24th Sep2019

ກັກຕົວພວກຂົນສົ່ງ ຢາເສບຕິດ ພົບຂອງກາງ 500kg

by somchan

ເຈົ້າໜ້າທີ່ຕຳຫຼວດ ປກສ ແຂວງ ວຽງຈັນ ໃຫ້ຮູ້ວ່າ: ພາຍຫຼັງເຈົ້າໜ້າທີ່ໄດ້ຮັບຂໍ້ມູນຂ່າວຈາກ ພົນລະເມືອງດີວ່າ: ມີຄົນບໍ່ດີເຄື່ອນໄຫວຮັບ-ສົ່ງຢາເສບຕິດປະເພດ ຢາໄອສ໌ ແລະ ຢາເຄຈາກເມືອງຫ້ວຍຊາຍ ແຂວງບໍ່ແກ້ວ ກຳລັງເດີນທາງມຸ່ງໜ້າມາ ນະຄອນຫຼວງວຽງຈັນ ເພື່ອສົ່ງໃຫ້ເພື່ອນຮ່ວມຂະບວນການທີ່ນະຄອນຫຼວງວຽງຈັນ

ສະນັ້ນໃນວັນທີ 10 ສິງຫາ 2019 ຜ່ານມານີ້ ເຈົ້າໜ້າທີ່ຕຳຫຼວດພະແນກສະກັດກັ້ນ ແລະຕ້ານຢາເສບຕິດ ກອງບັນຊາການ ປກສ ແຂວງວຽງຈັນ ໄດ້ປະສານສົບທົບກັບ ກົມຕຳຫຼວດສະກັດກັ້ນ ແລະ ຕ້ານຢາເສບຕິດ, ເຈົ້າໜ້າທີ່ ປກສ ເມືອງວັງວຽງ ແລະ ປກສ ເມືອງກາສີ ລົງເຄື່ອນໄຫວເຮັດວຽກງານວິຊາສະເພາະ ຕິດຕາມລົດເປົ້າໝາຍ ຄ້າ-ຂາຍຢາເສບຕິດ ຢູ່ຂອບເຂດເມືອງກາສີ ແຂວງວຽງຈັນ ແລ້ວໄດ້ເຂົ້າກວດຄົ້ນລົດເປົ້າໝາຍຍີ່ຫໍ້ TOYOTA PRADO ໝາຍເລກທະບຽນ 7999 ກຳແພງນະຄອນ ຜ່ານການກວດຄົ້ນລົດແມ່ນໄດ້ພົບເຫັນຂອງກາງຢາໄອສ໌ ຈຳນວນ 198 Kg, ແລະ ຢາເຄ ຈຳນວນ 302 Kg ລວມນ້ຳໜັກຢາທັງໝົດ 500 Kg ສາມາດຈັບຕົວເປົ້າໝາຍ ໄດ້ 2 ຄົນຄື: ທ້າວ ວົວວ່າງ ອາຍຸ 25 ປີ ອາຊີບ ຊາວນາ ຢູ່ບ້ານຈອມຈຸກ, ເມືອງຫ້ວຍຊາຍ, ແຂວງບໍ່ແກ້ວ ແລະ ທ້າວ ຈົ່ງຈົວວື່ ອາຍຸ 50 ປີ ອາຊີບຊາວນາ ຢູ່ບ້ານ ນາໄຊ, ເມືອງຜາໄຊ, ແຂວງຊຽງຂວາງ ເຈົ້າໜ້າທີ່ຈຶ່ງໄດ້ກັກຕົວພວກກ່ຽວທັງ 2 ຄົນ ພ້ອມດ້ວຍຂອງກາງຈຳນວນດັ່ງກ່າວ ມາດໍາເນີນການສືບສວນ-ສອບສວນ

ຜ່ານການສຶບສວນ – ສອບສວນ ຂອງເຈົ້າໜ້າທີ່ພວກກ່ຽວໄດ້ຮັບສາລະພາບວ່າ ຢາໄອສ໌ ແລະ ຢາເຄ ຈຳນວນດັ່ງກ່າວແມ່ນເປັນຂອງພວກກ່ຽວແທ້ ເຊິ່ງໄດ້ຮັບມາຈາກຜູ້ຮ່ວມຂະບວນການ ຢູ່ເມືອງຫ້ວຍຊາຍ ແຂວງບໍ່ແກ້ວ ເພື່ອຈະເອົາໄປສົ່ງໃຫ້ລູກຄ້າຢູ່ນະຄອນຫຼວງວຽງຈັນ ຖ້າຫາກວ່າສົ່ງສຳເລັດ ພວກກ່ຽວທັງສອງແມ່ນຈະໄດ້ຮັບເງີນຄ່າຈ້າງຜູ້ລະ 200,000 ບາດ(ໄທ) ແຕ່ພວກກ່ຽວຂັບຂີ່ລົດມາຮອດຂອບເຂດເມືອງກາສີ ແຂວງວຽງຈັນ ຈຶ່ງໄດ້ຖືກເຈົ້າໜ້າທີ່ເຂົ້າປິດລ້ອມພ້ອມທັງກວດຄົ້ນຈື່ງພົບເຫັນຢາເສບຕິດຈຳນວນດັ່ງກ່າວ, ເຈົ້າໜ້າທີ່ຈຶ່ງໄດ້ຈັບຕົວພວກກ່ຽວທັງສອງ ພ້ອມດ້ວຍຂອງກາງ ມາດຳເນີນຄະດີຕາມຂັ້ນຕອນຂອງກົດໝາຍ.

ປະຈຸບັນເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນພວມດຳເນີນການສືບສວນ-ສອບສວນພວກກ່ຽວທັງ 2 ຄົນ ເພື່ອຂະຫຍາຍຜົນຫາກຸ່ມແກ້ງ, ເຄືອຂ່າຍ ແລະຜູ້ຮ່ວມຂະບວນການມາລົງໂທດຕາມລະບຽບກົດໝາຍ ໃນຂັ້ນຕໍ່ໄປ.

Off

Comments are closed.