20th Jan2020

ກະຊວງປ້ອງກັນປະເທດໂຮມຊຸມນຸມລະນຶກ ວັນສ້າງຕັ້ງກອງທັບປະຊາຊົນຊົນລາວ ຄົບຮອບ 71 ປີ

by somchan

ກະຊວງປ້ອງກັນປະເທດ ຈັດພິທີໂຮມຊຸມນຸມລະນຶກວັນສ້າງຕັ້ງກອງທັບປະຊາຊົນລາວ ທີ 20 ມັງກອນ ຄົບຮອບ 71 ປີ ໃນວັນທີ 20 ມັງກອນ 2020 ນີ້ ທີ່ສະໂມສອນກົມໃຫ່ຍການເມືອງກອງທັບ ໂດຍການໃຫ້ກຽດເຂົ້າ ຮ່ວມຂອງ ພົນເອກ ຈັນສະໜອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ມີບັນດາຄະນະພັກ, ຄະນະນຳກະຊວງປ້ອງກັນປະເທດ, ພະນັກງານອາວຸໂສປະຕິວັດ ແລະ ພະນັກງານຫຼັກແຫຼ່ງກົມກອງອ້ອມຂ້າງ ກະຊວງປ້ອງກັນປະເທດເຂົ້າຮ່ວມ.

ໃນໂອກາດທີ່ມີຄວາມໝາຍຄວາມສຳຄັນນີ້ ພົນເອກ ຈັນສະໜອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ໄດ້ຂື້ນກ່າວປາໃສໃນພິທີໂຮມຊຸມນຸມລະນຶກວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ, ເຊິ່ງທ່ານໄດ້ຍົກໃຫ້ເຫັນກອງທັບປະຊາຊົນລາວໄດ້ກຳເນີດເກີດຂື້ນຢູ່ເຂດທີ່ໜັ້ນ ຕາແສງລາວຮຸ່ງ ເມືອງຊຽງຄໍ້ ແຂວງຫົວພັນ ໂດຍແມ່ນທ່ານປະທານໄກສອນ ພົມວິຫານ ໄດ້ປະກາດສ້າງຕັ້ງກອງທັບລາວອິດສະຫຼະ ເຊິ່ງ ແມ່ນກອງທັບປະຊາຊົນລາວໃນປະຈຸບັນ, ໄຂຂື້ນຢ່າງເປັນທາງການໃນວັນທີ 20 ມັງກອນ 1949 ເປັນຂີດໝາຍແຫ່ງການເຕີບໃຫ່ຍຂະຫຍາຍຕົວຂອງບັນດາກອງກຳລັງປະກອບອາວຸດປະຕິວັດ ເປັນການສືບທອດມູນເຊື້ອ ອົງອາດກ້າແກ່ນຂອງບັນດາພະບູລຸດຂອງຊາດລາວ ນັບແຕ່ໄດ້ຮັບການສ້າງຕັ້ງຂື້ນ ກອງທັບປະຊາຊົນລາວກໍ່ໄດ້ປະເຊີນໜ້າກັບສັດຕູທີ່ມີກຳລັງແຮງທາງດ້ານຕ່າງໆເໜືອກວ່າຕັ້ງຫຼາຍເທົ່າ ແຕ່ດ້ວຍນ້ຳໃຈຮັກຊາດ ແລະ ໄດ້ຮັບການອູ້ມຊູຊ່ວຍເຫຼືອຢ່າງໝົດຈິດໝົດໃຈຈາກປະຊາຊົນລາວບັນດາເຜົ່າ, ກອງທັບໄດ້ຕໍ່ສູ້ ແລະ ເຕີບໃຫ່ຍຂະຫຍາຍຕົວຢ່າງປະຢຸດຢັ້ງ, ສາມາດທັບມ້າງແຜນການຮຸກຮານຂອງພວກລ່າເມືອງຂື້ນ ໃຫ້ພັງທະລາຍ ລົງເປັນກ້າວໆ ຈົນສາມາດປົດປ່ອຍປະເທດຊາດ ແລະ ສ້າງຕັ້ງເປັນ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 20 ທັນວາ 1975  ແລະ ສືບຕໍ່ສ້າງສາພັດທະນາປະເທດຊາດໃຫ້ຮຸ່ງເຮືອງຈົນເຖິງປະຈຸບັນນີ້.

Off

Comments are closed.