31st May2019

ກະຊວງ ປ້ອງກັນຄວາມສະຫງົບ ຈັດພິທີປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ

by somchan

ໃນວັນທີ 31 ພຶດສະພາ 2019 ນີ້ ກະຊວງປ້ອງກັນຄວາມສະຫົງບໄດ້ຈັດພິທີ ປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2019, ທີ່ບ້ານ ຕານປ່ຽວ ເມືອງທຸລະຄົມ ແຂວງວຽງຈັນ ເຊີ່ງນຳໂດຍ ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫົງບ, ມີຄະນະນຳ, ບັນດາກົມໃຫຍ່, ກົມກອງອ້ອມຂ້າງກະຊວງເຂົ້າຮ່ວມ.

ພົຈວ ກິແກ້ວ ເນົາວະລັດ ຮອງຫົວໜ້າກົມໃຫຍ່ພະລາທິການ ກະຊວງປ້ອງກັນຄວາມສະຫົງບ ໄດ້ກ່າວວ່າ: ຍ້ອນເຫັນໄດ້ຄວາມໝາຍຄວາມສຳຄັນຂອງປ່າໄມ້ ກະຊວງປ້ອງກັນຄວາມສະຫົງບ ຈື່ງໄດ້ສ້າງຂະບວນການປູກຕົ້ນໄມ້ທົດແທນຄືນປ່າໄມ້ທີ່ສູນຫາຍໄປໃຫ້ກັບມາເປັນສີຂຽວ ຄືໃນອາດີດ ແລະ ເປັນການຈັດຕັ້ງປະຕິບັດຍຸດທະສາດປູກໄມ້ໃຫ້ເປັນປ່າ ແຕ່ນີ້ ຮອດປີ 2020 ແລະ ຄາດໝາຍດ້ານສິ່ງແວດລ້ອມທີ່ກອງປະຊຸມໃຫຍ່ຄັ້ງທີ່ X ຂອງພັກວາງອອກ ໃຫ້ປະກົດຜົນເປັນຈິງ. ພ້ອມທັງເຮັດໃຫ້ຂະບວນການດັ່ງກ່າວມີຄວາມຟົດຟື້ນ ໃນຂອບເຂດທົ່ວປະເທດເວົ້າລວມ ເວົ້າສະເພາະ ຢູ່ພາຍໃນກະຊວງປ້ອງກັນຄວາມສະຫງົບ ຕາມທິດຊີ້ນຳຂອງຂັ້ນເທິງ ແລະ ຄວາມເປັນເອກະພາບຈາກການນຳກະຊວງປ້ອງກັນຄວາມສະຫົງບ ໃນການສ້າງຂະບວນການປູກຕົ້ນໄມ້ໃນປີ 2019. ຕົ້ນໄມ້ທີ່ນຳມາປູກມີ ຕົ້ນໄມ້ອຸດສາຫະກຳ, ໄມ້ໃຫ້ໝາກ ແລະ ໄມ້ປະດັບ ປູກຕາມສຳນັກງານ-ຫ້ອງການຂອງບັນດາກົມກອງ ອ້ອມຂ້າງກະຊວງປ້ອງກັນຄວາມສະຫົງບ, ສະເພາະຕົ້ນໄມ້ທີ່ນຳມາປູກຢູ່ບ້ານຕານປ່ຽວ ເມືອງທຸລະຄົມ ແຂວງວຽງຈັນ ໃນມື້ນີ້ມີ 1,600 ຕົ້ນ ຕາມແຜນການປູກຈະໃຫ້ໄດ້ປະມານ 6 ພັນຕົ້ນ.

 

Off

Comments are closed.