະຫວັນນະເຂດ ແຕ່ຖືກເຈົ້າໜ້າທີ່ກັກຕົວຢູ່ຈຸດດັ່ງກ່າວ.

ເຈົ້າໜ້າທີ່ ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງສະຫວັນນະເຂດ ໃຫ້ຮູ້ຕື່ມວ່າ ໄດ້ຮັບແຈ້ງວ່າ: ໃນວັນທີ 14 ກູມພາ ຈະມີກຸ່ມຄົນບໍ່ດີ ນັດຊື້-ຂາຍຢາເສບຕິດ ຢູ່ຕາມສາຍທາງ ເລກ ທີ 13 ໃຕ້ ທ່າແຂກ-ເຊໂນ ຂອບເຂດບ້ານດົງໝາກແງວ ເມືອງອຸທຸມພອນ ດັ່ງນັ້ນໄດ້ຈັດຕັ້ງກຳລັງວິຊາສະເພາະ ໂດຍສົມທົບກັບເຈົ້າໜ້າທີ່ພາກສ່ວນກ່ຽວຂ້ອງ ລົງມ້າງລາຍຄະດີດັ່ງກ່າວ ມາຮອດ ເວລາ ປະມານ 14 ໂມງ ຂອງວັນດຽວກັນຈື່ງເຫັນກຸ່ມຄົນບໍ່ດີດັ່ງກ່າວມີການເຄື່ອນໄຫວຊື້ຂາຍຢາບ້າ ເຈົ້າໜ້າທີ່ຈື່ງໄດ້ສະແດງຕົວເຂົ້າຈັບກຸມພວກດັ່ງກ່າວແລະ ກັກຕົວຜູ້ຖືກຫາໄດ້ໜື່ງຄົນ ຄື ທ້າວ ພາດີ ນວນຄຳເກສອນ ພ້ອມຢຶດຂອງກາງ ຢາບ້າ 93,931 ເມັດ, ສ່ວນພວກຮ່ວມຂະບວນການ ແມ່ນເອົາໂຕຫຼົບໜີທັນ ປະຈຸບັນທາງເຈົ້າໜ້າທີ່ກຳລັງຕິດຕາມຈັບຕົວພວກກ່ຽວເພື່ອນຳມາສຶບສວນ-ສອບສວນ ແລະ ດຳເນີນຄະດີຕາມລະບຽບກົດໝາຍຕໍ່ໄປ.

 

Off

Comments are closed.