03rd Jul2019

ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນຢ້ຽມຢາມ ກອງບັນຊາການ ປກສ ແຂວງ

by somchan

ໃນວັນທີ 2 ກໍລະກົດ 2019 ນີ້ ທ່ານ ທອງພັນ ສິດທິດຳພາ ເຈົ້າແຂວງໆວຽງຈັນ ໄດ້ເຄື່ອນໄຫວຢ້ຽມຢາມ ກອງບັນຊາການ ປກສ ແຂວງ ໃຫ້ກຽດຕ້ອນຮັບ ພົຈວ ປອ ທອງເຄນ ບຸນໝັ້ນ ຫົວໜ້າກອງບັນຊາການ ປກສ ແຂວງ ວຽງຈັນ ມີຄະນະພັກ-ຄະນະບັນຊາການ, ມີຄະນະຫ້ອງ, ກອງພັນ, ຄ້າຍຄຸມດັດສ້າງ, ກອງບັນຊາການ ປກສ ເມືອງ 11 ເມືອງພ້ອມພະນັກງານກ່ຽວຂ້ອງເຂົ້າຮ່ວມ.

ພົຈວ ປອ ທອງເຄນ ບຸນໝັ້ນ ຫົວໜ້າກອງບັນຊາການ ປກສ ແຂວງວຽງຈັນ ໄດ້ລາຍງານສະພາບຈຸດພິເສດ, ທີ່ຕັ້ງ ແລະ ການຈັດຕັ້ງປະຕິບັດໜ້າທີວຽກງານວິຊາສະເພາະໃນໄລຍະຜ່ານມາ ທີ່ພົວພັນເຖີງວຽກງານປ້ອງກັນຄວາມສະຫງົບຢູ່ພາຍໃນແຂວງ ເຊີ່ງໄດ້ຍົກໃຫ້ເຫັນດ້ານດີ ຜົນງານຫຼາຍດ້ານ ທີ່ພະນັກງານ-ນັກຮົບ ຍາດມາໄດ້ ແລະ ຈຸດອ່ອນຂໍ້ຄົງຄ້າງ ທີ່ຈະໄດ້ພ້ອມກັນແກ້ໄຂໃນຕໍ່ໜ້າ ໃນໄລຍະຜ່ານມາ ຄະນະພັກ-ຄະນະບັນຊາແຕ່ລະຂັ້ນ ແມ່ນໄດ້ຖືເອົາວຽກງານສືກສາອົບຮົມການເມືອງແນວຄິດ ເປັນບັນຫາສຳຄັນຕົ້ນຕໍ ຕິດພັນກັບວຽງງານປ້ອງກັນຊາດ-ປ້ອງກັນຄວາມສະຫງົບ ຕັ້ງໜ້າຫັນເອົາພະນັກງານນັກຮົບ ລົງກໍ່ສ້າງຮາກຖານການເມືອງປະຈຳຢູ່ກຸ່ມບ້ານ ເອົາໃຈໃສ່ປ້ອງກັນສະກັດກັ້ນ ແລະ ແກ້ໄຂປະກົດການຫຍໍ້ທໍ່ທີເກີດຂື້ນ ໃນແຕ່ລະເມືອງຢ່າງຕັ້ງໜ້າ ແລະ ໃຫ້ນັບມື້ລຸດໜ້ອຍຖອຍລົງເທື່ອລະກ້າວ ເຮັດໃຫ້ພື້ນທີ່ຂອງແຕ່ເມືອງມີຄວາມສະຫງົບປອດໄພໂດຍພື້ນຖານ, ສັງຄົມມີຄວາມເປັນລະບຽບຮຽບຮ້ອຍດີ, ການພັດທະນາເສດຖະກິດ-ສັງຄົມ ຂອງແຕ່ລະເມືອງ ເຕີບໃຫ່ຍຂະຫຍາຍຕົວຢ່າງຕໍ່ເນື່ອງ ນອກນີ້ຍັງເຮັດໃຫ້ຊີວິດການເປັນຢູ່ຂອງປະຊາຊົນມີຖ່ວງທ່າດີຂື້ນກ່ວາເກົ່າ.

