19th Apr2019

ປີໃໝ່ລາວທົ່ວປະເທດ ເສຍຊີວິດຈາກການເກີດອຸປະຕິເຫດ 37 ຄົນ

by somchan

ພັທ ກົງສີ ສຸວັນນະຕຸ້ມ ຫົວໜ້າກົມຕຳຫຼວດຈະລາຈອນ ກົມໃຫ່ຍຕຳຫຼວດ ກະຊວງປ້ອງກັນຄວາມສະຫງົບ ໄດ້ຖະແຫຼ່ງກ່ຽວກັບບັນຫາອຸປະຕິເຫດທີ່ເກີດຂື້ນໃນໄລຍະສະເຫຼີມສະຫຼອງບຸນປີໃໝ່ລາວ ເລີ່ມແຕ່ວັນທີ 13-17 ເມສາ 2019 ນີ້ ທົ່ວປະເທດມີອຸປະຕິເຫດເກີດຂື້ນ 303 ລາຍ, ພາຫະນະເປ່ເພ 503 ຄັນ, ຄົນໄດ້ຮັບບາດເຈັບ 532 ຄົນ, ຄົນເສຍຊີວິດ 37 ຄົນ ທຽບໃສ່ໄລຍະດຽວກັນຂອງປີ 2018 ອຸປະຕິເຫດເພີ່ມຂື້ນ 16 ລາຍ, ຄົນເສຍຊີວິດຫຼຸດລົງ 2 ຄົນ. ແຂວງທີ່ເກີດອຸປະຕິເຫດຫຼາຍ ແມ່ນແຂວງຈຳປາສັກ 45 ລາຍ, ແຂວງສະຫວັນນະເຂດ 35 ລາຍ, ນະຄອນຫຼວງວຽງຈັນ 31 ລາຍ, ແຂວງທີ່ມີຄົນເສຍຊີວິດຫຼາຍແມ່ນແຂວງວຽງຈັນ 9 ຄົນ, ນະຄອນຫຼວງວຽງຈັນ 5 ຄົນ, ສາເຫດທີ່ພາໃຫ້ເກີດອຸປະຕິເຫດແມ່ນຂີ່ລົດໄວ, ດື່ມສິ່ງມືນເມົາ, ປ່ຽນທິດທາງບໍ່ຮັບປະກັນ ແລະ ອື່ນໆ.

ສຳລັບຢູ່ນະຄອນຫຼວງວຽງຈັນ ພັທ ເພັງສະຫວັນ ທຳມາບຸນ ຫົວໜ້າພະແນກຕຳຫຼວດຈະລາຈອນນະຄອນຫຼວງວຽງຈັນໄດ້ໃຫ່ຮູ້ວ່າ: ສະເພາະນະຄອນຫຼວງວຽງຈັນມີ ອຸປະຕິເຫດເກີດຂື້ນ 31 ລາຍ, ພາຫະນະເປ່ເພ 63 ຄັນ, ຄົນໄດ້ຮັບບາດເຈັບ 43 ຄົນ ແລະ ເສຍຊີວິດ 5 ຄົນ ທຽບໃສ່ປີ 2018 ອຸປະຕິເຫດຫຼຸດລົງ 2 ລາຍ, ຄົນເສຍຊີວິດຫຼຸດລົງ 2 ຄົນ.

Off

Comments are closed.