16th Jul2019

ລມຕ ກະຊວງ ປກສ ສຳເລັດການເຄື່ອນໄຫວ ແລະ ຊີ້ນຳວຽກງານຢູ່ ກອງບັນຊາການ ປກສ ແຂວງຊຽງຂວາງ ແລະ ປກສ ແຂວງ ຫົວພັນ.

by somchan

ໃນວັນທີ 9-13 ກໍລະກົດ 2019 ພົນໂທ ວິໄລ ຫຼ້າຄຳຟອງ ເລຂາທິການສູງກາງພັກ ລັດຖະມົນຕີກະຊວງ ປກສ ໄດ້ເຄື່ອນໄຫວພົບປະ ແລະ ຊີ້ນຳວຽກງານວິຊາສະເພາະຢູ່ ກອງບັນຊາການ ປກສ ແຂວງຊຽງຂວາງ ແລະ ກອງບັນຊາການ ປກສ ແຂວງຫົວພັນ.

ໂອກາດທີ່ ລັດຖະມົນຕີກະຊວງ ປກສ ເຄື່ອນໄຫວຢູ່ 2 ກອງບັນຊາການ ປກສ ແຂວງພາກເໜືອ ຄັ້ງນີ້ໄດ້ຮັບຟັງການລາຍງານສະພາບການຈັດຕັ້ງ, ການເຄື່ອນໄຫວວຽກງານວິຊາສະເພາະ, ການແກ້ໄຂປະກົດການ ຫຍໍ້ທໍ້ຢູ່ພາຍໃນແຂວງເປັນຕົ້ນແມ່ນ, ບັນຫາຂີ້ລັກ-ງັດແງະ, ປຸ້ນຈີ້ຊິງຊັບ, ບັນຫາຢາເສບຕິດ ແລະ ບັນຫາອື່ນໆ ທີ່ເຮັດໃຫ້ສັງຄົມບໍ່ມີຄວາມສະຫງົບ, ເຊິ່ງໄລຍະຜ່ານມາ ກອງບັນຊາການ ປກສ ແຂວງຊຽງຂວາງ ແລະ  ປກສ ແຂວງຫົວພັນ.ກໍ່ສາມາດແກ້ໄຂໄດ້ຫຼາຍກໍລະນີ ດຳເນີນຄະດີຕໍ່ຜູ້ທີ່ເຄື່ອນໄຫວກະທຳຜິດ ຕາມຂັ້ນຕອນຂອງກົດໝາຍ ເຮັດໃຫ້ສອງແຂວງມີຄວາມສະຫງົບ ມີຄວາມເປັນລະບຽບຮຽບຮ້ອຍໂດຍພື້ນຖານ.

ພົນໂທ ວິໄລ ຫຼ້າຄຳຟອງ ເລຂາທິການສູງກາງພັກ ລັດຖະມົນຕີກະຊວງ ປກສ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ຜົນສຳເລັດ ທີ່ຄະນະພັກ-ຄະນະບັນຊາ ພະນັກງານນັບຮົບທັງສອງກອງບັນຊາການ ຍາດມາໄດ້ໃນໄລຍະຜ່ານມາ ພ້ອມນັ້ນທ່ານໄດ້ເນັ້ນໜັກ ໃຫ້ຄະນະພັກ-ຄະນະບັນຊາ ພະນັກງານ-ນັກຮົບທຸກສະຫາຍສືບຕໍ່ເສີມຂະຫຍາຍດ້ານດີ-ຜົນງານ ທີ່ເປັນມູນເຊື້ອ ແລະ ເພີ່ມທະວີປັບປຸງແກ້ໄຂ ຂໍ້ບົກຜ່ອງທີ່ເປັນບັນຫາຫຍໍ້ທໍ້ໃຫ້ໝົດໄປ, ເອົາໃຈໃສ່ສຶກສາອົບຮົມພະນັກງານ-ນັກຮົບໃຫ້ມີຄວາມໜັກແໜ້ນທາງດ້ານການເມືອງແນວຄິດ, ເຂັ້ມແຂງທາງດ້ານການຈັດຕັ້ງ ມີທັດສະນະຄຸນສົມບັດ, ມີລະບຽບວິໄນທີ່ເຂັ້ມງວດ, ເຊື່ອໜັ້ນຕໍ່ການນຳພາຂອງພັກ, ມີຄວາມສາມັກຄີໃຫ້ແໜ້ນແຟ້ນ, ມີແບບແຜນໃນການເຄື່ອນໄຫວວິຊາສະເພາະໃຫ້ຖືກຕ້ອງຕາມກົດໝາຍ, ສຸມໃສ່ແກ້ໄຂປະກົດການຫຍໍ້ທໍ້ຢູ່ໃນກຳລັງໃຫ້ໝົດໄປ, ຕ້ານ ແລະ ສະກັດກັ້ນການສໍ້ລາດບັງຫຼວງ ການສວຍໃຊ້ໜ້າທີ່ຕຳແໜ່ງໃນທາງທີ່ບໍ່ຖືກຕ້ອງໃຫ້ເດັດຂາດ ຫັນພະນັກງານລົງກໍ່ສ້າງຮາກຖານ ປຸກລະດົມປະຊາຊົນໃຫ້ເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ເພື່ອສະກັດກັ້ນ ແກ້ໄຂບັນດາໜໍ່ແໜງທີ່ສ້າງຄວາມບໍ່ສະຫງົບທາງດ້ານການເມືອງ ຄວາມບໍ່ເປັນລະບຽບຮຽບທາງສັງຄົມ ເປັນຕົ້ນແມ່ນບັນຫາຢາເສບຕິດ, ສໍ້ໂກງຊັບ, ລັກຊັບ, ອຸປະຕິເຫດຕາມຖະໜົນ ແລະ ບັນຫາອື່ນໆໃຫ້ຫຼຸດລົງເທື່ອລະກ້າວ.

Off

Comments are closed.