09th Dec2019

ສຳເລັດກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ 8

by somchan

ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ 8 ໄດ້ອັດລົງດ້ວຍຜົນສຳເລັດອັນຈົບງາມ ໃນວັນທີ 6 ທັນວາ 2019 ນີ້ ພາຍຫຼັງທີ່ໄດ້ດຳເນີນມາເປັນເວລາ 20 ວັນ ໂດຍການເປັນປະທານຂອງພະນະທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໃຫ້ກຽດເຂົ້າຮ່ວມຂອງ ພະນະທ່ານ ບຸນຍັງ ວໍລະຈິດ ປະທານປະເທດ ມີຮອງປະທານປະເທດ, ນາຍົກລັດຖະມົນຕີ, ຄະນະລັດຖະບານ, ອົງການຕຸລາການ, ແຂກຖືກເຊີນ ແລະ ສະມາຊິກສະພາແຫ່ງຊາດເຂົ້າຮ່ວມຢ່າງພ້ອມພຽງ.

ພະນະທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ກ່າວສູນທອນພົດປິດກອງປະຊຸມ ໂດຍໄດ້ຍົກໃຫ້ເຫັນຜົນສຳເລັດຫຼາຍດ້ານ ກອງປະຊຸມໃນຄັ້ງນີ້ ໄດ້ຄົ້ນຄວ້າພິຈາລະນາຮັບຮອງເອົາການແຕ່ງຕັ້ງບຸກຄະລາກອນຂອງລັດຖະບານ, ບົດລາຍງານກ່ຽວກັບການຈັດຕັ້ງປະຕິບັດວຽກງານພົ້ນເດັ່ນປະຈຳປີ 2019 ແລະ ທິດທາງແຜນວຽກຈຸດສຸມປະຈຳປີ 2020, ແຜນພັດທະນາເສດຖະກິດສັງຄົມ, ແຜນງົບປະມານແຫ່ງລັດ ແລະ ວຽກງານຈຸດສຸມຕ່າງໆຂອງລັດຖະບານ ພິຈາລະນາຮັບຮອງເອົາການສ້າງ ແລະ ປັບປຸງກົດໝາຍຈຳນວນ 8 ສະບັບ ພ້ອມດ້ວຍຕົກລົງ, ພິຈາລະນາຮັບຮອງເອົາຫຼາຍບັນຫາພື້ນຖານສຳຄັນຂອງຊາດ.

Off

Comments are closed.