30th May2019

ຮອງປະທານປະເທດໄດ້ລົງຢ້ຽມຢາມໂຮງຮຽນ ວັດທະນະທຳຊົນເຜົ່າເດັກກຳພ້າຫຼັກ 67

by somchan

ວັນທີ 30 ພຶດສະພາ ນີ້, ປະລິນຍາເອກ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ໄດ້ລົງເຄື່ອນໄຫວຢ້ຽມຢາມ ໂຮງຮຽນວັດທະນະທຳຊົນເຜົ່າເດັກກຳພ້າຫຼັກ 67 ກົມໃຫ່ຍການເມືອງປ້ອງກັນຄວາມສະຫງົບ ຢູ່ບ້ານນ້ຳແຈ້ງ ເມືອງໂພນໂຮງ ແຂວງວຽງຈັນ ເນື່ອງໃນໂອກາດວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ເຊິ່ງໃຫ້ກຽດຕ້ອນຮັບຢ່າງອົບອຸ່ນໂດຍ ພົນຕີ ປະລິນຍາເອກ ສົມຫວັງ ທຳມະສິດ ຄະນະປະຈຳພັກກະຊວງຮອງລັດຖະມົນຕີ ກະຊວງປ້ອງກັນຄວາມສະຫງົບ, ມີທ່ານເຈົ້າເມືອງໂພນໂຮງ, ຫົວໜ້າກອງບັນຊາການ ປກສ ແຂວງວຽງຈັນ, ຄະນະອຳນວຍການໂຮງຮຽນວັດທະນະທຳຊົນເຜົ່າເດັກກຳພ້າຫຼັກ 67, ຄູອາຈານ ແລະ ນ້ອງນ້ອຍນັກຮຽນໃຫ້ການຕ້ອນຮັບຢ່າງສົມກຽດ.

ໃນໂອກາດທີ່ມີຄວາມໝາຍຄວາມສຳຄັນ ພັນເອກ ຈັນດາ ແກ້ວພັກດີ ຄະນະພັກກົມໃຫ່ຍການເມືອງປ້ອງກັນຄວາມສະຫງົບ, ອຳນວຍການໂຮງຮຽນວັດທະນະທຳຊົນເຜົ່າເດັກກຳພ້າຫຼັກ 67 ໄດ້ກ່າວລາຍງານປະຫວັດຄວາມເປັນມາ ແລະ ສະພາບການເຄື່ອນ ໄຫວດຳເນີນການຮຽນ-ການສອນຂອງໂຮງຮຽນວັດທະນະທຳຊົນເຜົ່າເດັກກຳພ້າຫຼັກ 67 ໃຫ້ທ່ານຮອງປະທານປະເທດໄດ້ຮັບຊາບໂດຍສັງເຂບເຊິ່ງທ່ານໄດ້ກ່າວວ່າ ໂຮງຮຽນວັດທະນະທຳຊົນເຜົ່າເດັກກຳພ້າຫຼັກ 67 ໄດ້ຮັບການສ້າງຕັ້ງຂື້ນໃນວັນທີ 7 ພະຈິກ ປີ 1976. ດ້ວຍທຶນບຸກເບິກ ແລະ ກໍ່ສ້າງຂອງລັດຖະບານ, ເບື້ອງຕົ້ນໃສ່ຊື່ວ່າ ສູນອົບຮົມລ້ຽງເດັກກຳພ້າປະຊາທິປະໄຕຫຼັກ 67 ຂື້ນກັບກົມປົກຄອງພົນລະເມືອງ ກະຊວງພາຍໃນນັກຮົບເກົ່າ ແລະ ສັງຄົມ, ຈຸດປະສົງເພື່ອຮັບເອົາເດັກກຳພ້າ, ກຳພອຍ, ເດັກອານາຖາຂາດທີ່ເພິ່ງພາອາໃສຢູ່ຕາມຕົວເມືອງໃຫ່ຍເຂົ້າມາສຶກສາຮ່ຳຮຽນ, ເບິ່ງແຍງລ້ຽງດູ ແລະ ສ້າງໂອກາດໃຫ້ເຂົາເຈົ້າ, ເຊິ່ງເບື້ອງຕົ້ນເປີດການຮຽນ-ການສອນໄດ້ພຽງແຕ່ຊັ້ນປະຖົມສຶກສາ ມີນັກຮຽນ 153 ຄົນ. ຫຼັງຈາກສ້າງຕັ້ງຂື້ນໄດ້ໄລຍະໜຶ່ງກໍ່ໄດ້ມີອົງການຈັດຕັ້ງສາກົນຈຳນວນໜຶ່ງໃຫ້ການຊ່ວຍເຫຼືອທາງດ້ານງົບປະມານສົມທົບທຶນຂອງລັດຖະບານບຸກເບິກ ແລະ ຂະຫຍາຍຕຶກອາຄານມີຫຼາຍຊັ້ນຮຽນ ມາຮອດປະຈຸບັນນີ້ ມີຮອດຊັ້ນມໍປາຍ ນັບແຕ່ມື້ສ້າງຕັ້ງມາຮອດປະຈຸບັນ ໂຮງຮຽນວັດທະນະທຳຊົນເຜົ່າເດັກກຳພ້າຫຼັກ 67 ໄດ້ສ້າງນັກຮຽນຈົບມັດທະຍົມປາຍໄດ້ແລ້ວ 35 ລຸ່ນ ມີນັກຮຽນຈົບ 3,543 ຄົນ, ຍິງ 1,048 ຄົນ, ນັກຮຽນທີ່ຈົບໄປແລ້ວກໍ່ໄດ້ໄປສຶກສາຮ່ຳຮຽນຕໍ່ຢູ່ພາຍໃນ ແລະ ຕ່າງປະເທດ ແລະ ໄດ້ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ.

