10th Dec2019

ນັດສົ່ງຢາບ້າ 60ມັດ ແຕ່ຖືກກັກຕົວໄດ້ກ່ອນ

by somchan

ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງສະຫວັນນະເຂດ ໄດ້ກັກຕົວເປົ້າໝາຍ ຄ້າຂາຍຢາເສບຕິດ ໄດ້ 1 ຄົນ ພ້ອມຢາບ້າ 120,000 ເມັດ. ໃນຂະນະທີ່ເປົ້າໝາຍພວມ ລໍຖ້າສົ່ງຢາບ້າໃຫ້ພວກຮ່ວມຂະບວນການຢູ່ຈຸດນັດພົບ ຢູ່ເສັ້ນທາງເຂດບ້ານໜອງນົກຂຽນ ເມືອງສອງຄອນ ແຂວງສະຫວັນນະເຂດ ໃນວັນທີ 1 ທັນວາ 2019 ນີ້.

ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງສະຫວັນນະເຂດໃຫ້ຮູ້ວ່າ: ຜູ້ຖືກຫາຊື່ ທ້າວ ອຳພອນ ຫຼື ຊຽງ ອາຍຸ 24 ປີ ຢູ່ບ້ານໜອງແດງ ເມືອງສອງຄອນ ແຂວງສະຫວັນນະເຂດ ຖືກຈັບຕົວພ້ອມຢາບ້າ 60 ມັດ ເທົ່າກັບ 120,000 ເມັດ, ລົດຈັກຮອນດາເວບ ສີຂາວ-ດຳ ບໍ່ມີປ້າຍທະບຽນ, ໂທລະສັບ 1 ເຄື່ອງ.

ເຊິ່ງເຈົ້າໜ້າທີ່ໄດ້ຮັບລາຍງານວ່າ: ຈະມີການຊື້ຂາຍຢາເສບຕິດປະເພດຢາບ້າຈຳນວນຫຼາຍ ໂດຍນັດສົ່ງໃຫ້ກັນ ຢູ່ເຂດບ້ານໜອງນົກຂຽນ ເມືອງສອງຄອນ ຈຶ່ງໄດ້ແຕ່ງຕັ້ງກຳລັງວິຊາສະເພາະລົງຕິດຕາມເປົ້າໝາຍຢູ່ຈຸດນັດສົ່ງ. ຜ່ານການຕິດຕາມພົບເຫັນເປົ້າໝາຍຂີ່ລົດຈັກມາຈອດຢູ່ເສັ້ນທາງເຂົ້າບ້ານໜອງນົກຂຽນ ຈຶ່ງໄດ້ເຂົ້າຈັບກຸມພ້ອມຢາບ້າຈຳນວນດັ່ງກ່າວ.

ປະຈຸບັນ ເຈົ້າໜ້າທີ່ ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງສະຫວັນນະເຂດ ພວມດຳເນີນການສືບສວນ-ສອບສວນ ຂະຫຍາຍຜົນຫາຜູ້ຮ່ວມຂະບວນການເພື່ອຈັບຕົວມາດຳເນີນຄະດີຕາມລະບຽບກົດໝາຍ.

Off

Comments are closed.