29th May2019

ຈັບເປົ້າໝາຍຄ້າຂາຍຢາເສບຕິດ 03 ຄົນ ພ້ອມຂອງກາງຢາບ້າ 50 ມັດ

by somchan

ວັນທີ 23 ພຶດສະພາ 2019 ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງສະຫວັນນະເຂດ ໄດ້ສົມທົບກັບທະຫານຊາຍແດນ ແຂວງກວາງຈິ ສສ ຫວຽດນາມ ໄດ້ມ້າງຄະດີລັກລອບຄ້າຂາຍຢາເສບຕິດ ຢູ່ເຂດເມືຶອງເຊໂປນ ສາມາດຈັບເປົ້າໝາຍໄດ້ 03 ຄົນ ພ້ອມຂອງກາງຢາເສບຕິດ 50 ມັດຫຼືເທົ່າກັບ 100,000 ເມັດ, ພ້ອມດ້ວຍເປົ້າໝາຍ 03 ຄົນຊື່:

ທ້າວໄມຄໍາ ສຸກພົມມີ ອາຍຸ 40 ປີ ຢູ່ບ້ານທ່າແຂກກາງ ເມືອງທ່າແຂກ, ທ້າວເສກສັນ ແສງທອງ ຫຼືຕ໋ອງ ອາຍຸ 40 ປີ ຢູ່ບ້ານມັນປາ ແລະ ທ້າວປອງສະຫວັນຢືນຍົງ ຫຼື ປອງ ອາຍຸ 46 ປີ ບ້ານໂພນ ເມືອງໜອງບົກ ແຂວງຄໍາມ່ວນ. ໂທລະສັບ 03 ໜ່ວຍ, ລົດກະບະນິສັນນາວາລ້າ ເລກທະບຽນ ກຄ 9886 ສະຫວັນນະເຂດ 01 ຄັນ.

ເຈົ້າໜ້າທີ່ໄດ້ໃຫ້ຮູ້ວ່າ: ໄດ້ຮັບແຈ້ງຄວາມຈາກພົນລະເມືອງດີວ່າ: ມີການເຄື່ອນໄຫວລັກລອບຄ້າຂາຍຢາເສບຕິດຢູ່ເຂດເມືອງເຊໂປນ ແຂວງສະຫວັນນະເຂດ. ດັ່ງນັ້ນ, ເຈົ້າໜ້າທີ່ຈຶ່ງໄດ້ຈັດກໍາລັງລົງກວດກາເຫັນວ່າ ມີມູນຄວາມຈິງ, ຈຶ່ງໄດ້ນຳກຳລັງວິຊາສະເພາະສົມທົບກັບພາກສ່ວນກ່ຽວຂ້ອງມ້າງລາຍຄະດີດັ່ງກ່າວ.

ຜ່ານການສືບສວນ-ສອບສວນ ພວກກ່ຽວໃຫ້ການວ່າ: ຢາບ້າດັ່ງກ່າວແມ່ນໄດ້ຊື້ມາຈາກເພື່ອນຮ່ວມຂະບວນການຂອບເຂດແຂວງບໍລິຄຳໄຊ ໃນລາຄາມັດລະ 20,000 ບາດ ມາຂາຍຕໍ່ໃຫ້ລູກຄ້າຫວຽດນາມ ໃນລາຄາມັດລະ 60,000ບາດ.

ປັດຈຸບັນຄະດີດັ່ງກ່າວ, ເຈົ້າໜ້າທີ່ກໍາລັງດຳເນີນການສືບສວນ-ສອບສວນຫາຜູ້ຮ່ວມຂະບວນການມາລົງໂທດຕາມລະບຽບກົດໝາຍບ້ານເມືອງຕໍ່ໄປ.

Off

Comments are closed.