ໃນໂອກາດນີ້ ທ່ານຮອງປະທານປະເທດໄດ້ໂອ້ລົມໃຫ້ທິດຊີ້ນຳຕໍ່ຄະນະອຳນວຍການ, ຄູອາຈານ ແລະ ນ້ອງນ້ອຍນັກຮຽນ, ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກ, ຄະນະອຳນວຍການຍາດມາໄດ້ໃນໄລຍຜ່ານມາພ້ອມທັງຮຽກຮ້ອງໃຫ້ຄະນະພັກ, ຄະນະອຳນວຍການ, ຄູອາຈານໂຮງຮຽນວັດທະນະທຳຊົນເຜົ່າເດັກກຳພ້າຫຼັກ 67 ຈົ່ງສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອຜົນງານທີ່ມີແລ້ວນັ້ນໃຫ້ເຕີບໃຫ່ຍຂະຫຍາຍຕົວຍິ່ງໆຂື້ນ.

ໃນໂອກາດທີ່ລົງມາຢ້ຽມຢາມໃນຄັ້ງນີ້ ທ່ານ ນາງ ສີຈັນ ວິພາວັນ ພັນລະຍາ ຂອງທ່ານຮອງປະທານປະເທດໄດ້ມອບເງີນຈຳນວນ ໜຶ່ງຮ້ອຍລ້ານກີບ ທີ່ລະດົມມາໄດ້ຈາກບໍລິສັດ ຫ້າງຮ້ານທີ່ຢາກໃຫ້ການຊ່ວຍເຫຼືອ ມອບໃຫ້ໂຮງຮຽນວັດທະນະທຳຊົນເຜົ່າເດັກກຳພ້າຫຼັກ 67 ເປັນການປະກອບສ່ວນຊ່ວຍເຫຼືອໃນການຊື້ວັດຖຸອຸປະກອນເຂົ້າໃນການຮຽນ-ການສອນ, ພ້ອມນີ້ ທ່ານຮອງປະທານປະເທດ ພ້ອມດ້ວຍພັນລະຍາ ໄດ້ປູກຕົ້ນໄມ້ຂະຍຸງ ເພື່ອເປັນທີ່ລະນຶກໃນໂອກາດທ່ານໄດ້ມາຢ້ຽມຢາມ ໂຮງຮຽນວັດທະນະທຳຊົນເຜົ່າເດັກກຳພ້າຫຼັກ 67 ຈາກນັ້ນທ່ານກໍ່ໄດ້ທ່ຽວຊົມເບິ່ງງຫ້ອງການ, ຫ້ອງຮຽນຕື່ມອີກ.

ແລະຂ່າວຍັງໃຫ້ຮູ້ຕື່ມວ່າ:

ຄະນະບັນນາທິການຂ່າວສານ ປ້ອງກັນຄວາມສະຫງົບ ສ້າງຂະບວນການປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ນຳພາໂດຍ ພັນເອກ ສີພັນດອນ ຫວ່າງບົວຊົງ ຫົວໜ້າຄະນະບັນນາທິການຂ່າວສານ ປກສ  ມີຄະນະພັກ-ຄະນະບັນຊາ ຄະນະບັນນາທິການຂ່າວສານ ປກສ ພ້ອມດ້ວຍຄະນະກອງ ແລະ ພະນັກງານນັກຮົບເຂົ້າຮ່ວມ.

ຕົ້ນໄມ້ທີ່ນຳມາປູກໃນຄັ້ງນີ້ ມີຕົ້ນໄມ້ປະດັບ ແລະ ຕົ້ນໄມ້ໃຫ້ໝາກ ທັງນີ້ກໍ່ເພື່ອປັບປຸງເຮັດໃຫ້ສຳນັກງານອົງການສວຍງາມຂື້ນ, ມີຕົ້ນໄມ້ເປັນຮົ່ມ ນອກຈາກນີ້ກໍ່ຍັງເປັນການສ້າງຂະບວນການເພື່ອສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນຕື່ມອີກ.

 

Off

Comments are closed.