26th Jul2019

ມອບຂອງກາງຢາໄອສ໌ 4,2 ກິໂລກຼາມ ໃຫ້ເຈົ້າໜ້າທີ່ ປກສ ດຳເນີນຄະດີ

by somchan

ເຈົ້າໜ້າທີ່ພາສີປະຈຳດ່ານສາກົນສະໜາມບິນ ວັດໄຕ ໄດ້ມອບຢາເສບຕິດປະເພດຢາໄອສ໌ (ICE) ທີ່ຢຶດໄດ້ຈາກການກວດຄົ້ນກະເປົາເດີນທາງ ຂອງຊາວ ກຳປູເຈຍ ນ້ຳໜັກ 4,2 ກິໂລກຼາມ ໃຫ້ກົມຕຳຫຼວດສະກັດກັ້ນ ແລະ ຕ້ານຢາເສບຕິດ ກົມໃຫ່ຍຕຳຫຼວດກະຊວງ ປກສ ໃນວັນທີ 18 ກໍລະກົດນີ້ ເພື່ອເປັນຫຼັກຖານໄປດຳເນີນຄະດີກັບຜູ້ຖືກຫາ ທີ່ເຈົ້າໜ້າທີ່ຕຳຫຼວດວິຊາສະເພາະພວມດຳເນີນ ການສືບສວນ-ສອບສວນ. ມອບໂດຍ ທ່ານ ວິດາວອນ ໂສມສະເຫຼົາ ຮອງຫົວໜ້າດ່ານພາສີສາກົນສະໜາມບິນວັດໄຕ ແລະ ຕາງໜ້າຮັບແມ່ນເຈົ້າໜ້າທີ່ກົມຕຳຫຼວດສະກັດກັ້ນ ແລະ ຕ້ານຢາເສບຕິດ ກົມໃຫ່ຍຕຳຫຼວດ ກະຊວງ ປກສ, ມີພະນັກງານຫຼັກແຫຼ່ງທີ່ກ່ຽວຂ້ອງເຂົ້າຮ່ວມ.

ຢາເສບຕິດປະເພດຢາໄອສ໌ຈຳນວນດັ່ງກ່າວ, ແມ່ນເຈົ້າໜ້າທີ່ພາສີ ປະຈຳດ່ານສາກົນສະໜາມບິນວັດໄຕ ຢຶດໄດ້ຈາກການກວດຄົ້ນສິນຄ້າເຄື່ອງຂອງປະເພດເກືອດຫ້າມ ແລະ ຈັບກຸມຜູ້ຖືກຫາໄດ້ໃນວັນທີ 30 ພຶດສະພາ 2019 ໃນເວລາ 10:10 ໂມງ ເຊິ່ງຜູ້ຖືກຫາຊື່ Ms Sen Sopheap ສັນຊາດ ກຳປູເຈຍ ຖືໜັງສືປັດສະປອດເລກທີ N1715164 ລົງວັນທີ 11 ມິຖຸນາ 2014 ຜູ້ກ່ຽວຈະເດີນທາງໄປຕ່າງປະເທດນຳຖ້ຽວບິນ WE573 Vientiane-Bangkok ແລ້ວຕໍ່ຍົນໄປມາເລເຊຍຖ້ຽວບິນ TG 624Bangkok-Manila ໄດ້ນຳກະເປົາເຄື່ອງນຸ່ງຫົ່ມມາແຈ້ງຕໍ່ເຈົ້າໜ້າທີ່ປະຈຳສະໜາມບິນ, ເມື່ອເຈົ້າໜ້າທີ່ນຳກະເປົາໄປສະແກນເຫັນວ່າ ໃນກະເປົາດັ່ງກ່າວມີວັດຖຸທີ່ສົງໄສ, ຈຶ່ງໄດ້ປະສານຫາເຈົ້າໜ້າທີ່ພາສີ, ໜ່ວຍງານກວດກາ, ຕຳຫຼວດທີ່ຕັ້ງປະຈຳດ່ານກວດຄົ້ນກະເປົາດັ່ງກ່າວ ຈາກການກວດຄົ້ນຕົວຈິງພົບເຫັນຢາເສບຕິດ ປະເພດຢາໄອສ໌ (ICE) ທີ່ຊຸກເຊື່ອງໃນກະເປົາເດີນທາງຈຳນວນ 1 ຫໍ່ ລວມນໍ້າໜັກ 4,2 ກິໂລກຼາມ.

ດັ່ງນັ້ນ, ເຈົ້າໜ້າທີ່ພາສີ ແລະ ເຈົ້າໜ້າທີ່ຕຳຫຼວດ ຈຶ່ງຢຶດຢາໄອສ໌ ແລະ ຈັບກຸມຜູ້ຖືກຫາມອບໃຫ້ເຈົ້າໜ້າທີ່ ປກສ ໄປດຳເນີນຄະດີຕາມລະບຽບກົດໝາຍ.

Off

Comments are closed.