30th Apr2019

ການຮ່ວມມືດ້ານວຽກງານຕຳຫຼວດລະຫວ່າງ ກະຊວງ ປກສ ລາວ ແລະ ກະຊວງພາຍໃນ ແຫ່ງຮາຊະອານາຈັກກຳປູເຈຍ

by somchan

ກອງປະຊຸມພົບປະແລກປ່ຽນບົດຮຽນວ່າດ້ວຍການຮ່ວມມືດ້ານວຽກງານຕຳຫຼວດລະຫວ່າງ ກົມໃຫ່ຍຕຳຫຼວດ ກະຊວງ ປ້ອງກັນຄວາມສະຫງົບລາວ ແລະ ກົມຕຳຫຼວດຍຸຕິທຳ ກະຊວງພາຍໃນແຫ່ງ ຮາຊະອານາຈັກກຳປູເຈຍ ຈັດຂື້ນໃນວັນທີ 30 ເມສາ 2019 ນີ້ ຢູ່ທີ່ໂຮງແຮມເມືອງແທ໋ງ ນະຄອນຫຼວງວຽງຈັນ.

ຝ່າຍລາວນຳໂດຍ ພັນເອກ ຄຳແພງ ໄຊຍະລາດ ຫົວໜ້າກົມຕຳຫຼວດສະກັດກັ້ນ ແລະ ຕ້ານຢາເສບຕິດ ແລະ ຝ່າຍກຳປູເຈຍ ນຳໂດຍ ພົນໂທ ເລິກ ວັນນະ ຫົວໜ້າກົມຕຳຫຼວດສະກັດກັ້ນ ແລະ ຕ້ານຢາເສບຕິດ, ພ້ອມດ້ວຍຄະນະທັງສອງຝ່າຍເຂົ້າຮ່ວມ.

ໃນການພົບປະຄັ້ງນີ້ທັງສອງຝ່າຍໄດ້ພ້ອມກັນປຶກສາຫາລືແລກປ່ຽນບົດຮຽນສະພາບການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມຢູ່ປະເທດຂອງຕົນໃຫ້ກັນຊາບ, ໂດຍສະເພາະການຈັດຕັ້ງປະຕິບັດບົດບັນທຶກກອງປະຊຸມວ່າດ້ວຍການຮ່ວມມືລະຫວ່າງກະຊວງ ປ້ອງກັນຄວາມສະຫງົບແຫ່ງ ສປປ ລາວ ແລະ ກະຊວງພາຍໃນ ແຫ່ງຮາຊະອານາຈັກກຳປູເຈຍ ປະຈຳປີ 2018 ແລະ ການຮ່ວມມືໃນໄລຍະຜ່ານມາ ເປັນຕົ້ນດ້ານດີຜົນງານທີ່ຄວນຊຸກຍູ້ສົ່ງເສີມ ແລະ ດ້ານອ່ອນຂໍ້ຄົງຄ້າງທີ່ຈະໄດ້ພ້ອມກັນແກ້ໄຂ ບົນພື້ນຖານດັ່ງກ່າວເພື່ອພ້ອມກັນກຳນົດທິດທາງແຜນການຮ່ວມມືໃນຂົງເຂດວຽກງານຕຳຫຼວດໃນຕໍ່ໜ້າລະຫວ່າງສອງກຳລັງຕຳຫຼວດຂອງສອງປະເທດ ໂດຍສະເພາະວຽກງານການສະກັດກັ້ນ ແລະ ຕ້ານອາຊະຍາກຳ ເຊັ່ນ: ການລັກລອບຄ້າຂາຍຢາເສບຕິດລຽບຕາມຊາຍແດນ, ການເຂົ້າ-ອອກເມືອງຜິດກົດໝາຍ, ການຄ້າມະນຸດ, ການຄ້າອາວຸດ, ການຟອກເງີນ, ການລັກລອບຂົນສົ່ງສິນຄ້າໜີພາສາ ແລະ ອື່ນໆ.

ດັ່ງນັ້ນ ເພື່ອແກ້ໄຂບັນຫາດັ່ງກ່າວ ຈຶ່ງຮຽນຮ້ອງໃຫ້ສອງກຳລັງຕຳຫຼວດສອງປະເທດລາວ-ກຳປູເຈຍທີ່ຈະຕ້ອງປຶກສາຫາລືແກ້ໄຂ, ໂດຍສະເພາະເຈົ້າໜ້າທີ່ຕຳຫຼວດສອງຝ່າຍຈະຕ້ອງໄດ້ເອົາໃຈໃສ່ໂຄສະນາສຶກສາອົບຮົມປະຊາຊົນຂອງຕົນທີ່ຢູ່ລຽບຕາມຊາຍແດນໃຫ້ເອົາໃຈໃສ່ເຄົາລົບ ແລະ ປະຕິບັດລະບຽບກົດໝາຍການເຂົ້າ-ອອກ ແລະ ຮັກສາຄວາມສະຫງົບໃນຂອບເຂດບໍລິເວນຊາຍແດນ, ເປັນເຈົ້າການເອົາໃຈໃສ່ຊ່ວຍເຈົ້າໜ້າທີ່ໃນການເຄື່ອນໄຫວກໍ່ຄວາມບໍ່ສະຫງົບຂອງພວກກຸ່ມຄົນບໍ່ດີ ຢູ່ຂອບເຂດຊາຍແດນເຮັດໃຫ້ຊາຍແດນຂອງສອງປະເທດມີຄວາມສະຫງົບໂດຍພື້ນຖານ, ປະຊາຊົນຢູ່ລຽບຕາມຊາຍແດນໄດ້ມີເງື່ອນໄຂໄປມາຫາສູ່ເຊິ່ງກັນ ແລະ ກັນ ຢ່າງສະດວກສະບາຍ ແລະ ປອດໄພດີ.

Off

Comments are closed.