06th Mar2020

ລາວ-ກຳປູເຈຍ ຮ່ວມມືວຽກງານປ້ອງກັນຄວາມສະຫງົບ

by somchan

ການນຳຂັ້ນສູງກະຊວງປ້ອງກັນຄວາມສະຫງົບ ແຫ່ງ ສປປລາວ, ໄດ້ຕ້ອນຮັບຄະນະຜູ້ແທນຂັ້ນສູງ ກະຊວງພາຍໃນ ແຫ່ງຣາຊະອານາຈັກ ກຳປູເຈຍ ທີ່ໄດ້ເດີນທາງມາຢ້ຽມຢາມສັນຖະໄມຕີຢ່າງເປັນທັງການ ແລະ ຮ່ວມກອງປະຊຸມປະຈຳປີ 2020 ວັນທີ 3 ຫາວັນທີ 6 ມີນາ 2020 ພິທີຕ້ອນຮັບຢ່າງເປັນທາງການ ໄດ້ຈັດຂຶ້ນໃນຕອນບ່າຍຂອງວັນທີ 5 ມີນາ ທີ່ກະຊວງປ້ອງກັນຄວາມສະຫງົບໃຫ້ການຕ້ອນຮັບໂດຍ ພົນໂທ ວິໄລ ຫຼ້າຄຳຟອງ ລັດຖະມົນຕີ ກະຊວງຄວາມສະຫງົບ ພ້ອມດ້ວຍຄະນະຄະນະຜູ້ແທນຂັ້ນສູງ ແຫ່ງຣາຊະນາຈັກ ກຳປູເຈຍ ໂດຍສົມເດັດ ກໍຣລາໂຮມ ຊໍເຄັງ  ຮອງນາຍົກລັດຖະມົນຕີກະຊວງພາຍໃນ ແຫ່ງຣາຊະອານາຈັກ ກຳປູເຈຍ.

ພາຍຫຼັງສຳເລັດການຕ້ອນຮັບທັງສອງຝ່າຍກໍ່ໄດ້ເຂົ້າຮ່ວມກອງປະຊຸມສະຫຼຸບຕີລາຄາເຄື່ອນໄຫວຈັດຕັ້ງປະຕິບັດແຜນການຮ່ວມມື ປະຈຳປີ 2019 ແລະ ວາງທິດທາງແຜນການຮ່ວມມືໃນປີ 2020 ເຊິ່ງໃນກອງປະຊຸມທັງສອງຝ່າຍໄດ້ລາຍງານສະພາບການ ຄວາມສະຫງົບຄວາມເປັນລະບຽບຮຽບຮ້ອຍໃນສັງຄົມ ແລະ ຊາຍແດນ, ການພົວພັນຮ່ວມມືຕ້ານ, ສະກັດກັນ ແລະ ແກ້ໄຂ້ ອາຊະຍາກຳຂ້າມຊາດ ແລະອື່ນໆ, ເຊິ່ງເຮັດໃຫ້ທັງສອງປະເທດຢູ່ຕາມຊາຍແດນມີຄວາມສະຫງົບ ແລະ ເປັນລະບຽບຮຽບຮ້ອຍດີ, ສ້າງເງື່ອນໄຂ ເຮັດໃຫ້ການພັດທະນາເສດຖະກິດສັງຄົມຂອງລາວ ແລະ ກຳປູເຈຍມີການເຕີບໂຕ  ແລະ ບັນລຸໄດ້ຕາມເປົ້າໝາຍ. ພ້ອມດຽວກັນນັ້ນ, ຄະນະຜູ້ແທນຂັ້ນສູງຂອງທັງສອງກະຊວງຍັງໄດ້ປຶກສາຫາລື. ພ້ອມທັງທົບທວນຄືນ ກ່ຽວກັບການຮ່ວມມືຂອງສອງກະຊວງໃນໄລຍະ 1 ປີຜ່ານມາ ສຳລັບແຜນການຮ່ວມມືໃນຕໍ່ໜ້າແມ່ນ ທັງສອງຝ່າຍໄດ້ເຫັນດີເປັນເອກະພາບສືບຕໍ່ການຮ່ວມມືການຮັກສາຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍດ້ານສັງຄົມ ແລະທັງເປັນການຮັດແໜ້ນຄວາມສາມັກຄີຮັກແພງ ລະຫວ່າງສອງຊາດ ລາວ-ກຳປູເຈຍ, ໂດຍສະເພາະແມ່ນການແລກປ່ຽນຄະນະຜູ້ແທນລະຫວ່າງສອງກະຊວງ, ຄະນະ ເຈົ້າແຂວງ ແລະ ກອງບັນຊາການ ທີ່ມີຊາຍແດນຕິດຈອດກັນ ລະຫວ່າງ ລາວ-ກຳປູເຈຍ, ສືບຕໍ່ຈັດຕັ້ງປະຕິບັດແກ້ໄຂບັນຫາປະກົດການຫຍໍ້ທໍ້ລຽບຕາມຊາຍແດນ, ບັນຫາຄ້າຂາຍຢາເສບຕິດ, ການລັກລອບເຂົ້າເມືອງຜິດກົດໝາຍ, ການຄ້າມະນຸດ. ສືບຕໍ່ຮ່ວມມືໃນຂົງເຂດວຽກງານກໍ່ສ້າງກຳລັງ ແລະ ການຮ່ວມມືດ້ານອື່ນໆ.

ພ້ອມນີ້, ຄະນະຜູ້ແທນທັງສອງຝ່າຍກໍ່ໄດ້ລົງເຊັນບົດບັນທຶກ ກອງປະຊຸມວ່າດ້ວຍການຮ່ວມມື ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ  ລາວ ແລະ ກະຊວງພາຍໃນແຫ່ງຣາຊະນາຈັກ ກຳປູເຈຍ ປະຈຳປີ 2020, ຕາງໜ້າເຊັນບົດບັນທຶກໂດຍ ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ, ຝ່າຍຣາຊະນາຈັກ ກຳປູເຈຍ ໂດຍສົມເດັດ  ສາວກໍຣລາໂຮມ ຊໍເຄັງ ຮອງນາຍົກລັດຖະມົນຕີ ລັດຖະມົນຕີກະຊວງພາຍໃນ ພ້ອມດ້ວຍຄະນະຜູ້ແທນທັງສອງຝ່າຍເຂົາຮ່ວມ.

Off

Comments are closed.