26th Feb2019

ຄະນະຜູ້ແທນຂັ້ນສູງ ຫວຽດນາມ ເຄື່ອນໄຫວຢ້ຽມຢາມ ສະຖານທີ່ຕ່າງໆ ນະຄອນຫຼວງວຽງຈັນ

by somchan

ໃນໂອກາດທີ່ ສະຫາຍ ຫງວຽນ ຟູ ຈ້ອງ ເລຂາທີການໃຫຍ່ ປະທານປະເທດ ແຫ່ງ ສສ ຫວຽດນາມ ໄດ້ເດີນທາງມາຢ້ຽມຢາມສັນຖະວະໄມຕີ ສປປລາວ ຢ່າງເປັນທາງການ, ໃນວັນທີ່ 25 ກຸມພາ ນີ້, ສະຫາຍ ຫງວຽນ ຟູ ຈ້ອງ ພ້ອມຄະນະຜູ້ແທນຂັ້ນສູງພັກ-ລັດ ຫວຽດນາມ ໄດ້ວາງພວງມາລາ ທີ່ອານຸສາວະລີນັກຮົບນິລະນາມ ເພື່ອເປັນການລະນຶກເຖິງດວງວິນຍານຂອງນັກຮົບຜູ້ທີ່ເສຍສະຫຼະເລືອດເນື້ອເພື່ອປະເທດຊາດ.

ພ້ອມນີ້ຄະນະຜູ້ແທນຂັ້ນສູງພັກ-ລັດ ຫວຽດນາມ ໄດ້ເດີນທາງໄປຢ້ຽມຢາມ ໂຮງຮຽນມັດທະຍົມສົມບູນມິດຕະພາບລາວ-ຫວຽດນາມ ເຊີ່ງນຳໂດຍ ສະຫາຍ ນາງ ຕ໋ອງ ທິ ຟ໋ອງ ຮອງປະທານ ຜູ້ປະຈຳການ ສະພາແຫ່ງຊາດ ສສ ຫວຽດນາມ ໃຫ້ການຕ້ອນຮັບໂດຍ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ຄະນະອຳນວຍການໂຮງຮຽນ, ຄູອາຈານພ້ອມດ້ວຍນັກຮຽນ, ໂອກາດດັ່ງກ່າວ ອຳນວຍການໂຮງຮຽນໄດ້ລາຍງານສະພາບການຂອງໂຮງຮຽນ ຕໍ່ຄະນະຜູ້ແທນຂັ້ນສູງ ສສ ຫວຽດນາມ, ເຊິ່ງໂຮງຮຽນ ມສ ມິດຕະພາບ ລາວ-ຫວຽດນາມ ແມ່ນຂອງຂັວນ ລັດຖະບານຫວຽດນາມມອບໃຫ້ປະຊາຊົນຊາວນະຄອນຫຼວງວຽງຈັນ, ແມ່ນສັນຍາລັກແຫ່ງສາຍພົວພັນມິດຕະພາບ, ຄວາມສາມັກຄີແບບພິເສດ ການຮ່ວມມືຮອບດ້ານລະຫ່ວາງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ. ໂອກາດດັ່ງກ່າວ ສະຫາຍ ຮອງປະທານ ຜູ້ປະຈຳການສະພາແຫ່ງຊາດ ຫວຽດນາມ ກໍ່ໄດ້ໂອ້ລົມຕໍ່ຄູອາຈານ ແລະ ນັກຮຽນ. ພ້ອມດຽວກັນນີ້ ສະຫາຍ ຫງວຽນ ຟູ ຈ້ອງ ເລຂາທິການໃຫຍ່ ປະທານປະເທດ ຫວຽດນາມ ໄດ້ພົບປະກັນ ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ແລະ ສະຫາຍ ວິໄລວົງ ບຸດດາຄຳ ກຳມະການສູນກາງພັກ ປະທານກຳມາທິການແຜນການ ການເງິນ ແລະ ກວດສອບ ສະພາແຫ່ງຊາດ ປະທານສະມາຄົມມິດຕະພາບ ລາວ-ຫວຽດນາມ ທີ່ໂຮງແຮມເໝືອງແທງ ທັງສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບລາວ-ຫວຽດນາມ ໃນໄລຍະຜ່ານມາມີຜົນສຳເລັດຫຼາຍດ້ານ, ພ້ອມທັງເຫັນດີ ສືບຕໍ່ສາຍພົວພັນແບບພິເສດໃຫ້ຢືນຍົງຂຶ້ນເລື້ອຍໆ.

 

Off

Comments are closed.