12th Dec2019

ລາວ-ກຳປູເຈຍ ແລກປ່ຽນບົດຮຽນວຽກງານ ກວດຄົນ ເຂົ້າ-ອອກ ເມືອງ

by somchan

ໃນວັນທີ 10 ທັນວາ 2019 ນີ້ ເວລາ 19 ໂມງ ທີ່ສະໜາມບິນສາກົນວັດໄຕ, ພັອ ສາຍສະໝິງ ສີວິໄລ ຫົວໜ້າກົມ ຕມ ກະຊວງ ປກສ ລາວ ໄດ້ຕ້ອນຮັບ ພັນເອກ ເຄັດ ຈັນທະຣິດ ຫົວໜ້າ ກະຊວງ ພາຍໃນ ແຫ່ງ ຣາຊະອານາຈັກ ກຳປູເຈຍ ພ້ອມຄະນະທີ່ໄດ້ເດີນທາງມາ ຢ້ຽມຢາມ ແລະ

ເຮັດວຽກຮ່ວມກັບກົມຕຳຫຼວດ ກວດຄົນເຂົ້າ-ອອກເມືອງລາວ, ໃນລະຫວ່າງວັນທີ 10-13 ທັນວາ 2019 ນີ້ ໂດຍອິງໃສ່ບົດບັນທືກການຮ່ວມມືວຽກງານກວດຄົນ ເຂົ້າ-ອອກ ເມືອງ ທີ່ໄດ້ມີການແລກປ່ຽນບົດຮຽນກັນ

ໃນວັນທີ 11 ທັນວາ 2019 ກົມຕໍາຫຼວດກວດຄົນເຂົ້າ-ອອກເມືອງ ກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ກໍ່ໄດ້ພົບປະແລກປ່ຽນບົດຮຽນກັບ ກົມໃຫຍ່ຕຳຫຼວດກວດຄົນເຂົ້າ-ອອກເມືອງ ກະຊວງພາຍໃນ ລາຊະອານາຈັກກຳປູເຈຍ ທີ່ໂຮງແຮງເມືອງແທັງ ນະຄອນຫຼວງວຽງຈັນ, ຝ່າຍລາວນຳໂດຍ ພັອ ສາຍສະໝິງ ສີວິໄລ ຫົວໜ້າກົມຕໍາຫຼວດກວດຄົນເຂົ້າ-ອອກເມືອງ ສປປ ລາວ ແລະ ຝ່າຍກຳປູເຈຍ ແມ່ນ ພົອ ເຄິດ ຈັນທະຣິດ ຫົວຫນ້າກົມໃຫ່ຍຕຳຫຼວດກວດຄົນເຂົ້າ-ອອກເມືອງ, ລາຊະອານາຈັກກຳປູເຈຍ ມີຄະນະຜູ້ແທນທັງສອງຝາຍເຂົ້າຮ່ວມ.

ກອງປະຊຸມໃນຄັ້ງນີ້ຄະນະຜູ້ແທນທັງສອງຝ່າຍ ໄດ້ລາຍງານໃຫ້ກັນຊາບກ່ຽວກັບສະພາບການທີ່ພົ້ນເດັ່ນ, ກົນອຸບາຍຂອງສັດຕູ ແລະ ກຸ່ມຄົນບໍ່ດີ ທີ່ສວຍໃຊ້ການເຂົ້າ-ອອກເມືອງ ເພື່່ອກໍ່່ຄວາມບໍ່ສະຫງົບຢູ່ສອງປະເທດລາວ-ກຳປູເຈຍ ໃນໄລຍະຜ່ານມາ; ພ້ອມທັງການປະສານສົມທົບແລກປ່ຽນຂໍ້ມູນຂ່າວສານ ໃນຂົງເຂດວຽກງານການກວດຄົນເຂົ້າ-ອອກເມືອງ ແລະ ຄຸ້ມຄອງຄົນຕ່າງປະເທດ, ຊ່ວຍເຫຼືອກັນໃນການຊອກຈັບ, ຕິດຕາມກວດກາເປົ້າໝາຍ ເມື່ອພົບເຫັນແລ້ວແຈ້ງໃຫ້ກັນຊາບຢ່າງເປັນທາງການ ຕາມຄວາມຮຽກຮ້ອງຕ້ອງການທັງສອງຝ່າຍ; ປະສານສົມທົບກັນການນຳສົ່ງຜູ້ທີ່ນຳໃຊ້ໝັງສືຜ່ານແດນປອມກັບຄືນປະເທດຕົ້ນທາງ, ປຶກສາແລກປ່ຽນຂໍ້ມູນຂ່າວສານກ່ຽວກັບການເຄື່ອນໄຫວລະເມີດກົດໝາຍຂອງພົນລະເມືອງສອງປະເທດ ເປັນຕົ້ນແມ່ນການແຕ່ງດອງ, ການໄດ້ສຳມະໂນຄົວແບບບໍ່ຖືກຕ້ອງ, ລີ້ຊ້ອນ, ປະກອບອາຊີບບໍ່ຖືກຕ້ອງ ແລະ ເຄື່ອນໄຫວຜິດລະບຽບການຕ່າງໆ; ເພື່ອແນໃສ່ເຮັດໃຫ້ພະນັກງານກວດຄົນເຂົ້າ-ອອກເມືອງທັງສອງປະເທດ ຢູ່ດ່ານຊາຍແດນເພີ່ມທະວີຄວາມເປັນເຈົ້າການ, ປະສານສົມທົບປະຕິບັດໜ້າທິ່ວິຊາສະເພາະໃຫ້ຖືກຕ້ອງ, ສອດຄ່ອງ ແລະ ຮັດກຸມ.

ທັງນີ້ ກໍເພື່ອເປັນການຈັດຕັ້ງຜັນຂະຫຍາຍການຮ່ວມມືຮັກສາຄວາມສະຫງົບ ລະຫວ່າງກະຊວງ ປກສ ສປປ ລາວ ກັບ ກະຊວງພາຍໃນລາຊະອານາຈັກກຳປູເຈຍ ໃຫ້ປະກົດຜົນເປັນຈິງ ແລະ ຍົກສູງປະສິດທິພາບວຽກງານກວດຄົນເຂົ້າ-ອອກເມືອງ, ເພື່ອພ້ອມກັນເປັນເອກະພາບການຮ່ວມມືໃນຕໍ່ໜ້າໃຫ້ມີຈຸດສຸມ ແລະ ກຽມພ້ອມຕອບສະໜອງໜ້າທີ່ການເມືອງໃນໄລຍະໃໝ່.

 

Off

Comments are closed.