25th Feb2020

ກອງປະຊຸມປຶກສາຫາລືເພື່ອສະກັດກັ້ນ ແລະ ແກ້ໄຂປະກົດການຫຍໍ້ທໍ້ຢູ່ແຂວງບໍ່ແກ້ວ

by somchan

ໃນວັນທີ 22 ກຸມພາ 2020 ຢູ່ທີ່ຫ້ອງວ່າການປົກຄອງແຂວງບໍ່ແກ້ວ ພົທ ວິໄລ ຫຼ້າຄໍາຟອງ ລັດຖະມົນຕີກະຊວງ ປກສ ໄດ້ເປັນປະທານກອງປະຊຸມປຶກສາຫາລືເພື່ອສະກັດກັ້ນ ແລະ ແກ້ໄຂປະກົດການຫຍໍ້ທໍ້ຢູ່ແຂວງບໍ່ແກ້ວ ມີ ທ່ານ ບົວຄົງ ນາມມະວົງ ເຈົ້າແຂວງ ແຂວງບໍ່ແກ້ວ ພ້ອມດ້ວຍຄະນະ, ມີຫົວຫນ້າຫ້ອງວ່າການກະຊວງ ປກສ, ບັນດາກົມວິຊາສະເພາະ ແລະ ກອງບັນຊາການທະຫານແຂວງ, ກອງບັນຊາການ ປກສ ແຂວງ ເຂົ້າຮ່ວມ.

ທ່ານ ບົວຄົງ ນາມມະວົງ ເຈົ້າແຂວງ ແຂວງບໍ່ແກ້ວ ໄດ້ລາຍງານສະພາບການພັດທະນາ ເສດຖະກິດ-ສັງຄົມຂອງແຂວງ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ.ໂດຍການຊີ້ນໍາ-ນໍາພາ ຂອງຄະນະພັກ-ນະຄະນໍາແຂວງ ສົມທົບກັບຂະແຫນງການຕ່າງໆ ເຮັດ ໃຫ້ ແຂວງບໍ່ແກ້ວ ໄດ້ຮັບການພັດທະນາຢ່າງຕໍ່ເນື່ອງ, ເສດຖະກິດມີການຂະຫຍາຍຕົວ ຊີວິດການເປັນຢູ່ຂອງປະຊາຊົນນັບມື້ດີຂຶ້ນ ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍໂດຍພື້ນຖານ ເຈົ້າຫນ້າທີ່ແຕ່ລະພາກສ່ວນເປັນເຈົ້າການປະຕິບັດຫນ້າທີ່ວິຊາສະເພາະ ເປັນຕົ້ນແມ່ນແກ້ໄຂບັນຫາຢາເສບຕິດ ໃນປີ 2019 ສາມາດ ຢາບ້າໄດ້ທັງຫມົດ 13 ລ້ານກວ່າເມັດ, ຄະດີຄາດຕະກໍາ 14 ລາຍ,ການເຂົ້າ-ອອກເມືອງ, ການຂົນສົ່ງສິນຄ້າຜິດກົດຫມາຍ, ບັນຫາໂສເພນີ, ບັນຫາຄ້າມະນຸດ ແລະ ບັນຫາໂຈລະກຳທາງອິນເຕີເນັດ ບັນຫາຕ່າງໆເຫຼົ່ານີ້ ໃນໄລຍະຜ່ານມາ ຄະນະນໍາແຂວງ ກໍ່ໄດ້ສົມທົບກັບກໍາລັງ ປກຊ-ປກສ ເອົາໃຈໃສ່ສະກັດກັ້ນ ແລະ ແກ້ໄຂໄດ້ຫຼາຍພໍສົມຄວນ  ແລະຈະເພີ່ມທະວີເອົາໃຈໃສ່ແກ້ໄຂໃນຕໍ່ຫນ້າ.

ໃນໂອກາດດັ່ງກ່າວ ພົທ ວິໄລ ຫຼ້າຄໍາຟອງ ລັດຖະມົນຕີ ກະຊວງ ປກສ ໄດ້ມີຄໍາເຫັນໃຫ້ຄະນະນໍາແຂວງບໍ່ແກ້ວ, ກໍາລັງ ປກຊ-ປກສ ແຂວງ ສົມທົບ ກັບພະນັກງານທີ່ລົງກໍ່ສ້າງຮາກຖານ ສຸມໃສ່ສະກັດກັ້ນ ແລະ ແກ້ໄຂບັນດາປະກົດການຫຍໍ້ທໍ້ທີ່ເກີດ ຂຶ້ນໃຫ້ວ່ອງໄວ, ທັນການ, ມີປະສິດທິຜົນ, ຮັບປະກັນຄວາມຖືກຕ້ອງຕາມກົດຫມາຍ, ເຂັ້ມງວດ ກວດກາ-ສະກັດກັ້ນການຂົນສົ່ງ ການຄ້າຂາຍຢາເສບຕິດ, ການຂົນສົ່ງສິນຄ້າຜິດກົດຫມາຍ, ແກ້ໄຂບັນຫາໂສເພນີ ແລະ ອື່ນໆ ນໍາຕົວຜູ້ກະທໍາຜິດມາດໍາເນີນຄະດີຕາມກົດຫມາຍ ເພື່ອເຮັດໃຫ້ແຂວງບໍ່ແກ້ວມີຄວາມສະຫງົບ ມີຄວາມເປັນລະບຽບຮຽບຮ້ອຍ, ປະຊາຊົນດໍາລົງຊີວິດດ້ວຍຄວາມປອດໄພ.

Off

Comments are closed.