22nd Feb2019

ຫ້ອງຕຳຫຼວດ ປກສ ນະຄອນຫຼວງວຽງຈັນ ຊີ້ແຈງອຸປະຕິເຫດ ລົດກະບະໂຕໂຍຕ້າລີໂວ້ ຕຳກັບລົດຈັກ ວັນທີ 20 ກຸມພາ 2019

by somchan

ຈາກເຫດການເກີດອຸປະຕິເຫດ ຢູ່ເສັ້ນທາງຄູວຽງ ຕໍ່ໜ້າຕຶກວຽງຈັນເຊັນເຕີ ໃນເວລາ 15:30 ນາທີ ຂອງວັນທີ 20 ກຸມພາ 2019 ຊຶ່ງແມ່ນ ລົດກະບະໂຕໂຍຕ້າລີໂວ້ສີຂາວ ໝາຍເລກທະບຽນ ກກ 4668 ກຳແພງນະຄອນ ທີ່ໄດ້ຕຳເອົາລົດຈັກຮອນດ້າ ສະກຸບປີ້ສີດຳ ໝາຍເລກທະບຽນ ດຍ 0871 ກຳແພງນະຄອນ ແລ້ວລາກເອົາລົດຈັກໄປຈົນເຖິງ 4 ແຍກໄຟແດງ ຕໍ່ໜ້າທະນາຄານລາວຫວຽດ ເຮັດໃຫ້ປະຊາຊົນມີຄວາມສົນໃຈ ແລະ ມີການເອົາຮູບພ້ອມຂຽນຂໍ້ຄວາມຕ່າງໆນາໆລົງສື່ສັງຄົມອອນລາຍ.

ຕໍ່ກັບບັນຫາດັ່ງກ່າວ ໃນວັນທີ 21 ກຸມພາ 2019 ທ່ານ ພັທ ຢຸດຕະພົງ ສຸວັນນະສິງ ຮອງຫົວໜ້າຫ້ອງຕຳຫຼວດ ກອງບັນຊາການ ປກສ ນະຄອນຫຼວງວຽງຈັນ ຜູ້ຊີ້ນຳວຽກງານຈະລາຈອນ ນະຄອນຫຼວງວຽງຈັນ ໄດ້ໃຫ້ສຳພາດຕໍ່ສື່ມວນຊົນ ແລະ ຊີ້ແຈງເຫດການໃນຄັ້ງນີ້ວ່າ: ຜູ້ຂັບຂີ່ລົດກະບະໂຕໂຍຕ້າລີໂວ້ ຄັນດັ່ງກ່າວແມ່ນຊື່ ທ້າວ ວັນໄຊ ອາຍຸ 59 ປີ ພະນັກງານບຳນານ ປກສ ໄດ້ຮັບນະໂຍບາຍພັກຜ່ອນບຳນານ ແຕ່ປີ 2018 ປະຈຸບັນຢູ່ບ້ານ ແສງສະຫວ່າງ ເມືອງໄຊເຊດຖາ ນະຄອນຫຼວງວຽງຈັນ, ສ່ວນຜູ້ຂັບຂີ່ລົດຮອນດ້າສະກຸບປີ້ ແມ່ນທ້າວ ອົ້ນ ອາຍຸ 25 ປີ ຄ້າຂາຍຢູ່ບ້ານ ໂນນຫວາຍ ແລະ ຜູ້ຊ້ອນທ້າຍ ຊື່ ນາງ ອາຕິປາ ອາຍຸ 27 ປີ ປະຊາຊົນ ຢູ່ບ້ານ ເມືອງນ້ອຍ ເມືອງໄຊເຊດຖາ ນະຄອນຫຼວງວຽງຈັນ, ສາເຫດຂອງການເກີດອຸປະຕິເຫດໃນຄັ້ງນີ້ ແມ່ນຍ້ອນຜູ້ຂັບຂີ່ລົດກະບະມີອາການມືນເມົາບໍ່ສາມາດຄວບຄຸມສະຕິຂອງຕົນເອງໄດ້ ໃນເວລາເກີດເຫດກໍ່ບໍ່ຮູ້ສຶກຕົວ ສ່ວນຜູ້ຂັບຂີ່ ແລະ ຊ້ອນທ້າຍລົດຈັກແມ່ນບາດເຈັບເລັກໜ້ອຍ, ລົດຈັກເປເພພໍສົມຄວນ.

ສຳລັບ ທ້າວ ວັນໄຊ ຜູ້ຂັບຂີ່ລົດກະບະຄັນດັ່ງກ່າວ ກໍ່ໄດ້ອອກມາສະແດງຄວາມເສຍໃຈຕໍ່ເຫດການທີ່ເກີດຂື້ນ ແລະ ຂໍໂທດຕໍ່ມວນຊົນ ຜູ້ຖືກເສຍຫາຍ ແລະ ພ້ອມຮັບຜິດຊອບຕາມລະບຽບກົດໝາຍທຸກປະການ.

Off

Comments are closed.