28th Oct2019

ກວດລົດບັນທຸກສິນຄ້າ ພົບຢາໄອສ໌ 786 ກິໂລກຼາມ

by somchan

ໃນວັນທີ 22 ຕຸລາ 2019 ເຈົ້າໜ້າທີ່ຕຳຫຼວດຈະລາຈອນ ກອງບັນຊາການ ປກສ ເມືອງປາກງື່ມ ນະຄອນຫຼວງວຽງຈັນ ປະຕິບັດໜ້າທີ່ປະຈຳຢູ່ຈຸດກວດກາເສັ້ນທາງ 13 ໃຕ້ ເຂດບ້ານສົມສະຫວາດ ເມືອງປາກງື່ມ ນະຄອນຫຼວງວຽງຈັນ ໄດ້ກວດກາລົດບັນທຸກສິນຄ້າອີຊູຊຸ ສີຂາວ ໝາຍເລກທະບຽນ ບຂ 9076 ກຳແພງນະຄອນ ພາຍຫຼັງທີ່ກວດຄົ້ນລົດພົບຢາເສບຕິດປະເພດຢາໄອສ໌ 786 ກິໂລກຼາມ ດັ່ງນັ້ນເຈົ້າໜ້າທີ່ ຈຶ່ງໄດ້ກັກ ຕົວຜູ້ຂັບຂີ່ ໄດ້ 1 ຄົນ , ຜູ້ຂັບຂີ່ລົດຄັນດັ່ງກ່າວ ຊື່ທ້າວ ພິມພາ ອາຍຸ 39 ປີ ຢູ່ບ້ານລາດງອນ ເມືອງແປກ ແຂວງຊຽງຂວາງ.

ພັນໂທ ສຸລົດ ໂຄດຕະວົງສາ ຮອງຫົວໜ້າກອງບັນຊາການ ປກສ ເມືອງປາກງື່ມ ໃຫ້ຮູ້ວ່າ: ໃນເວລາ 18:30 ຂອງວັນທີ 22 ຕຸລາ 2019 ເຈົ້າໜ້າທີ່ຕຳຫຼວດຈະລາຈອນ ປະຈຳຢູ່ຈຸດກວດກາເສັ້ນທາງ 13 ໃຕ້ ບ້ານສົມສະຫວາດ ເມືອງປາກງື່ມ ໄດ້ປະຕິບັດໜ້າທີ່ກວດກາເອກະສານທີ່ສັນຈອນໄປມາ ແລະ ໄດ້ກວດລົດບັນທຸກສິນຄ້າຄັນດັ່ງກ່າວ ທີ່ເດີນທາງແຕ່ນະຄອນຫຼວງວຽງຈັນ ມຸ່ງໜ້າໄປພາກໃຕ້ ພ້ອມທັງກວດກາສິນຄ້າພາຍໃນລົດພົບເຫັນ ຢາເສບຕິດປະເພດຢາໄອສ໌ ຢູ່ໃນແກັດດອກໄຟຈຳນວນ 49 ແກັດ ມີຢາໄອສ໌ 786 ຖົງ ເທົ່າກັບ 786 ກິໂລກຼາມ ພ້ອມເຄື່ອງໃຊ້ໄຟຟ້າປະເພດຕູ້ລຳໂພງ 20 ແກັດ ແລະ ພັດລົມຈຳນວນ 20 ແກັດ ຈຶ່ງກັກລົດ ແລະ ຢຶດສານເສບຕິດຈຳນວນດັ່ງກ່າວໄວ້ດຳເນີນຄະດີ.

ຄະດີດັ່ງກ່າວ ເຈົ້າໜ້າທີ່ ປກສ ເມືອງປາກງື່ມ ໄດ້ສົົມທົບກັບຫ້ອງຕຳຫຼວດ ປກສ ນະຄອນຫຼວງວຽງຈັນ ເພື່ອສືບຕໍ່ດຳເນີນການສືບສວນ-ສອບສວນ ຂະຫຍາຍຜົນຫາກຸ້ມແກ້ງທີ່ພົວພັນຢາເສບຕິດນຳໄປດຳເນີນຄະດີຕາມກົດໝາຍ.

Off

Comments are closed.