19th Apr2019

ປີໃໝ່ລາວ ເກີດອັກຄີໄພ 9 ຄັ້ງ

by somchan

ໃນໄລຍະຂອງການສະເຫຼີມສະຫຼອງບຸນປີໃໝ່ລາວ 2019 ປີນີ້ ໃນຂອບເຂດທົ່ວປະເທດ ໄດ້ມີອັກຄີໄພເກີດຂື້ນ 9 ຄັ້ງ ໃນນີ້ຮ້າຍແຮງກວ່າໝູ່ແມ່ນ ໃນວັນທີ 14 ເມສາ 2019 ໄດ້ເກີດເຫດໄຟໄໝ້ເຮືອນຂອງ ທ່ານ ອາດ ອາຍຸ 83 ປີ ປະຊາຊົນ ຢູ່ບ້ານພູຄຳ  ເມືອງຊະນະສົມບູນ ແຂວງຈຳປາສັກ ພ້ອມທັງໄດ້ລຸກລາມໄໝ້ເຮືອນປະຊາຊົນທີ່ຢູ່ບໍລິເວນໃກ້ຄຽງອີກ 21 ຫຼັງ ແລະ ເລົ້າເຂົ້າ 2 ຫຼັງ ລວມມູນຄ່າເສຍຫາຍ 4 ຕື້ກວ່າກີບ ສ່ວນສາເຫດແມ່ນຍັງຢູ່ໃນຂັ້ນຕອນສືບສວນ-ສອບສວນຂອງເຈົ້າໜ້າທີ່.

ນອກນີ້ຍັງມີເຫດໄຟໄໝ້ໂຮງງານຜະລິດເຊືອກຢາງ ພີອີທີ ລາວຈຳກັດຜູ້ດຽວ ຕັ້ງຢູ່ບ້ານ ໄຜ່ລ້ອມ ເມືອງໄຊທານີ ນະຄອນຫຼວງວຽງຈັນ ໃນວັນທີ 14 ເມສາ 2019 ມູນຄ່າເສຍຫາຍ 15 ລ້ານກວ່າກີບ ສາເຫດແມ່ນໄຟ້າລັດວົງຈອນ ແລະ ໃນວັນດຽວກັນຍັງໄດ້ເກີດເຫດໄຟໄໝ້ເຮືອນຂອງທ້າວ ວິນັດ ຢູ່ບ້ານສີເກີດ ເມືອງນາຊາຍທອງ ນະຄອນຫຼວງວຽງຈັນ ມູນຄ່າເສຍຫາຍ 775 ລ້ານກີບ ສາເຫດແມ່ນໄຟຟ້າລັດວົງຈອນ ນອກຈາກນັ້ນໃນວັນທີ 13 ເມສາ 2019 ໄດ້ເກີດເຫດໄຟໄໝ້ເຮືອນຂອງທ້າວ ປູດ ຢູ່ບ້ານນາຄວາຍກາງ ເມືອງໄຊເສດຖາ ນະຄອນຫຼວງວຽງຈັນ ມູນຄ່າເສຍຫາຍ 10 ລ້ານກີບ ສາເຫດແມ່ນທ້າວ ປູດ ເປັນຜູ້ຈູດເຮືອນຕົນເອງ.

ໃນວັນທີ 15 ເມສາ 2019 ໄດ້ເກີດເຫດໄຟໄໝ້ເຮືອນຂອງທ້າວ ອຸ່ນຄຳ ຢູ່ບ້ານນ້ຳຫງາ ເມືອງແປກ ແຂວງຊຽງຂວາງ ມູນຄ່າເສຍຫາຍ 1 ຕື້ ກວ່າກີບ. ໃນວັນທີ 16 ເມສາ 2019 ໄດ້ເກີດເຫດໄຟໄໝ້ລົດເມ 45 ບ່ອນນັ່ງ ໝາຍເລກທະບຽນ ຄຂ 9966 ກຳແພງນະຄອນ ຢູ່ເຂດບ້ານຮ່ອງຄະຍອມ ນະຄອນປາກເຊ ແຂວງຈຳປາສັກ, ໃນວັນທີ 16 ເມສາ 2019 ໄດ້ເກີດເຫດໄຟໄໝ້ເຮືອນຂອງທ້າວ ນຳ ຢູ່ບ້ານຍາງໂພສີ ນະຄອນໄກສອນພົມວິຫານ ແຂວງສະຫວັນນະເຂດ ມູນຄ່າເສຍຫາຍ 11 ລ້ານກວ່າກີບ, ສາເຫດເກີດຈາກໄຟຟ້າລັດວົງຈອນ, ໃນວັນທີ 12 ເມສາ 2019 ໄດ້ເກີດເຫດໄຟໄໝ້ເຮືອນຂອງປະຊາຊົນ ຢູ່ບ້ານໂນນສົມບູນ ເມືອງບໍລິຄັນ ແຂວງບໍລິຄຳໄຊ ເສຍຫາຍ 4 ຫຼັງ ມູນຄ່າເສຍຫາຍ ແລະ ສາເຫດຍັງຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່ ແລະ ໃນວັນທີ 13 ເມສາ 2019 ໄດ້ເກີດເຫດໄຟໄໝ້ຕະຫຼາດ ຢູ່ບ້ານປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ ມູນຄ່າເສຍຫາຍປະມານ 6,600,000 ຢວນ ສາເຫດແມ່ນເກີດຈາກໄຟຟ້າລັດວົງຈອນ.

Off

Comments are closed.