22nd Feb2019

ຄະນະຜູ້ແທນຂັ້ນສູງກະຊວງ ປກສ ລາວ ສຳເລັດການຢ້ຽມຢາມສັນທະວະໄມຕີ ຢ່າງເປັນທາງການຢູ່ ສສ ຫວຽດນາມ

by somchan

ຕອບສະໜອງຕາມຄຳເຊີນ ຂອງ ພົອ ໂຕ ເລິມ ກຳມະການກົມການເມືອງ ສູນກາງພັກຄອມມູນິດຫວຽດນາມ, ລັດຖະມົນຕີກະຊວງຕຳຫຼວດຫວຽດນາມ.

ຄະນະຜູ້ແທນຂັ້ນສູງ ກະຊວງປ້ອງກັນຄວາມສະຫງົບລາວ ນຳໂດຍ ພົທ ວິໄລ ຫຼ້າຄຳຟອງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບລາວ ພ້ອມຄະນະ ໄດ້ເດີນທາງຢ້ຽມຢາມສັນທະວະໄມຕີ ສສ ຫວຽດນາມ ຢ່າງເປັນທາງການ ແລະ ຮ່ວມກອງປະຊຸມສອງຝ່າຍປະຈຳປີ 2019 ລະຫວ່າງ ກະຊວງປ້ອງກັນຄວາມສະຫງົບລາວ ແລະ ກະຊວງຕຳຫຼວດຫວຽດນາມ ໃນລະຫວ່າງວັນທີ 19-21 ກຸມພາ 2019.ໃນການເດີນທາງຂອງຄະນະໃນຄັ້ງນີ້ ນອກຈາກໄດ້ເຂົ້າຮ່ວມກອງປະຊຸມວ່າດ້ວຍການຮ່ວມມືສອງຝ່າຍ ແລະ ເຊັນບົດບັນທຶກແຜນການຈັດຕັ້ງປະຕິບັດສັນຍາຮ່ວມມື ລະຫວ່າງສອງກະຊວງ ພ້ອມທັງເຊັນສັນຍາຮ່ວມມືລະຫວ່າງກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ສປປ ລາວ ແລະ ກອງບັນຊາການຕຳຫຼວດນະຄອນຫຼວງຮ່າໂນ້ຍ ສສ ຫວຽດນາມ ຕື່ມອີກ. ຍັງໄດ້ມີພິທີປະດັບຫຼຽນໄຊ-ຫຼຽນກາ ຂອງລັດຖະບານ ສປປ ລາວ ຍ້ອງຍໍໃຫ້ແກ່ກົມກອງລວມໝູ່, ນາຍ ທແລະ ພົນຕຳຫຼວດ ກະຊວງຕຳຫຼວດຫວຽດນາມ, ເນື່ອງໃນໂອກາດ ປີສາມັກຄີມິດຕະພາບ ລາວ-ຫວຽດນາມ; ຍ້ອງຍໍຜົນງານ ໃນການຄົ້ນຄວ້າ ຮຽບຮຽງໂຄງການນັກຮຽນກຳລັງ ປກສ ລາວ ຢູ່ໂຮງຮຽນ 12-75 ສສ ຫວຽດນາມ ແລະ ຍ້ອງຍໍຜົນງານຄະນະນຳ ແລະ ພະນັກງານ ອົງການຜູ້ຕາງໜ້າກະຊວງຕຳຫຼວດຫວຽດນາມ ທີ່ສຳເລັດໜ້າທີ່ ປະຈຳການ ຢູ່ ສປປ ລາວ, ຍ້ອງຍໍຜົນງານການຊ່ວຍເຫຼືອກວດພະຍາດ ແລະ ມອບຢາປົວພະຍາດ ໃຫ້ກະຊວງປ້ອງກັນຄວາມສະຫງົບລາວ.

ພາຍຫຼັງສຳເລັດກອງປະຊຸມ ຄະນະຜູ້ແທນຂັ້ນສູງກະຊວງ ປກສ ລາວ ໄດ້ເຂົ້າຢ້ຽມຂ່ຳນັບ ສະຫາຍ ຫງວຽນ ຟູ ຈ້ອງ, ເລຂາທິການໃຫ່ຍ ພັກກອມມູນິດຫວຽດນາມ, ປະທານປະເທດ ແຫ່ງ ສສ ຫວຽດນາມ; ໃນໂອກາດນີ້ ທ່ານ ລັດຖະມົນຕີກະຊວງ ປກສ ໄດ້ຕາງໜ້າຄະນະ ນຳເອົາຄວາມຢື້ຢາມຖາມຂ່າວ ຄວາມຮັກແພງສາມັກຄີອັນສະນິດສະໜົມ ຈາກການນຳພັກ-ລັດ ຂອງ ສປປ ລາວ ເຖິງ ສະຫາຍ ປະທານປະເທດ ພ້ອມດ້ວຍການນຳພັກ-ລັດ ແລະ ປະຊາຊົນຫວຽດນາມ ແລະ ໄດ້ລາຍງານຈຸດປະສົງ ໃນການເດີນທາງເຄື່ອນໄຫວຢ້ຽາມຢາມ ສສ ຫວຽດນາມ ຈາກນັ້ນສະຫາຍ ປະທານປະເທດ ຫວຽດນາມ ໄດ້ສະແດງຄວາມຕ້ອນຮັບ  ແລະ ຊົມເຊີຍຕໍ່ຄະນະຜູ້ແທນຂັ້ນສູງ ກະຊວງ ປກສ ລາວ ທີ່ຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ເຊິ່ງໄດ້ຕີລາຄາສູງຜົນງານການພົວພັນຮ່ວມມືລະຫວ່າງສອງກະຊວງ ໃນໄລຍະຜ່ານມາ ແລະ ໄດ້ເນັ້ນໜັກໃຫ້ສອງກຳລັງສືບຕໍ່ເສີມຂະຫຍາຍສາຍພົວພັນທີ່ເປັນມູນເຊື້ອອັນດີງາມ ລະຫວ່າງລາວ-ຫວຽດນາມ ໃຫ້ໜັ້ນຄົງຊະໜົງແກ່ນ ແລະ ສືບຕໍ່ຮັດແໜ້ນສາຍພົວພັນແບບພິເສດ-ການຮ່ວມມືຮອບດ້ານ ໃຫ້ເລິກເຊິ່ງກວ້າງຂວາງ ສຸມໃສ່ພັດທະນາສອງກຳລັງໃຫ້ເຕີບໃຫ່ຍເຂັ້ມແຂງຮັບປະກັນໃຫ້ສອງປະເທດລາວ-ຫວຽດນາມ ມີຄວາມສະຫງົບປອດໄພ ປະຊາຊົນສອງຊາດໄປມາຫາສູ່ກັນຢ່າງສະດວກສະບາຍ ພ້ອມທັງປະກອບສ່ວນໃນການປົກປັກຮັກສາ ແລະ ພັດທະນາປະເທດຊາດໃຫ້ຈະເລີນຮຸ່ງເຮືອງ.

 

Off

Comments are closed.