31st Mar2020

ການນຳຂອງແຂວງວຽງຈັນ, ລົງຕິດຕາມເຝົ້າລະວັງເຊື້ອພະຍາດ Covid-19 ຢູ່ເມືອງຊະນະຄາມ

by somchan

ວັນທີ 26 ມີນາ 2020 ຜ່ານມານີ້ ການນຳຂອງແຂວງ, ການນໍາເມືອງລົງຕິດຕາມເຝົ້າລະວັງການແຜ່ລະບາດຂອງເຊື້ອພະຍາດCovid-19 ຢູ່ເມືອງຊະນະຄາມ ນຳໂດຍ ພົຈວ ປອ ທອງເຄນບຸນໝັ້ນ ຄະນະປະຈຳພັກແຂວງ ຫົວໜ້າກອງບັນຊາການ ປກສ ແຂວງວຽງຈັນ ພ້ອມດ້ວຍຄະນະ ລົງເຄື່ອນໄຫວຢ້ຽມຢາມ ແລະ ໂອ້ລົມ ແຮງງານລາວ ທີ່ກັບມາຈາກປະເທດໄທ ໃນຈຸດຈຳກັດຕົວຊົ່ວຄາວ 14 ວັນ ຢູ່ພາຍໃນເມືອງ.

ທ່ານ ສະໝານ ວິເສດຍະຟົງ ເຈົ້າເມືອງໆຊະນະຄາມ ໄດ້ກ່າວວ່າ: ພາຍຫຼັງໄດ້ຮັບບັນດາ ຄຳສັ່ງ ແລະ ແຈ້ງການ ຈາກຂັ້ນເທິງ ເມືອງຊະນະຄາມ ກໍ່ໄດ້ນຳມາຈັດຕັ້ງຜັນຂະຫຍາຍ ແລະ ເຜີຍແຜ່ໃຫ້ປະຊາຊົນໄດ້ຮັບຊາບຢ່າງທົ່ວເຖິງ ເພື່ອປ້ອງກັນ ແລະ ຕ້ານການລະບາດເຊື້ອພະຍາດ Covid-19 ໃນການກຳນົດສະຖານທີ່ ຈຸດຈຳກັດບໍລິເວນ ແມ່ນກຳນົດເອົາບ້ານລະ 1 ຈຸດ, ໂດຍໄດ້ຈັດຕັ້ງປະຕິບັດມາແຕ່ວັນທີ 25 ມີນາ 2020 ແລະ ມອບໃຫ້ເຈົ້າໜ້າທີ່ປະຈຳຢູ່ກຸ່ມ, ອຳນາດການປົກຄອງບ້ານ ແລະ ພາກສ່ວນທີ່ກ່ຽວຂ້ອງ ເປັນຜູ້ຊຸກຍູ້ຕິດຕາມ ເກັບກຳລາຍຊື່ແຮງງານລາວທີ່ກັບມາແຕ່ຕ່າງປະເທດ ພ້ອມສັງລວມຕົວເລກເປັນອັນ ເພື່ອນຳມາຈຸດຈຳກັດຕົວຊົ່ວຄາວທັງໝົດ ຜ່ານການຈັດຕັ້ງປະຕິບັດເຫັນວ່າພໍ່ແມ່ປະຊາຊົນ ແລະ ແຮງງານແຕ່ລະຄົນ ກໍ່ໃຫ້ຄວາມຮ່ວມມືເປັນຢ່າງດີ ປະຈຸບັນແຮງງານລາວທີ່ມາຈາກປະເທດເພື່ອນບ້ານທີ່ພັກເຊົ່າຢູ່ຈຸດກັກຕົວຊົ່ວຄາວ 14 ວັນ ຢູ່ເມືອງຊະນະຄາມ ທັງໝົດ 431 ຍິງ 223 ຄົນ.

