14th Oct2019

ປກສ ແຂວງໄຊຍະບູລີ ປະກາດເລື່ອນຊັ້ນໃຫ້ນາຍຕຳຫຼວດ

by somchan

ໃນວັນທີ 9 ຕຸລາ 2019 ນີ້, ກອງບັນຊາການ ປກສ ແຂວງໄຊຍະບູລີ ໄດ້ປະກາດເລື່ອນຊັ້ນໃຫ້ນາຍຕຳຫຼວດຜູ້ທີ່ມີຜົນງານ ແລະ ຮອດກຳນົດການເລື່ອນຊັ້ນ ພ້ອມທັງຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບ ແລະ ໝູ່ປະຈໍາການ ກຽມພ້ອມສູ້ຮົບ ໃນໄລຍະບຸນອອກພັນສາປະວໍລະນາ ແລະ ບຸນຊ່ວງເຮືອ ປະຈໍາປີ 2019 ຢູ່ທີ່ສະໂມສອນກອງບັນຊາການ ປກສ ແຂວງ ,ໂດຍການເປັນກຽດເຂົ້າຮ່ວມຂອງ ພັອ ຄໍາແພງ ເພັດ ຫົວໜ້າກອງບັນຊາການ ປກສ ແຂວງໄຊຍະບູລີ, ມີບັນດາຄະນະພັກ, ຄະນະບັນຊາ, ພະນັກງານຫຼັກແຫຼ່ງ ພ້ອມດ້ວຍພະນັກງານນັກຮົບເຂົ້າຮ່ວມ.

ພັທ ຄໍາສິນ ຜິວວັນາ ຫົວໜ້າຫ້ອງການເມືອງ ປກສ ແຂວງ ໄດ້ຜ່ານຂໍ້ຕົກລົງ ຂອງລັດຖະມົນຕີ ກະຊວງປ້ອງກັນຄວາມສະຫງົບ ວ່າດ້ວຍການເລື່ອນຊັ້ນໃຫ້ນາຍຕໍາຫຼວດ ຂອງກອງບັນຊາການ ປກສ ແຂວງໄຊຍະບູລີ ເພື່ອປະຕິບັດນະໂຍບາຍຂອງພັກ – ລັດ ທີ່ມີຕໍ່ນາຍຕໍາຫຼວດ ຜູ້ທີ່ມີຜົນງານສໍາເລັດໃນການປະຕິບັດໜ້າທີ່ວຽກງານ ແລະ ຄົບມາດຖານເງື່ອນໄຂຂອງການເລື່ອນຊັ້ນທີ່ກໍານົດໄວ້ໃນກົດໝາຍ ວ່າດ້ວຍກໍາລັງປ້ອງກັນຄວາມສະຫງົບ ປະຊາຊົນ ເຊິ່ງມີຜູ້ທີ່ໄດ້ຮັບການເລື່ອນຊັ້ນທັງໝົດ 72 ຄົນ ຍິງ 8 ຄົນ ໃນນີ້ເລື່ອນຊັ້ນ ຮ້ອຍເອກ ຂື້ນ ພັນຕີ 33 ຄົນ, ຮ້ອຍໂທ ຂື້ນ ຮ້ອຍເອກ 24 ຄົນ ໃຫ້ກຽດປະດັບຊັ້ນໂດຍ ພັອ ຄໍາແພງ ເພັດ ຫົວໜ້າກອງບັນຊາການ ປກສ ແຂວງ ພ້ອມນີ້ ກອງປະຊຸມຍັງໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບ ແລະ ໝູ່ປະຈໍາການ ກຽມພ້ອມສູ້ຮົບ ໃນໄລຍະບຸນອອກພັນສາປະວໍລະນາ ແລະ ບຸນຊ່ວງເຮືອ ປະຈໍາປີ 2019 ຕື່ມອີກ.

Off

Comments are closed.