22nd Jan2020

ກົມໃຫ່ຍການເມືອງ ປກສ ຈັດກອງປະຊຸມສະຫຼຸບວຽກງານ ປະຈຳປີ 2019 ແລະ ທິດທາງ ປີ 2020

by somchan

ກົມໃຫ່ຍການເມືອງປ້ອງກັນຄວາມສະຫງົບ ຈັດກອງປະຊຸມສະຫຼຸບວຽກງານ ປະຈຳປີ 2019 ແລະ ທິດທາງແຜນການຈຸດສຸມປີ 2020, ໃນວັນທີ 22 ມັງກອນນີ້. ພາຍໃຕ້ການເປັນປະທານຂອງ ພົຕ ວັນທອງ ກອງມະນີ ຫົວໜ້າກົມໃຫຍ່ການເມືອງປ້ອງກັນຄວາມສະຫງົບ, ມີຄະນະກົມໃຫຍ່ການເມືອງ, ກົມ, ພະແນກ ອ້ອມຂ້າງກົມໃຫຍ່ການເມືອງ ແລະ ແຂກຖຶກເຊີນເຂົ້າຮ່ວມ.

ພັອ ພອນເພັງ ຫຼ້າບັນດິດ ຫົວໜ້າຫ້ອງການ ກົມໃຫຍ່ການເມືອງປ້ອງກັນຄວາມສະຫົງບ ໄດ້ຜ່ານບົດສະຫຼຸບ ຕີລາຄາການຈັດຕັ້ງປະຕິບັດວຽກງານໃນ 1 ປີ ຜ່ານມາ ມີຫຼາຍດ້ານໄດ້ຮັບຜົນສຳເລັດ ເປັນຕົ້ນວຽກງານ ສຶກສາອົບຮົມການເມືອງ-ແນວຄິດ ຄະນະພັກ-ຄະນະບັນຊາແຕ່ລະຂັ້ນໄດ້ເອົາໃຈໃສ່ສຶກສາອົບຮົມແນວທາງນະໂຍບາຍຂອງພັກ-ລັດໃຫ້ພະນັກງານ-ນັກຮົບ. ໄດ້ຈັດຕັ້ງຮ່ຳຮຽນ, ຄົ້ນຄວ້າເຊື່ອມຊືມມະຕິ, ຄຳສັ່ງ ແລະ ເອກະສານຕ່າງໆ, ໂດຍຜ່ານພາຫະນະສື່ມວນຊົນ ປກສ ທີ່ເປັນກະບອກສຽງຂອງກຳລັງໂດຍໄດ້ເຜີຍແຜ່ ແນວທາງນະໂຍບາຍຂອງພັກ, ກົດໝາຍຂອງລັດ, ແນວທາງປ້ອງກັນຊາດ-ປ້ອງກັນຄວາມສະຫົງບ ແລະ ຜົນງານ ການປະຕິບັດໜ້າທີ່ວຽກງານວິຊາສະເພາະຂອງກຳລັງປກສ ທັງເປັນເຈົ້າການຕອບຕ້ານຖອຍທຳນອງບິດເບືອນຂອງພວກຄົນບໍ່ດີ ແລະ ສື່ອອນລາຍທີ່ໃສ່ຮ້າບປ້າຍສີພັກ-ລັດຖະບານ ແລະ ເຈົ້າໜ້າທີ່ທຸກພາກສ່ວນ ຢ່າງເຂັ້ມງວດເຮັດໃຫ້ສັງຄົມມີຄວາມຮັບຮູ້ເຂົ້າໃຈຕໍ່ແນວທາງຂອງພັກເປັນຢ່າງດີ. ວຽກງານພັກ ຄະນະພັກແຕ່ລະຂັ້ນ ໄດ້ເອົາໃຈໃສ່ປັບປຸງກໍ່ສ້າງພັກຕາມ 5 ຫຼັກການ ແລະ 3 ທິດນຳໂດຍຖືເອົາຄຸນນະພາບເປັນກົກ, ການຈັດຕັ້ງທຸກຂັ້ນໄດ້ປະຕິບັດຫຼັກການລວມສູນປະຊາທິປະໄຕ ແລະກົດລະບຽບຂອງພັກຢ່າງເຂັ້ມງວດ, ໂດຍຖືເອົາການສຳຫຼວດກວດກາ, ຕີລາຄາແບ່ງປະເພດສະມາຊິກພັກ ແລະ ຮາກຖານພັກ ຕິດຕາມຊຸກຍູ້ ບັນດາກົມກອງ- ທ້ອງຖິ່ນຈັດຕັ້ງດຳເນີນກອງປະຊຸມໃຫຍ່ພັກ 3 ຂັ້ນຂອງຕົນປະຈຸບັນອ້ອມຂ້າງກະຊວງປກສ ສຳເລັດ 230 ໜ່ວຍ, ທ້ອງຖິ່ນ 920 ໜ່ວຍ, ຈັດຕັ້ງມອບ-ຮັບນາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈຳປີ 2018 ຈຳນວນ 143 ໜ່ວຍ ແລະ ມອບບັດສະມາຊິກພັກສົມບູນຊຸດທີ XI, ຊຸດທີ XII ໃຫ້ສະມາຊິກພັກສົມບູນ 391 ສະຫາຍ, ຂະຫຍາຍມະຫາຊົນຜູ້ທີ່ມີຄວາມກ້າວໜ້າເຂົ້າພັກສຳຮອງ 561 ສະຫາຍ, ເລື່ອນສະມາຊິກພັກສຳຮອງຂຶ້ນສົມບູນ 458 ສະຫາຍ, ວຽກງານຈັດຕັ້ງພະນັກງານໃນ1ປີຜ່ານມາກົງຈັກການຈັດຕັ້ງກຳລັງ ປກສ ແຕ່ລະຂັ້ນໄດ້ຮັບການປັບປຸງຕໍ່ເນືອງ ແລະ ປັບປຸງພາລະບົດບາດຢູ່ກົມກອງ-ທ້ອງຖິ່ນຈຳນວນໜຶ່ງໃຫ້ສອດຄ່ອງ ແລະ ສົມຄູ່ກັບໜ້າທີ່ຄວາມຮັບຜິດຊອບ.