ຈາກນັ້ນ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ ໄດ້ໂອລົມ ແລະ ຊີ້ນຳວຽກງານປ້ອງກັນຄວາມສະຫງົບແຂວງວຽງຈັນ ເຊີ່ງກ່ອນອື່ນ ທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານທີ່ ຄະນະພັກ-ຄະນະບັນຊາ ປກສ ແຂວງວຽງຈັນ ພະນັກງານນັກຮົບສາມາດຍາດມາໄດ້ໃນໄລຍະຜ່ານມາ ພ້ອມນັ້ນທ່ານຍັງໄດ້ຍົກໃຫ້ເຫັນສະພາບການຂອງໂລກ, ຂອງພາກພື້ນ, ຂອງປະເທດ ແລະ ພາຍໃນແຂວງວຽງຈັນ ທີ່ມີການຜັນແປຢ່າງສັບສົນ ພ້ອມນັ້ນ ທ່ານ ຈື່ງໄດ້ຮຽກຮ້ອງໃຫ້ກຳລັງປ້ອງກັນຄວາມສະຫງົບ ແຂວງວຽງຈັນຕ້ອງໄດ້ ຢຶດໝັ້ນຕໍ່ອຸດົມການຂອງພັກ, ຈຳແນກໄດ້ມິດ ແລະ ສັດຕູຢ່າງຈະແຈ້ງ ຕ້ອງເອົາໃຈໃສ່ຕໍ່ວຽກງານສືກສາອົບຮົມການເມືອງແນວຄິດໃຫ້ແກ່ພະນັກງານ-ນັກຮົບ ຢ່າງເປັນປົກກະຕິ, ສ້າງຄວາມສາມັກຄີພາຍໃນຢ່າງແໜ້ນແຟ້ນ, ຕ້ອງມີຄວາມສະດຸ້ງໄວ, ເອົາໃຈໃສ່ປັບປຸງແບບແຜນວິທີເຮັດວຽກ, ແບບແຜນວິທີນຳພາໃຫ້ສອດຄ່ອງກັບຕົວຈິງ, ເຮັດວຽກຕາມລະບອບລວມສູນ ປະຊາທິປະໄຕ ໂດຍຖືເອົາການຄົ້ນຄ້ວາປືກສາຫາລືຕົກລົງບັນຫາເປັນໝູ່ຄະນະ, ມອບວຽກໃຫ້ບຸກຄົນຮັບຜິດຊອບ, ມີການສຳຫຼວດກວດກາຢ່າງເປັນປົກກະຕິ, ສ່ຽງສ່ວນນ້ອຍຕ້ອງຂື້ນກັບສຽງສ່ວນຫຼາຍ, ພ້ອມນັ້ນຄະນະພັກ-ຄະນະບັນຊາ ແຕ່ລະຂັ້ນຕ້ອງເປັນແບບຢ່າງທີດີໃຫ້ພະນັກງານ-ນັກຮົບ ມີຄຸນທາດການເມືອງໜັກແໜ້ນ, ມີທັດສະນະຄຸນສົມບັດດີ, ທັງເປັນທີ່ຍອມຮັບຂອງປະຊາຊົນ, ເພື່ອຜົນປະໂຫຍດຂອງປະຊາຊົນ ແລະ ຮັບໃຊ້ປະຊາຊົນຢ່າງແທ້ຈິງ ພ້ອມກັນສືບຕໍ່ຊີ້ນຳ-ນຳພາພະນັກງານ-ນັກຮົບ ຂອງຕົນເອົາໃຈໃສ່ຕໍ່ວຽກງານສະກັດກັ້ນ ແລະ ແກ້ໄຂປະກົດການຫຍໍ້ທໍ້ທີເກີດຂື້ນໃນສັງຄົມໃຫ້ໄດ້ຮັບຜົນສຳເລັດ ແລະ ມີຜົນງານຍິ່ງໃຫ່ຍຂື້ນກ່ວາເກົ່າ.

Off

Comments are closed.