26th Jul2019

ຢຶດຢາໄອສ໌ 99 ກິໂລກຼາມ ຢູ່ເສັ້ນທາງຕັດໃໝ່ເຂດບ້ານໜອງພະຍາ

by somchan

ໃນວັນທີ 24 ກໍລະກົດ 2019 ກົມຕຳຫຼວດສະກັດກັ້ນ ແລະ ຕ້ານຢາເສບຕິດ ກົມໃຫ່ຍຕຳຫຼວດກະຊວງ ປກສ ໄດ້ນຳກຳລັງເຂົ້າຈັບກຸ່ມແກ້ງ ຄ້າຂາຍຢາເສບຕິດລາຍໃຫ່ຍ ຢູ່ເສັ້ນທາງຕັດໃຫ່ມ ໄປໂຮງໝໍແມ່ ແລະ ເດັກ ເຂດບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ພາຍຫຼັງຕິດຕາມມາໄດ້ເດືອນກວ່າ ສາມາດຈັບຕົວຜູ້ກະທຳຜິດໄດ້ 4 ຄົນ ພ້ອມຂອງກາງຢາເສບຕິດປະເພດຢາໄອສ໌ 99 ກິໂລກຼາມ.

ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດໃຫ້ຮູ້ວ່າ: ຄະດີດັ່ງກ່າວແມ່ນໄດ້ຕິດຕາມມາໄດ້ໄລຍະໜຶ່ງແລ້ວ, ເຊິ່ງໄດ້ຮັບລາຍງານຈາກແຫຼ່ງຂ່າວແຕ່ວັນທີ 20 ມິຖຸນາ 2019ວ່າ: ຈະມີກຸ່ມຄົນບໍ່ດີຈຳນວນໜຶ່ງນັດຊື້-ຂາຍຢາເສບຕິດຈຳນວນຫຼາຍ ຢູ່ເສັ້ນທາງເຂດບ້ານໜອງພະຍາ ຈາກນັ້ນຈຶ່ງຈັດກຳລັງຕຳຫຼວດວິຊາສະເພາະຕິດຕາມກຸ່ມເປົ້າໝາຍດັ່ງກ່າວ. ຜ່ານການຕິດຕາມຮອດວັນທີ 24 ກໍລະກົດ 2019 ຈຶ່ງພົບເຫັນກຸ່ມເປົ້າໝາຍຂັບຂີ່ລົດໃຫ່ຍ 2 ຄັນ ມາຈອດຢູ່ເສັ້ນທາງຕັດໃຫ່ມໄປໂຮງໝໍແມ່ ແລະ ເດັກ ເຂດບ້ານໜອງພະຍາ ຈຶ່ງກະຈາຍກຳລັງເຂົ້າຈັບ ພ້ອມທັງກວດຄົ້ນພົບເຫັນຢາໄອສ໌ຈຳນວນ 99 ຖົງ ນ້ຳໜັກ 99 ກິໂລກຼາມ, ໂທລະສັບ 7 ເຄື່ອງ, ລົດໃຫ່ຍ 2 ຄັນ ແລະ ປືນສັ້ນ 1 ກະບອກ ພ້ອມລູກກະສຸນຈຳນວນໜຶ່ງ ພ້ອມກັກຕົວຜູ້ຖືກຫາ 4 ຄົນ ຜູ້ຖືກຫາຊື່: ທ້າວ ພອນໄຊ ອາຍຸ 22 ປີ ຢູ່ບ້ານນາໄຊ ເມືອງໄຊເສດຖາ, ທ້າວ ວັນທອງເຮີ ອາຍຸ 27 ປີ ຢູ່ບ້ານໜອງສອງຫ້ອງ, ທ້າວ ລຸລາທໍ ອາຍຸ 22 ປີ ພັກເຊົາຢູ່ບ້ານ ຕານມີໄຊ ເມືອງໄຊທານີ ທັງສາມຄົນ ຢູ່ນະຄອນຫຼວງວຽງຈັນ ແລະ ທ້າວ ອາດຸມ ຫຼື ຕູທໍ່ ອາຍຸ 40 ປີ ເຊື້ອຊາດ ແລະ ສັນຊາດໄທ, ຢູ່ປັດຈຸບັນບ້ານ ຫ້ວຍແລ້ງ ເມືອງວຽງແກ່ນ ຈັງຫວັດຊຽງລາຍປະເທດໄທ.

ຜ່ານການສອບສວນເບື່ອງຕົ້ນພວກກ່ຽວຮັບສາລະພາບວ່າ: ຢາເສບຕິດຈຳນວນດັ່ງກ່າວແມ່ນຂອງພວກກ່ຽວແທ້. ໄດ້ຊື້ມາຈາກກຸ່ມແກ້ງຮ່ວມຂະບວນການດຽວກັນ ເພື່ອຈະເອົາໄປສົ່ງໃຫ້ຜູ້ສັ່ງຊື້ເຊິ່ງນັດກັນຢູ່ແຄມທາງ ເຂດບ້ານໜອງພະຍາ ພໍໄປຮອດກໍ່ຖືກເຈົ້າໜ້າທີ່ຈັບຕົວກ່ອນ ພ້ອມຂອງກາງຢາໄອສ໌ຈຳນວນດັ່ງກ່າວ.

Off

Comments are closed.