25th Oct2019

ກອງປະຊຸມເປີດກວ້າງຄົບຄະນະບໍລິຫານງານສະຫະພັນແມ່ຍິງ ກະຊວງ ປກສ ຄັ້ງທີ VII ສະໄໝທີ 6

by somchan

ກອງປະຊຸມເປີດກວ້າງຄົບຄະນະບໍລິຫານງານສະຫະພັນແມ່ຍິງ ກະຊວງ ປກສ ຄັ້ງທີ VII ສະໄໝທີ 6 ໄດ້ໄຂຂຶ້ນ ໃນວັນທີ 24 ຕຸລາ 2019 ນີ້. ເປັນກຽດເຂົ້າຮ່ວມໂດຍ ພົທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ, ມີຄະນະກົມໃຫຍ່, ກົມ, ກອງບັນຊາການ, 2 ວິທະຍາຄານ, 2 ບໍລິສັດ, ອົງການຈັດຕັ້ງຊາວໜຸ່ມ, ກຳມະບານ, ຕະຫຼອດຮອດຄະນະໜ່ວຍງານສະຫະພັນແມ່ຍິງກະຊວງ, ຄະນະສະຫະພັນແມ່ຍິງອ້ອມຂ້າງ ແລະ ບັນດາສະມາຊິກແມ່ຍິງເຂົ້າຮ່ວມ.

ພັອ ນາງ ວັດຊະລີ ສິດທິລືໄຊ ຄະນະບໍລິຫານງານສູນກາງ ສະຫະພັນແມ່ຍິງລາວ, ປະທານສະຫະພັນແມ່ຍິງ ກະຊວງ ປກສ ໄດ້ລາຍງານການຈັດຕັ້ງປະຕິບັດ ມະຕິກອງປະຊຸມຄົບຄະນະບໍລິຫານງານສະຫະພັນ ແມ່ຍິງ ກະຊວງ ປກສ ຄັ້ງທີ VI ສະໄໝທີ 6 , ແລະ ການຈັດຕັ້ງປະຕິບັດຂໍ້ແຂ່ງຂັນແມ່ຍິງ 3 ດີ ໄລຍະ 2 ເຊິ່ງໄດ້ຍົກໃຫ້ເຫັນດ້ານດີ-ດ້ານອ່ອນ, ຂໍ້ຄົງຄ້າງ ທີ່ຈະສືບຕໍ່ຜັນຂະຫຍາຍ, ປັບປຸງ, ແກ້ໄຂ.

ໃນໄລຍະ 3 ປີຜ່ານມາ ສະມາຊິກສະຫະພັນແມ່ຍິງ ສ່ວນຫຼາຍ, ໄດ້ຮັບການພັດທະນາຫຼາຍດ້ານຄື: ຄຸນສົມບັດ ສິນທຳປະຕິວັດ, ຄວາມຮູ້, ຄວາມສາມາດໃນດ້ານຕ່າງໆ ເຮັດໃຫ້ການຈັດຕັ້ງພັກ-ລັດ ມີຄວາມເຊື້ອໝັ້ນ, ໄດ້ຮັບການຍ້ອງຍໍ ເລື່ອນຊັ້ນ ເລື່ອນຕຳແໜ່ງ ແລະ ໄດ້ຮັບນະໂຍບາຍຕ່າງໆ ເຊິ່ງໄດ້ເປັນການປະກອບສ່ວນເຮັດໃຫ້ໜ່ວຍພັກ-ກົມກອງ ມີຄວາມເຂັ້ມແຂງ, ຄະນະສະຫະພັນແມ່ຍິງແຕ່ລະຂັ້ນ ໄດ້ຮັບການປັບປຸງແບບແຜນວິທີເຮັດວຽກ, ວິທີການນຳພາໃຫ້ມີວິທະຍາສາດ, ຮູ້ຍາດແຍ່ງເອົາການຊີ້ນຳ-ນຳພາ, ການອຳນວຍ ຄວາມສະດວກຈາກຄະນະພັກ-ຄະນະນຳ, ພົບປະແລກປ່ຽນບົດຮຽນການສະໜັບສະໜູນ ຈາກພາກສ່ວນຕ່າງໆ ເຮັດໃຫ້ການຈັດຕັ້ງແມ່ຍິງນັບມື້ນັບເຕີບໃຫຍ່ເຂັ້ມແຂງ ທາງດ້ານປະລິມານ ແລະ ຄຸນນະພາບ ກາຍເປັນເສນາທິການທີ່ເຂັ້ມແຂງ ໃຫ້ແກ່ຄະນະພັກແຕ່ລະຂັ້ນ ໃນການສຶກສາອົບຮົມເຕົ້າໂຮມຄວາມສາມັກຄີ ແລະ ປຸກລະດົມແມ່ຍິງໃນການປະຕິບັດໜ້າທີ່ ວຽກງານວິຊາສະເພາະຂອງແຕ່ລະກົມກອງ ຕາມພາລະບົດບາດຂອງຕົນສະແດງອອກ ໃນໄລຍະ 3 ປີ ສາມາດຂັດເລືອກສະມາຊິກແມ່ຍິງ ພົນລະເມືອງດີໄດ້ 2,100 ກວ່າຄົນ, ພັດທະນາດີ 2,000 ກວ່າຄົນ, ສ້າງຄອບຄົວດີ 2,100 ກວ່າຄົນ, ແມ່ຍິງ 3 ດີ ປະເພດ I: 2,063 ຄົນ, ປະເພດ II : 9 ຄົນ ແລະ ບຸກຄົນຕົວແບບດ້ານຕ່າງໆ ມີ 100 ກວ່າຄົນ, ໄດ້ໜ່ວຍ 3 ດີ 117 ໜ່ວຍ 90 % ມີສະຫະພັນແມ່ຍິງຮາກຖານ ທັງໝົດ 18 ຮາກຖານ.

 

Off

Comments are closed.