21st Jun2019

ກົມໃຫຍ່ການເມືອງ ປກສ ສະຫຼຸບຕີລາຄາຄືນ ການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2018

by somchan

ກົມໃຫຍ່ການເມືອງ ປກສ ສະຫຼຸບຕີລາຄາຄືນ ການກໍ່ສ້າງໜ່ວຍພັກປອດໃສ ເຂັ້ມແຂງ, ໜັກແໜ້ນ ປະຈຳປີ 2018 ໃນວັນທີ 20ມິຖຸນາ 2019 ນີ້ ໂດຍການເປັນກຽດເຂົ້າຮ່ວມ ຂອງ ພົນຈັດຕະວາ ອຸ່ນຫຼ້າ ວົງພະຈັນ ຮອງຫົວໜ້າກົມໃຫຍ່ການເມືອງ ປກສ ມີຄະນະພັກກົມໃຫຍ່, ຄະນະພັກກົມກອງ ແລະ ພະນັກງານຂັ້ນນຳພາ-ບັນຊາ ອ້ອມຂ້າງກົມໃຫຍ່ການເມືອງ ປກສ ເຂົ້າຮ່ວມ.

ພັອ ນາງ ວິໄລທອງ ມັງໜໍ່ເມກ ຫົວໜ້າຫ້ອງການເມືອງ ກົມໃຫຍ່ການເມືອງ ປກສ ໄດ້ສະຫຼຸບຕີລາຄາຄືນ ຜົນການກໍ່ສ້າງໜ່ວຍພັກປອດໄສ, ເຂັ້ມແຂງ, ໜັກແໜ້ນ ຂອງອົງການຄະນະພັກກົມໃຫຍ່ການເມືອງ ປກສ ໃນໄລຍະ 1 ປີ ຜ່ານມາ, ຄະນະພັກກົມໃຫຍ່ການເມືອງ ໄດ້ຖືເອົາການສຶກສາອົບຮົມການເມືອງ-ແນວຄິດ ເພື່ອເຮັດໃຫ້ສະມາຊິພັກ, ພະນັກງານ-ນັກຮົບ ອ້ອມຂ້າງກົມໃຫຍ່ການເມືອງ ປກສ ມີທັດສະນະແນວຄິດຫຼັກໜັ້ນ ການເມືອງໜັກແໜ້ນ ຕິດພັນກັບການແກ້ໄຂບັນຫາຂໍ້ຂາດຕົກບົກຜ່ອງ, ເຮັດໃຫ້ສະມາຊິກພັກ ພະນັກງານ-ນັກຮົບ ມີຄວາມຕື່ນຕົວປັບປຸງຕົນເອງ, ປັບປຸງການຈັດຕັ້ງພັກ  ແລະ ກົມກອງໃຫ້ສອດຄ່ອງກັບໜ້າທີ່ການເມືອງ ຕິດພັນກັບການກໍ່ສ້າງສະມາຊິກພັກ ແລະ ໜ່ວຍພັກປອດໃສ ເຂັ້ມແຂງ ໜັກແໜ້ນ, ທັງເປັນການກວດກາຕີລາຄາປະເມີນຜົນ ໃນການປະຕິບັດ 9 ຂໍ້ແຂ່ງຂັນ ແລະ ຄຳຂວັນ 6 ສໍ 3 ບໍ່ ຂອງຄະນະພັກກົມໃຫຍ່ການເມືອງວາງອອກ.

ຜ່ານການຕີລາຄາຄັດເລືອກຈັດແບ່ງປະເພດ ສະມາຊິກພັກ, ພະນັກງານ-ນັກຮົບ ແລະ ໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2018 ໃນນີ້, ສະມາຊິກພັກເຂັ້ມແຂງ ມີ 502 ສະຫາຍ, ສະມາຊິກພັກແຂງ 69 ສະຫາຍ. ສະມາຊິກພັກກາງ 4 ສະຫາຍ ແລະ ຕີລາຄາພະນັກງານ-ນັກຮົບປະເພດເຂັ້ມແຂງ: 246 ສະຫາຍ, ແຂງ 119 ສະຫາຍ, ກາງ 8 ສະຫາຍ ແລະ ພ້ອມນີ້ຍັງໄດ້ຕີລາຄາໜ່ວຍພັກປອດໃສ ເຂັ້ມແຂງ ໜັກແໜ້ນ ໄດ້ 18 ໜ່ວຍພັກ, ໜ່ວຍພັກແຂງມີ 2 ໜ່ວຍພັກ ແລະ ໜ່ວຍພັກອ່ອນ 1 ໜ່ວຍພັກ. ໃນນີ້ມີ 1 ໜ່ວຍພັກ ໄດ້ຮັບທຸງໄຊນຳໜ້າ ເຊິ່ງໜ່ວຍພັກດັ່ງກ່າວ ແມ່ນເປັນໜ່ວຍພັກເຂັ້ມແຂງຕິດກັນ 5 ປີຊ້ອນ.

ໃນໂອກາດນີ້, ພົຈວ ອຸ່ນຫຼ້າ ວົງພະຈັນ ຮອງຫົວໜ້າກົມໃຫຍ່ການເມືອງ ປກສ ໄດ້ມອບໃບຢັ້ງຢືນໃຫ້ໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈະປີ 2018 ແລະ ມອບທຸ່ງໄຊ. ພ້ອມທັງກ່າວໂອ້ລົມ ເຊິ່ງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຄະນະພັກຮາກຖານແຕ່ລະໜ່ວຍ ທີ່ໄດ້ສຸມໃສ່ຊີ້ນຳ-ນຳພາສະມາຊິກພັກພາຍໃນໜ່ວຍ, ສ້າງໃຫ້ໜ່ວຍພັກເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ພ້ອມທັງເນັ້ນໃຫ້ແຕ່ລະໜ່ວຍ ທີ່ຍາດໄດ້ຜົນງານຕະຫຼອດໄລຍະທີ່ຜ່ານມາ.

ພ້ອມທັງສຶບຕໍ່ຮັກສາມູນເຊື້ອທີ່ຍາດມາໄດ້ ພ້ອມນີ້ໜ່ວຍພັກຕ້ອງສູ້ຊົນກຳແໜ້ນ ແນວທາງຂອງພັກ ແຜນນະໂຍບາຍຂອງລັດ, ມະຕິຄຳສັ່ງຂອງຂັ້ນເທິງວາງອອກ, ປັບປຸງແບບແຜນວິທີເຮັດວຽກຂອງການຈັດຕັ້ງພັກ, ຮັກສາຄວາມສາມັກຄີພາຍໃນພັກໃຫ້ໜັກແໜ້ນ, ຕັ້ງໜ້າປະຕິບັດໜ້າທີ່ວິຊາສະເພາະ ຕາມພາລະບົດບາດ, ສິດ ໜ້າທີ່ການເມືອງຂອງແຕ່ລະເລົ່າຮົບວິຊາສະເພາະ ໃຫ້ມີຜົນສຳເລັດ ແລະ ມີປະສິດທິຜົນສູງ. ໂດຍຕິດພັນກັບ 9 ຂໍ້ແຂ່ງຂັນ, 6 ສໍ 3 ບໍ່ ຂອງຄະນະພັກກົມໃຫ່ຍການເມືອງ ປກສ ວາງອອກ ແນໃສ່ສ້າງໃຫ້ໄດ້ໜ່ວຍພັກປອດໃສ ເຂັ້ມແຂງ ໜັກແໜ້ນ ຢູ່ໜ່ວຍພັກຮາກຖານກົມກອງຂອງຕົນໃນປີ 2019.

 

Off

Comments are closed.