ຕໍ່ກັບສະພາບການດັ່ງກ່າວ ພົຈວ ປອ ທອງເຄນ ບຸນໝັ້ນ ຄະນະປະຈໍາພັກແຂວງຫົວໜ້າກອງບັນຊາການປກສ ແຂວງ ແລະ ຄະນະສະເພາະກິດຂັ້ນເມືອງ ໄດ້ໃຫ້ກຽດໂອ້ລົມ ແຮງງານລາວທີ່ເດີນທາງມາຈາກປະເທດເພື່ອນບ້ານ ໃຫ້ມີແນວຄິດອຸ່ນອຽນທຸນທ່ຽງ ເຊື້ອໝັ້ນ ແລະ ປະຕິບັດຕາມຄຳສັ່ງຂອງຂັ້ນເທິງ ພ້ອມທັງຮຽກຮ້ອງໃຫ້ທຸກຄົນ ຈົ່ງເປັນເຈົ້າການໃນການປ້ອງກັນຕົນເອງ ເກັບຕົວໃນບ່ອນພັກຊົ່ວຄາວຕາມຄຳສັ່ງຂອງເຈົ້າໜ້າທີ່ຢ່າງເຂັ້ມງວດ ໃຫ້ຄົບ 14 ວັນ ຕ້ອງປະຕິບັດຕາມຄໍາແນະນໍາຂອງແພດໝໍ ເປັນຕົ້ນແມ່ນໝັ່ນລ້າງມືດ້ວຍເຈວລ້າງມື ຫຼືສະບູ່, ບໍ່ໃຫ້ສຳພັດຈຸດຕ່າງໆໃນຮ່າງຮ່າງໂດຍບໍ່ຈຳເປັນ ເຊັ່ນ: ຫູ, ຕາ, ດັງ, ປາກ, ມື, ພ້ອມນັ້ນ ຕ້ອງໃສ່ຜ້າອັດປາກອັດດັງ, ຫຼີກລ້ຽງໄປບ່ອນສະຖານທີ່ແອອັດ, ຫຼີກລ້ຽງການໃກ້ສິດກັບຄົນທີ່ມີອາການຄ້າຍໄຂ້ຫວັດ, ບໍ່ນຳໃຊ້ຂອງສ່ວນຕົວຮ່ວມກັບຄົນອື່ນ, ຜັກຜ່ອນໃຫ້ພຽງພໍ, ປຸງແຕ່ງອາຫານໃຫ້ສຸກ ພ້ອມນີ້ທ່ານຍັງໄດ້ເນັ້ນໜັກໃຫ້ແພດໝໍທີ່ປະຈຳແຕ່ລະສູນຕ້ອງຕິດຕາມຢ່າງໄກ້ຊິດ ແລະ ວັດແທກອູນຫະພູມໃຫ້ຜູ້ທີ່ຖືກເຝົ້າລະວັງເປັນປະຈຳທຸກວັນ, ກວດກາປະເມີນສຸຂະພາບຄືນໃໝ່ ໃຫ້ໝັ້ນໃຈວ່າທຸກຄົນມີຄວາມປອດໄພຈຶ່ງພ້ອມກັນກັບບ້ານກັບເຮືອນ ຫາຄອບຄົວຂອງຕົນເອງ ພ້ອມນັ້ນຍັງໄດ້ຮຽກຮ້ອງມາຍັງພາກສ່ວນຮັບຜິດຊອບ ໃຫ້ເອົາໃຈໃສ່ເຮັດວຽກງານ ການເມືອງນຳພາແນວຄິດແກ່ພໍ່ແມ່ປະຊາຊົນ ແລະ ຜູ້ຖືກຈຳກັດບໍລິເວນ ເອົາໃຈໃສ່ໄກ້ສິດຕິດແທດ ແລະ ລາຍງານສະພາບການຕ່າງໆ ໃຫ້ຂັ້ນເທິງຮັບຊາບ ຈົນກວ່າຈະເຂົ້າສູ່ສະພາວະປົກກະຕິ.

 

Off

Comments are closed.