27th Feb2020

ກົມໂຄສະນາ ກົມໃຫຍ່ການເມືອງ ກະຊວງ ປກສ ເອົາໃຈໃສ່ເຮັດວຽກງານວິຊາສະເພາະ

by somchan

ກົມໂຄສະນາອົບຮົມ ກົມໃຫຍ່ການເມືອງ ກະຊວງ ປກສ ຈັດກອງປະຊຸມສະຫຼຸບວຽກງານປະຈໍາປີ 2019 ແລະ ວາງທິດທາງແຜນການໃນຕໍ່ໜ້າ ໃນວັນທີ 25 ກຸມພາ 2020, ເຂົ້າຮ່ວມມີ ພົຕ ວັນທອງ ກອງມະນີ ຫົວໜ້າກົມໃຫຍ່ການເມືອງ ປກສ, ມີຫົວໜ້າ-ຮອງກົມ, ຫົວໜ້າ-ຮອງພະແນກ, ກອງ, ພະນັກງານ-ນັກຮົບເຂົ້າຮ່ວມ.

ພັທ ສອນພະຈັນ ທໍາມະວົງ ຫົວໜ້າກົມໂຄສະນາອົບຮົມ ຜ່ານບົດສະຫຼຸບການເຄື່ອນໄຫວປະຕິບັດວຽກງານຂອງກົມໂຄສະນາ ໃນໄລຍະ 1 ປີຜ່ານມາ, ເຊິ່ງສາທາດຍາດໄດ້ຜົນງານຫຼາຍດ້ານເປັນຕົ້ນ ໄດ້ຜະລິດທຸງຊາດ, ທຸງພັກ, ທຸງທິວ ໄດ້ 112 ຜືນ, ຜະລິດປ້າຍໂຄສະນາ LED, ປ້າຍຄໍາຂັວນ 19 ປ້າຍ, ຕິດທຸງ, ຄໍາຂັວນປະດັບປະດາ, ເປີດເຄື່ອງສຽງຮັບໃຊ້ກອງປະຊຸມຕ່າງໆ ໄດ້ 158 ຄັ້ງ ມີ 144 ແຮງງານ. ນອກນັ້ນ ໄດ້ຄົ້ນຄວ້າເອກະສານ ແລະ ແຈ້ງການໃຫ້ຈັດຕັ້ງປາຖະກະຖາວັນສ້າງຕັ້ງກໍາລັງ ປກສ ຄົບຮອບ 58 ປີ, ວັນສ້າງຕັ້ງກອງທັບປະຊາຊົນລາວຄົບຮອບ 70 ປີ, ວັນສ້າງຕັ້ງພັກປະຊາຊົນລາວ ຄົບຮອບ 64 ປີ ແລະ ເອກະສານມະຕິ 7 ຂອງຄະນະບໍລິຫານງານສູນກາງພັກ ສະໄໝທີ X, ວັນຄ້າຍວັນເກີດປະທານສຸພານຸວົງ ຄົບຮອບ 110 ປີ, ເອກະສານລັດຖະທໍາມະນູນ, ວັນຍຶດອໍານາດ 23 ສິ່ງຫາ ເພື່ອຈັດຕັ້ງໂຄສະນາ-ປາຖະກະຖາ ໃຫ້ຄະນະນໍາກະຊວງ, ກົມກອງອ້ອມຂ້າງກະຊວງ ແລະ ກອງບັນຊາການ ປກສ ແຂວງທົ່ວປະເທດ ຈໍານວນ 1,294 ສະບັບ.

ໃນຕໍ່ໜ້າ ຈະເອົາໃຈໃສ່ເປັນເສນາທິການໃຫ້ແກ່ຂັ້ນເທິງໃນການປະສານງານກັບພາກສ່ວນຕ່າງໆ, ຕິດຕາມກວດກາ ແລະ ສຶກສາອົບຮົມພະນັກງານ-ນັກຮົບໃນການເຄື່ອນໄຫວວຽກງານວິຊາສະເພາະໃນກົມ, ນໍາສະເໜີ ແລະ ປັບປຸງນິຕິກໍາຕ່າງໆ ເພື່ອຮັບໃຊ້ໃຫ້ແກ່ວຽກງານໂຄສະນາສຶກສາອົບຮົມ, ວຽກງານສິລະປະວັນນະຄະດີ, ຄົ້ນຄວ້ານະໂຍບາຍໃຫ້ທັນເວລາ ແລະ ເໝາະສົມ. ສ້າງ, ອອກແບບ, ສ້າງປື້ມກາບກອນ, ປື້ມຄູ່ມື ແລະ ນິຕິກໍາສ້າງກົມກອງ ແລະ ນັກຮົບວັດທະນະທໍາ ປກສ ຢູ່ອ້ອມຂ້າງກະຊວງ ແລະ ປກສ ແຂວງ, ຝືກຊ້ອມ, ຫັດແອບເພື່ອກະກຽມຮັບໃຊ້ໜ້າທີ່ການເມືອງ ກໍຄືວັນສໍາຄັນຕ່າງໆຂອງຊາດທັງພາຍໃນ ແລະ ຕ່າງປະເທດ, ປະດິດຕິດແຕ່ງບົດຟ້ອນ, ບົດລໍາ, ບົດເພັງ ເພື່ອກຽມສະແດງຮັບໃຊ້ງານຕ່າງໆຂອງພັກຂອງຊາດ ໂດຍວະເພາະແມ່ນກຳລັງປ້ອງກັນຄວາມສະຫງົບ ໃຫ້ມີຜົນສຳເລັດ.

 

Off

Comments are closed.