ຄົ້ນຄ້ວາປັບປຸງກົງຈັກການຈັດຕັ້ງບາງຫົວໜ່ວຍຢູ່ບັນດາກົມກອງ-ທ້ອງຖິ່ນ ຈຳນວນ 3 ພັນກ່ວາຕຳແໜ່ງ, ຍິງ 653 ຕຳແໜ່ງ. ຄົ້ນຄວ້ານຳສະເໜີຂັ້ນເທິງເລື່ອນຊັ້ນໃຫ້ນາຍຕຳຫຼວດຂັ້ນສູງ 53 ທ່ານ, ອອກຂໍ້ຕົກລົງເລື່ອນຊັ້ນ, ປະດັບຊັ້ນ, ດັດແປງຊັ້ນໃຫ້ນາຍ ແລະ ພົນຕຳຫຼວດບັນດາກົມກອງ- ທ້ອງຖິ່ນ ປະຈຳປີ 2019 ຈຳນວນ 1 ໝື່ນກ່ວາຄົນ, ຄົ້ນຄວ້າຮັບກຳລັງໃໝ່ 2 ພັນກວ່າຄົນ, ວຽກງານປ້ອງກັນກຳລັງ ໄດ້ເອົາໃຈໃສ່ເກັບກຳສະພາບການເຄື່ອນໄຫວຮອບດ້ານຂອງພະນັກງານ-ນັກຮົບໂດຍຖືເອົາການປ້ອງກັນ ແລະ ສະກັດກັ້ນເປັນຕົ້ນຕໍ, ຕິດຕາມ-ກວດກາພິສູດຫາງສຽງວິພາກວິຈານຂອງສັງຄົມຕໍ່ກຳລັງປກສ, ເອົາໃຈໃສ່ຄຸ້ມຄອງ-ປ້ອງກັນກຳລັງ ແລະ ກວດກາຊີວະປະຫັວດການພົວພັນສັງຄົມ, ການເຄື່ອນໄຫວດຳລົງຊີວິດຂອງສະມາຊິກພັກ, ພະນັກງານນັກ-ຮົບໃນກຳລັງເພື່ອບໍ່ໃຫ້ຕົກເຂົ້າໃນກົນອຸບາຍຫັນປ່ຽນຂອງຄົນບໍ່ດີ, ຮັບຄຳຮ້ອງຟ້ອງ, ຮ້ອງທຸກ, ຄຳຮ້ອງຂໍຄວາມເປັນທຳ ແລະ ໃບສະເໜີຕ່າງໆ ຈຳນວນ 175 ເລື່ອງ, ຄົ້ນຄວ້າແກ້ໄຂສຳເລັດ 127 ເລື່ອງ, ພວມດຳເນີນຄະດີ 36 ເລື່ອງ, ມອບໃຫ້ກົມກອງກ່ຽວຂ້ອງແກ້ໄຂ 12 ເລື່ອງ, ສົມທົບກັບກົມກອງກ່ຽວຂ້ອງລົງແກ້ໄຂປະກົດການຫຍໍ້ທໍ້ຕ່າງໆ ທີ່ພົວພັນເຖິງພະນັກງານ-ນັກຮົບຢູ່ບັນດາກົມກອງ- ທ້ອງຖິ່ນ 18 ຄັ້ງມີ 35 ເທື່ອຄົນ ແລະ ວຽກງານອື່ນໆ.

Off

Comments are closed.