05th Jun2019

ກັກຕົວພວກລັກລອບຄ້າ-ຂາຍຢາເສບຕິດ ຢຶດຢາບ້າ 60,000 ເມັດ ພ້ອມຜູ້ຖືກຫາ3 ຄົນ.

by somchan

 

ໃນວັນທີ 21 ພຶດສະພາ 2019 ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ແຂວງອັດຕະປື ໄດ້ມ້າງຄະດີຢາເສບຕິດຢູ່ເຂດບ້ານ ເຊໃຫ່ຍ ເມືອງສາມັກຄີໄຊ ສາມາດຢຶດຢາເສບຕິດປະເພດຢາບ້າໄດ້ 60,000 ເມັດ ພ້ອມກັກຕົວຜູ້ຖືກຫາໄດ້ 3 ຄົນຄື: ທ້າວ ແສງກົງ ອາຍຸ 39 ປີ ຢູ່ບ້ານວຽງຄຳ, ທ້າວ ບຸນປອນ ອາຍຸ 48 ປີ ຢູ່ບ້ານນາບວຍ ທັງສອງຢູ່ເມືອງປາກກະດິງ ແຂວງບໍລິຄຳໄຊ ແລະ ນາງ ຫຼ້າ ອາຍຸ 28 ປີ ຢູ່ບ້ານປາກບໍ່ ເມືອງສະໜາມໄຊ ແຂວງອັດຕະປື.

ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດໃຫ້ຮູ້ວ່າ: ວັນທີ 21 ພຶດສະພາ 2019 ໄດ້ຮັບລາຍງານຈາກແຫຼ່ງຂ່າວວ່າ: ມີການເຄື່ອນໄຫວຄ້າຂາຍຢາເສບຕິດ ຢູ່ເຂດບ້ານເຊໃຫ່ຍ ເມືອງສາມັກຄີໄຊ , ເຈົ້າໜ້າທີ່ໄດ້ຈັດກຳລັງຕຳຫຼວດວິຊາສະເພາະປະສານສົມທົບກັບ ປກສ ກຸ່ມຕິດຕາມເປົ້າໝາຍ ຜ່ານການຕິດຕາມເຫັນວ່າມີຄວາມຈິງ ຊຶ່ງວ່າພວກກ່ຽວກຳລັງເຄື່ອນໄຫວຊື້-ຂາຍຢູ່ຈຸດດັ່ງກ່າວ ເຈົ້າໜ້າທີ່ຈຶ່ງເຂົ້າຈັບຕົວພວກກ່ຽວ ພ້ອມຂອງກາງຢາບ້າ 60,000 ເມັດ.

ຜ່ານການສືບສວນ-ສອບສວນ ພວກກ່ຽວໄດ້ຮັບສາລະພາບວ່າ: ໃນວັນທີ 17 ພຶດສະພາ ໄດ້ມີຄົນຮູ້ຈັກໂທລະສັບສັ່ງຊື້ຢາບ້າຈໍານວນຫຼາຍ, ຈາກນັ້ນຈຶ່ງປະສານຫາ ທ້າວ ກົງແສງ ເພື່ອເອົາຢາບ້າໄປສົ່ງຕາມນັດ ມາຮອດເວລາປະມານ 10:00 ໂມງ ຂອງວັນທີ 21 ພຶດສະພາ 2019 ໄດ້ພາກັນເອົາຢາບ້າໄປສົ່ງໃຫ້ຜູ້ສັ່ງຊື້ທີ່ນັດກັນຢູ່ເຂດບ້ານເຊໃຫ່ຍ ເມືອງສາມັກຄີໄຊ ພໍໄປຮອດຈຶ່ງຖືກເຈົ້າໜ້າທີ່ກັກຕົວ.

ປະຈຸບັນເຈົ້າໜ້າທີ່ຕຳຫຼວດພວມດຳເນີນຄະດີກັບພວກກ່ຽວຕາມລະບຽບກົດໝາຍ.

Off

Comments are closed.