17th Jul2019

ລມຕ ພົບປະຢ້ຽມຢາມກອງບັນຊາການປ້ອງກັນທີ່ຕັ້ງ ປກສ

by somchan

ພົນໂທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫງົບ ພ້ອມດ້ວຍຄະນະ ໄດ້ລົງພົບປະຢ້ຽມຢາມກອງບັນຊາການ ປ້ອງກັນທີ່ຕັ້ງ ກະຊວງປ້ອງກັນຄວາມສະຫງົບ ໃນວັນທີ 17 ກໍລະກົດ 2019 ນີ້ ໂດຍການຕ້ອນຮັບຂອງ ພົນຈັດຕະວາ ບົວພັນ ຍໍລະວົງສາ ຫົວໜ້າກອງບັນຊາການປ້ອງກັນທີ່ຕັ້ງ ພ້ອມດ້ວຍຄະນະພັກ-ຄະນະບັນຊາ ແລະ ພະນັກງານນັກຮົບ.

ພົນຈັດຕະວາ ບົວພັນ ຍໍລະວົງສາ ຫົວໜ້າກອງບັນຊາການປ້ອງກັນທີ່ຕັ້ງ ໄດ້ລາຍງານການຈັດຕັ້ງຊີ້ນຳ-ນຳພາເຄື່ອນໄຫວເຮັດວຽກງານວິຊາສະເພາະ ໃນໄລຍະຜ່ານມາ ຂອງຄະນະພັກ-ຄະນະບັນຊາແຕ່ລະຂັ້ນ ຕະຫຼອດຮອດພະນັກງານ-ນັກຮົບ ພາຍໃນກອງບັນຊາການປ້ອງກັນທີ່ຕັ້ງ, ໂດຍສະເພາະແມ່ນປະຕິບັດໜ້າທີ່ວຽກງານໃນການປ້ອງກັນສຳນັກງານ, ຫ້ອງການ, ສະຖານທີ່ສຳຄັນຕ່າງໆຂອງພັກ-ລັດ, ອົງການຈັດຕັ້ງສາກົນ ແມ່ນຮັບປະກັນມີຄວາມສະຫົງບປອດໄພເປັນຢ່າງດີ.

ໂອກາດນີ້ ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການເຄື່ອນໄຫວໃນໄລຍະຜ່ານມາ ພ້ອມທັງໄດ້ເໜັ້ນໜັກໃຫ້ຄະນະພັກ, ຄະນະບັນຊາແຕ່ລະຂັ້ນ ຈົ່ງເພີ່ມທະວີບົດບາດການນຳພາ-ບັນຊາ ໃຫ້ເປັນແບບຢ່າງແກ່ສະມາຊິກພັກ ພະນັກງານ-ນັກຮົບ. ພ້ອມທັງເອົາໃຈໃສ່ພັດທະນາກົມກອງ ກຳລັງພົນຂອງຕົນຢ່າງຮອບດ້ານ ເປັນຕົ້ນແມ່ນທາງດ້ານການເມືອງແນວຄິດ ການຄຸ້ມຄອງບັນຊາກຳລັງພົນກຽມພ້ອມສູ້ຮົບ, ປັບປຸງແບບແຜນວິທີເຮັດວຽກໃຫ້ມີຄວາມສະດວກວ່ອງໄວ ແລະ ທັນກັບສະພາບການຕົວຈິງ, ສ້າງໃຫ້ໄດ້ພະນັກງານ-ນັກຮົບຜູ້ທີ່ມີຄວາມຮູ້-ຄວາມສາມາດໃນການເຮັດວຽກງານວິຊາສະເພາະຕົວຈິງ ເປັນຜູ້ທີ່ມີລະບຽບວິໄນເຂັ້ມງວດ,​ ມີນ້ຳໃຈເສຍສະຫຼະອັນສູງສົ່ງ, ເພື່ອສ້າງໃຫ້ກຳລັງປ້ອງກັນທີ່ຕັ້ງ ກໍ່ຄື ກຳລັງປ້ອງກັນຄວາມສະຫງົບ ກາຍເປັນກຳລັງທີ່ເຂັ້ມແຂງ, ໜັກແໜ້ນ, ເດັດດ່ຽວ ແລະ ທັນສະໄໝ ສາມາດຕອບຕ້ານທຸກການເຄື່ອນໄຫວມ້າງເພຂອງກຸ່ມຄົນບໍ່ດີ, ເປັນກຳລັງປະກອບອາວຸດ ທີ່ໄດ້ຮັບຄວາມໄວເນື້ອເຊື້ອໃຈຂອງພັກ-ລັດ ແລະ ເປັນທີ່ເຄົາລົບຮັກຂອງປະຊາຊົນບັນດາເຜົ່າ.

Off

Comments are closed.