26th Mar2019

ກັກຕົວຜູ້ຄ້າຂາຍຢາເສບຕິດ ຢຶດຂອງກາງ ຢາບ້າ 45 ມັດ

by somchan

ເຈົ້າໜ້າ ພະແນກ ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງສະຫວັນນະເຂດ ກັກຕົວຜູ້ຄ້າຂາຍຢາເສບຕິດ 01 ຄົນ ພ້ອມຢຶດຂອງກາງຢາບ້າ ໄດ້ 45 ມັດ ຫຼື 90,000 ເມັດ ໃນວັນທີ 19 ມີນາ 2019 ຜ່ານມານີ້.

ເຈົ້າໜ້າ ພະແນກ ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງ ໃຫ້ຮູ້ວ່າ ໃນວັນທີ 19 ມີນາ 2019 ໄດ້ຮັບຂ່າວວ່າມີກຸ່ມຄົນບໍ່ດີຈຳນວນໜື່ງ ມີການເຄື່ອນໄຫວຄ້າຂາຍສິ່ງຜິດກົດໝາຍ ຕາມສາຍທາງເລກ 9 ຂອບເຂດບ້ານນາທາດ ເມືອງອຸທຸມພອນ ແຂວງສະຫວັນນະເຂດ ດັ່ງນັ້ນເຈົ້າໜ້າທີ່ຈື່ງໄດ້ຈັດຕັ້ງກຳລັງລົງຕິດຕາມ ເພື່ອມ້າງລາຍຄະດີດັ່ງກ່າວ ຮອດເວລາປະມານ 15 ໂມງ ຂອງວັນດຽວກັນ ຈື່ງພົບເຫັນກຸ່ມຄົນບໍ່ດີກຸ່ມໜື່ງມີການເຄື່ອນໄຫວແລກປ່ຽນຊື້ຂາຍສິ່ງຜິດກົດໝາຍ ໂດຍນຳໃຊ້ລົດກະບະ ຣິໂວ້ສີຂາວ ຂັບຂີ່ມາຕາມສາຍທາງເລກ 9 ສະຫວັນນະເຂດ-ເຊໂນ ເຈົ້າໜ້າທີ່ໄດ້ສະແດງຕົວເຂົ້າຈັບກຸມ ສາມາດກັກຕົວຜູ້ຂາຍຢາເສບຕິດໄດ້ 01 ຄົນ ຊື່ ທ້າວ ພຸດເທວັນ ກຸລະວົງສາ ຫຼື ຈິມມີ້ ອາຍຸ 19 ປີ ບ້ານໂພນສະຫວ່າງໃຕ້ ນະຄອນໄກສອນພົມວິຫານ ກັກຕົວໄດ້ໃນຄະນະທີ່ຜູ້ກ່ຽວກຳລັງລົງຈາກລົດເພື່ອສົ່ງມອບຢາ ພ້ອມຢຶດຂອງກາງ ຢາບ້າ 45 ມັດ ເທົ່າກັບ 90,000 ເມັດ ໃນກະເປົ໋າເປ້ຂອງຜູ້ກ່ຽວ, ພ້ອມດ້ວຍ ໂທລະສັບ ຈຳນວນ 02 ໜ່ວຍ.

ຜ່ານການສືບສວນ-ສອບສວນ ໃນເບື້ອງຕົ້ນ ທ້າວ ພຸດເທວັນ ກຸລະວົງສາ ຜູ້ຖຶກຫາ ໄດ້ໃຫ້ການສາລະພາບວ່າ ຢາບ້າຈຳນວນດັ່ງກ່າວແມ່ນຂອງພວກກ່ຽວແທ້ ເຊີ່ງໄດ້ຊື້ມາຈາກຜູ້ຮ່ວມຂະບວນການ ຊື່ ທ້າວ ອ໋ອດ ບໍ່ຮູ້ບ້ານ ເພື່ອນຳມາຂາຍຕໍ່ໃຫ້ລູກຄ້າ ແຕ່ຖືກເຈົ້າໜ້າທີ່ກັກຕົວກ່ອນ ສ່ວນຜູ້ຮ່ວມຂະບວນການແມ່ນໄດ້ເອົາໂຕຫຼົບໜີ ປະຈຸບັນເຈົ້າໜ້າທີ່ຍັງສຶບຕໍ່ນຳຈັບຕົວພວກກ່ຽວມາດຳເນີນຄະດີຕາມລະບຽບກົດໝາຍຕໍ່ໄປ.

 

Off

Comments are closed.