27th Jun2019

ມອບໃບຢັ້ງຢືນໜ່ວຍພັກປອດໃສ,ເຂັ້ມແຂງ, ໜັກແໜ້ນໃຫ້ຄະນະພັກກອງບັນຊາການ ປ້ອງກັນທີ່ຕັ້ງ

by somchan

ພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນໃຫ້ຄະນະພັກກອງບັນຊາການປ້ອງກັນທີ່ຕັ້ງ ກະຊວງປ້ອງກັນຄວາມສະຫງົບ ປະຈຳປີ 2018 ຈັດຂື້ນໃນວັນທີ 27 ມິຖຸນານີ້ ໂດຍການໃຫ້ກຽດເຂົ້າຮ່ວມຂອງ ພົນຕີ ວັນທອງ ກອງມະນີ ຄະນະປະຈຳພັກກະຊວງ, ເລຂາຄະນະພັກກົມໃຫ່ຍ, ຫົວໜ້າກົມໃຫ່ຍການເມືອງປ້ອງກັນຄວາມສະຫງົບ,

ມີພົນຈັດຕະວາ ບົວພັນ ຍໍລະວົງສາ, ຄະນະພັກກະຊວງ, ເລຂາຄະນະພັກກອງບັນຊາການ, ຫົວໜ້າກອງບັນຊາການປ້ອງກັນທີ່ຕັ້ງ ກະຊວງປ້ອງກັນຄວາມສະຫງົບ ມີຄະນະພັກ, ພະນັກງານຫຼັກແຫຼ່ງ ກົມກອງອ້ອມຂ້າງກອງບັນຊາການປ້ອງກັນທີ່ຕັ້ງເຂົ້າຮ່ວມ.

ພັນເອກ ໄຊສີ ແກ້ວສະຫງ່າ ຮອງເລຂາຄະນະພັກ, ຮອງຫົວໜ້າກອງບັນຊາການປ້ອງກັນທີ່ຕັ້ງໄດ້ຜ່ານບົດສະຫຼຸບບັ້ນດຳເນີນຊີວິດການເມືອງເພື່ອຄັດເລືອກໜ່ວຍພັກປອດໃສ,ເຂັ້ມແຂງ,ໜັກແໜ້ນ ປະຈຳປີ 2018, ທ່ານໄດ້ຍົກໃຫ້ເຫັນດ້ານດີຜົນໄດ້ຮັບ ແລະ ຂໍ້ຄົງຄ້າງຂອງການດຳເນີນຂອງການດຳເນີນກໍ່ສ້າງໜ່ວຍພັກປອດໃສ,ເຂັ້ມແຂງ,ໜັກແໜ້ນ ໃນ 1 ປີຜ່ານມາ ໃນນີ້ແມ່ນໄດ້ດຳເນີນການກວດກາຕີລາຄາແຕ່ລະປະເພດຂອງສະມາຊິກພັກ, ພະນັກງານ-ນັກຮົບ, ປະເພດກົມກອງ-ໜ່ວຍພັກ ໂດຍອີງໃສ່ການຄົ້ນຄວ້າປະຕິບັດໜ້າທີ່ວຽກງານຕາມ 4 ດ້ານ, 5 ເນື້ອໃນ ຄະນະພັກແຕ່ລະສະຫາຍໄດ້ຊີ້ນຳແຕ່ລະຮາກຖານພັກ, ແຕ່ລະໜ່ວຍພັກຕາມຄວາມຮັບຜິດຊອບໄດ້ຢ່າງທົ່ວເຖິງ ແລະ ເລິກເຊິ່ງ ຜ່ານການຈັດຕັ້ງປະຕິບັດບັ້ນດຳເນີນຊີວິດການເມືອງສາມາດແບ່ງປະເພດສະມາຊິກພັກ, ພະນັກງານ-ນັກຮົບທົ່ວກອງບັນຊາການປ້ອງກັນທີ່ຕັ້ງ ສາມາດຄັດເລືອກປະເພດເຂັ້ມແຂງມີ 639 ສະຫາຍ, ຍິງ 65 ສະຫາຍ, ແຂງ 58 ສະຫາຍ, ກາງ 5 ສະຫາຍ, ອ່ອນ 2 ສະຫາຍ ໃນນີ້ໄດ້ຄັດເລືອກສະມາຊິກພັກເຂັ້ມແຂງ 354 ສະຫາຍ, ຍິງ 29 ສະຫາຍ, ແຂງ 35 ສະຫາຍ, ກາງ 2 ສະຫາຍ. ຕີລາຄາປະເພດຄະນະພັກກອງບັນຊາການປ້ອງກັນທີ່ຕັ້ງເປັນປະເພດເຂັ້ມແຂງ ແລະ ຕີລາຄາຄັດເລືອກໜ່ວຍພັກປອດໃສ,ເຂັ້ມແຂງ ປະຈຳປີ 2018 ມີ 11 ໜ່ວຍພັກ, ກົມກອງແຂງ-ໜ່ວຍພັກແຂງມີ 5 ໜ່ວຍພັກ-ໜ່ວຍພັກກາງມີ 2 ໜ່ວຍພັກ ແລະ ໃນນີ້ມີສອງໜ່ວຍພັກໄດ້ຮັບທຸງໄຊ 5 ປີ ຕິດຕໍ່ກັນຄື: ໜ່ວຍພັກຮາກຖານຫ້ອງພະລາທິການ ແລະ ໜ່ວຍພັກສຳນັກກອງພັນ 205.

ພ້ອມນີ້ຍັງໄດ້ມອບໃບຢັ້ງຢືນໜ່ວຍພັກປອດໃສ,ເຂັ້ມແຂງ,ໜັກແໜ້ນ ແລະ ທຸງໄຊ ໃຫ້ບັນດາໜ່ວຍພັກ, ຄະນະພັກຮາກຖານກົມກອງອ້ອມຂ້າງກອງບັນຊາການປ້ອງກັນທີ່ຕັ້ງ ເຊິ່ງໃຫ້ກຽດມອບໂດຍ ພົນຕີ ວັນທອງ ກອງມະນີ ຄະນະປະຈຳພັກກະຊວງ, ເລຂາຄະນະພັກກົມໃຫ່ຍ, ຫົວໜ້າກົມໃຫ່ຍການເມືອງປ້ອງກັນຄວາມສະຫງົບ.

Off

Comments are closed.