20th Sep2019

ລົງນາມສັນຍາຮ່ວມມືພັດທະນາ ລະບົບກວດກາຂໍ້ມູນຜູ້ໂດຍສານລ່ວງໜ້າ

by somchan

ພິທີລົງນາມສັນຍາຮ່ວມມື ພັດທະນາລະບົບກວດກາຂໍ້ມູນ ຜູ້ໂດຍສານລ່ວງໜ້າ ແລະ ລະບົບບັນທຶກຂໍ້ມູນຜູ້ໂດຍສານ ກ່ອນຂຶ້ນເຮືອບິນ ລະຫວ່າງກົມໃຫ່ຍສັນຕິບານ ກະຊວງ ປກສ ລາວ ກັບບໍລິສັດ ໂສມາພາ ອິນພໍມໍຊັນ ເຕັກໂນໂລຊີ (ລາວ) ຈຳກັດ ແລະ ບໍລິສັດເອັຣບີແລັບ 856 ຈຳກັດ ໄດ້ຈັດຂຶ້ນໃນວັນທີ 19 ກັນຍາ 2019 ນີ້ ທີ່ໂຮງແຮມຄາວພາຊາ ນະຄອນຫຼວງວຽງຈັນ ໂດຍການເປັນກຽດເຂົ້າຮ່ວມ ແລະ ເປັນສັກຂີພະຍານຂອງ ພົທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫງົບ ມີບັນດາຮອງລັດຖະມົນຕີ ບັນດາກົມໃຫ່ຍ, ຄະນະກົມຕຳຫຼວດ ກວດຄົນເຂົ້າ-ອອກເມືອງ, 2 ບໍລິສັດ ແລະ ແຂກຖືກເຊີນເຂົ້າຮ່ວມ.

ຈຸດປະສົງໃນການລົງນາມສັນຍາຮ່ວມມື ພັດທະນາລະບົບກວດກາຂໍ້ມູນ ຜູ້ໂດຍສານລວງໜ້າກ່ອນຂຶ້ນເຮືອບິນ APPS ແລະ ລະບົບບັນທຶກຂໍ້ມູນຜູ້ໂດຍສານ PNR ໃນຄັ້ງນີ້, ແມ່ນເພື່ອໃຫ້ວຽກງານກວດກາຄົນເຂົ້າ-ອອກເມືອງ ມີຄວາມສະດວກ ແລະ ເປັນລະບົບມາດຖານສາກົນ ຂອງອົງການການບິນພົນລະເຮືອສາກົນວາງອອກ ດັ່ງນັ້ນກົມໃຫ່ຍສັນຕິບານ ກະຊວງ ປກສ ລາວ ຈຶ່ງໄດ້ຮ່ວມມືກັບບໍລິສັດ ໂສມາພາ ອິນພໍເມຊັນ ເຕັກໂນໂລຊີ ລາວ ແລະ ບໍລິສັດ ເອັຣບີແລັບ 856 ຈຳກັດ ລົງນາມຮ່ວມມືໂຄງການ ກວດຂໍ້ມູນຜູ້ໂດຍສານລ່ວງໜ້າ ແລະ ລະບົບບັນທຶກ ຂໍ້ມູນຜູ້ໂດຍສານ, ເພື່ອຊ່ວຍໃຫ້ວຽກງານກວດກາຄົນເຂົ້າ-ອອກເມືອງ ໄດ້ຮັບການພັດທະນາດີຂຶ້ນ ຮັບປະກັນໄດ້ຄວາມສະດວກ, ຄ່ອງຕົວ, ຮັດກຸມຖືກຕ້ອງ ຕາມລະບຽບການ ແລະ ກົດໝາຍ ຂອງປະເທດກໍ່ຄືສາກົນ, ເຊິ່ງທຸກປະເທດໃນໂລກໄດ້ຫັນເອົາ ລະບົບນີ້ມາໃຊ້ເຂົ້າໃນການກວດກາ ແລະ ມີມາດຕະການສະກັດກັ້ນແຕ່ຕົ້ນທາງ, ທັງເປັນການຍົກລະດັບໃຫ້ແກ່ກຳລັງ ປກສ ມີຄວາມຮູ້ຄວາມສາມາດ ໃນການປະຕິບັດໜ້າທີ່ວຽກງານ ເພື່ອຮັບປະກັນໃນການປົກປ້ອງສິດ ຜົນປະໂຫຍດຂອງປະຊາຊົນລາວ ກໍ່ຄືເພື່ອນມິດສາກົນໃນທົ່ວໂລກ ທີ່ເດີນທາງມາທ່ອງທ່ຽວ, ຢ້ຽມຢາມ, ຜ່ານ ແລະ ດຳເນີນທຸລະກິດຢູ່ ສປປ ລາວ ໃຫ້ມີຄວາມສະດວກ ແລະ ປອດໄພ.

ໃນພິທີລົງນາມສັນຍາຄັ້ງນີ້ ຕ່າງໜ້າຝ່າຍກະຊວງ ປກສ ໂດຍ ພົຈວ ບຸນມີ ແສງຄຳຢອງ ຫົວໜ້າກົມໃຫ່ຍສັນຕິບານ ສ່ວນບໍລິສັດ ໂສພາມາ ອິນພໍເມຊັນ ເຕັກໂນໂລຊີ ລາວ ຈຳກັດ ແມ່ນ ທ່ານ ຄັວນຕິພົງ ດວນສະຫວັນ ແລະ ບໍລິສັດ ເອັຣບີແລັບ 856 ຈຳກັດ ແມ່ນ ທ່ານ ນາງ ສົມຈິດ ພົມມະທັນສີ ປະທານ ຂອງທັງສອງບໍລິສັດເປັນຜູ້ລົງນາມ.

Off

Comments are closed.