15th Oct2019

ຜົນການແຂ່ງຂັນຊ່ວງເຮືອປະເພນີ ທ່າວັດຈັນປະຈຳປີ 2019

by somchan

ການແຂ່ງຂັນຊ່ວງເຮືອປະເພນີໃນງານບຸນອອກພັນສາປະວໍລະນາ ປະຈຳປີ 2019 ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ, ໃນວັນທີ 14 ຕຸລາ 2019 ນີ້ ໂດຍການໃຫ້ກຽດເຂົ້າຮ່ວມຂອງທ່ານ ສີຫຸນ ສິດທິລືໄຊ ຮອງເຈົ້າຄອງ ນະຄອນຫຼວງວຽງຈັນ, ທ່ານ ນາງ ບົວລອນ ວົງດາລາແສນ ເຈົ້າເມືອງຈັນທະບູລີ, ພ້ອມດ້ວຍການນຳພັກ-ລັດ ນະຄອນຫຼວງວຽງຈັນ ເຂົ້າຮ່ວມ.

ເຊິ່ງຜົນຂອງການແຂ່ງຂັນຊ່ວງເຮືອປະເພນີໃນງານບຸນອອກພັນສາປະວໍລະນາ ປະຈຳປີ 2019 ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ, ໃນປີນີ້ເຮືອປະເພນີຊາຍ 55 ສີພາຍຊະນະເລີດ ໄດ້ແກ່ເຮືອລີສອດປາກນ້ຳຄານ ໄດ້ຮັບເງີນລາງວັນ 16 ລ້ານກີບ ພ້ອມຂັນເງີນ 1 ໜ່ວຍ, ເຮືອປະເພນີຍິງ 55 ສີພາຍຊະນະເລີດໄດ້ແກ່ເຮືອບໍລິສັດແສງເພັດກໍ່ສ້າງ ໄດ້ຮັບເງີນລາງວັນ 16 ລ້ານກີບ ພ້ອມຂັນເງີນ 1 ໜ່ວຍ, ເຮືອສູດຊາຍຊະນະເລີດໄດ້ແກ່ເຮືອບໍລິສັດແສງເພັດກໍ່ສ້າງ ໄດ້ຮັບເງີນລາງວັນ 12 ລ້ານກີບ ພ້ອມດ້ວຍຂັນເງີນ 1 ໜ່ວຍ ແລະ ເຮືອປະເພດ 12 ສີພາຍຊະນະເລີດໄດ້ແກ່ເຮືອ ນາວາສັກສິດ ໄດ້ຮັບເງີນລາງວັນ ແລະ ຂັນເງີນ 1 ໜ່ວຍ.

ເຊິ່ງໃຫ້ກຽດມອບຂັນລາງວັນໃນຄັ້ງນີ້ ໂດຍທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ແລະ ທ່ານ ນາງ ບົວລອນ ວົງດາລາແສນ ເຈົ້າເມືອງຈັນທະບູລີ ແລະ ໃນໂອກາດນີ້ ທ່ານ ນາງ ບົວລອນ ວົງດາລາແສນ ໃນນາມເຈົ້າພາບຈັດບຸນຊ່ວງເຮືອປີນີ້ ໄດ້ມີຄຳເຫັນ ແລະ ກ່າວປິດການແຂ່ງຂັນຊ່ວງເຮືອປະເພນີໃນງານບຸນອອກພັນສາປະວໍລະນາປະຈຳປີ 2019 ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ຢ່າງເປັນທາງການ.

Off

Comments are closed.