25th Oct2019

ສະພາບນ້ຳງື່ມແຫ້ງ ເຮັດໃຫ້ການສະໜອງຜະລິດນ້ຳປະປາບໍ່ພຽງພໍ ໃນຂອບເຂດ 3 ເມືອງ.

by somchan

ລັດວິສາຫະກິດນ້ຳປະປາ ນະຄອນຫຼວງວຽງຈັນ ໄດ້ອອກແຈ້ງການເລກທີ 0353 / ນປ.ນຄ ລົງວັນທີ 23 ຕຸລາ 2019 ເຖິງພະນັກງານ, ທະຫານ-ຕຳຫຼວດ, ພໍ່-ແມ່ປະຊາຊົນ ແລະ ຫົວໜ່ວຍທຸລະກິດ ທີ່ຊົມໃຊ້ນ້ຳປະປາ ໃນເຂດນະຄອນຫຼວງວຽງຈັນ ເລື່ອງການສະໜອງນ້ຳປະປາບໍ່ພຽງພໍໃນຂອບເຂດ 3 ເມືອງຄື: ເມືອງໄຊທານີ, ເມືອງໄຊເຊດຖາ ແລະ ເມືອງຈັນທະບູລີ.

ລັດວິສາຫະກິດນ້ຳປະປາ ແລະ ພາກສ່ວນທີ່ກ່ຽວຂ້ອງ ໄດ້ເລັ່ງຕິດຕັ້ງໂປ່ມສູບນ້ຳ ເພື່ອຕອບສະໜອງໃຫ້ແກ່ໂຮງງານຜະລິດນ້ຳປະປາ ເພື່ອແກ້ໄຂບັນຫາດັ່ງກ່າວໃຫ້ໄວທີ່ສຸດ.

ຈາກການລາຍງານຂອງເຈົ້າໜ້າທີ່ນ້ຳປະປາ ໃນວັນທີ 23 ຕຸລາ 2019 ປະລິມານນ້ຳງື່ມໄດ້ເພີ່ມຂື້ນຈາກເດີມ 5 ຊັງຕີແມັດ ແຕ່ກໍ່ຍັງບໍ່ທັນພຽງພໍກັບການສະໜອງການຜະລິດນ້ຳປະປາໃຫ້ພຽງພໍ, ເນື່ອງຈາກໃນໄລຍະຜ່ານມານ້ຳງື່ມໄດ້ບົກແຫ້ງກວ່າປົກກະຕິໃນຮອບ 50 ປີ ຈາກຜົນກະທົບຂອງໄພທຳມະຊາດ, ປະຈຸບັນເຈົ້າໜ້າທີ່ນ້ຳປະປາ ແລະ ພາກສ່ວນທີ່ກ່ຽວຂ້ອງໄດ້້ປຶກສາຫາລືເພື່ອຮ່ວມກັນແກ້ໄຂການຕອບສະໜອງບັນຫານ້ຳປະປາບໍ່ພຽງພໍຢູ່ 3 ຕົວເມືອງໃຫ້ໄວທີ່ສຸດ, ໃນວັນທີ 23 ຕຸລາ ແມ່ນໄດ້ມີການຕິດຕັ້ງເຄື່ອງສູບນ້ຳ 1 ເຄື່ອງ ເພື່ອດູດນ້ຳສົ່ງໄປຈຸດຜະລິດນ້ຳຢູ່ດົງໝາກຄາຍ ເພື່ອສົ່ງນ້ຳໄປສະໜອງໃຫ້ 4 ອ່າງຫຼັກຄື: ອ່າງດົງໂດກ, ອ່າງໂພນເຄັງ, ອ່າງໂພນຕ້ອງ ແລະ ອ່າງຊຳເຄ້ ເຊິ່ງໄດ້ກວມເອົາ 3 ເມືອງທີ່ໄດ້ຮັບຜົນກະທົບໃນປະຈຸບັນ ແລະ ໃນວັນທີ 24 ຕຸລາ ກໍ່ໄດ້ມີການຕິດຕັ້ງເຄື່ອງສູບນ້ຳເພີ່ມອີກ 1 ເຄື່ອງ.

 

ໂດຍປົກກະຕິແລ້ວຄວາມອາດສາມາດຂອງເຄື່ອງສູບນ້ຳຢູ່ສະຖານທີ່ແຫ່ງນີ້ ສາມາດດູດນ້ຳໄດ້ 110,000 ແມັດກ້ອນຕໍ່ມື້ ແລະ ໂຮງງານຜະລິດນ້ຳປະປາດົງໝາກຄາຍ ສາມາດຜະລິດນ້ຳປະປາຕອບສະໜອງປະຊາຊົນໄດ້ 100,00 ແມັດກ້ອນຕໍ່ມື້.

ປະຈຸບັນໄພທຳມະຊາດເຮັດໃຫ້ແມ່ນ້ຳຫຼາຍສາຍໃນທົ່ວປະເທດບົກແຫ້ງ ໃນນັ້ນນ້ຳຂອງ ແລະ ນ້ຳງື່ມ ກໍ່ໄດ້ຮັບຜົນກະທົບເຊັ່ນດຽວກັນ ໄພທຳມະຊາດຄັ້ງນີ້ເຮັດໃຫ້ນ້ຳງື່ມແຫ້ງຫຼາຍທີ່ສຸດໃນຮອບ  50 ປີ ເຮັດໃຫ້ການຜະລິດນ້ຳປະປາເພື່ອຕອບສະໜອງການຊົມໃຊ້ພົບຄວາມຫຍຸ້ງຍາກ ເນື່ອງຈາກລະດັບນ້ຳທີ່ບົກແຫ້ງ ເຮັດໃຫ້ທໍ່ນ້ຳບໍ່ສາມາດດູດນ້ຳເຂື້ນມາຜະລິດນ້ຳໄດ້ ແລະ ຕ້ອງໄດ້ຕິດຕັ້ງເຄື່ອງສູບນ້ຳໃໝ່ ເພື່ອດູດນ້ຳໄປສະໜອງໃຫ້ແກ່ໂຮງງານຜະລິດນ້ຳປະປາ ແກ້ໄຂໃຫ້ພໍ່-ແມ່ປະຊາຊົນໄດ້ຊົມໃຊ້ນ້ຳໃນໄລຍະນີ້.

ດັ່ງນັ້ນ, ຕໍ່ກັບບັນຫາດັ່ງກ່າວຈຶ່ງຂໍແຈ້ງມາຍັງພໍ່-ແມ່ປະຊາຊົນທີ່ໄດ້ຮັບຜົນກະທົບ ໂດຍສະເພາະ 3 ເມືອງ ຮັບຮູ້-ເຂົ້າໃຈຕໍ່ກັບບັນຫາທີ່ເກີດຂື້ນ ພ້ອມທັງເປັນເຈົ້າການຊ່ວຍກັນປະຢັດນ້ຳເພື່ອໃຫ້ຜ່ານພົ້ນວິກິດໃນຄັ້ງນີ້.

Off

Comments are closed.