23rd Apr2020

ກອງປະຊຸມສະຫລຸບຖອດຖອນບົດຮຽນການປະຕິບັດວຽກງານ ຂອງຄະນະສະເພາະກິດຕ້ານ COVID-19 ຂັ້ນແຂວງ

by somchan

ໃນວັນທີ 22 ເມສາ 2020 ນີ້ ຄະນະສະເພາະກິດຄວບຄຸມ, ຕ້ານ ແລະ ສະກັດກັ້ນ ພະຍາດ COVID-19 ຂັ້ນແຂວງ ສະຫລຸບຖອດຖອນບົດຮຽນການປະຕິບັດວຽກງານໃນໄລຍະຜ່ານມາ ຢູ່ທີ່ຫ້ອງປະຊຸມ ບໍລິສັດ ສະຕ່າ ໂທລະຄົມ ສາຂາແຂວງວຽງຈັນ  ບ້ານ ນາເຄືອ ເມືອງ ວຽງຄຳ ແຂວງວຽງຈັນ ໂດຍການເປັນປະທານຂອງ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ, ມີບັນດາຄະນະສະເພາະກິດຕ້ານໂຄວິດ19 ຂັ້ນແຂວງ, ຂັ້ນເມືອງເຂົ້າຮ່ວມ.

ທ່ານ ບຸນສອນ ເພັດລາວັນ ຮອງເຈົ້າແຂວງໆວຽງຈັນ ປະທານຄະນະສະເພາະກິດຄວບຄຸມ,ຕ້ານ ແລະ ສະກັດກັ້ນພະຍາດໂຄວິດ-19 ຂັ້ນແຂວງ ໄດ້ລາຍງານການຈັດຕັ້ງປະຕິບັດວຽກງານການຕ້ານ ແລະ ສະກັດກັ້ນໂຄວິດ-19 ໃນໄລຍະທີ 1 ຜ່ານມາ ນັບແຕ່ວັນທີ 1-19 ເມສາ 2020.

ພ້ອມທັງຮັບຟັງການລາຍງານຂອງຄະນະສະເພາະກິດແຕ່ລະເມືອງທີ່ໄດ້ລາຍງານໂດຍຜ່ານລະບົບອອນລາຍ, ໄລຍະຜ່ານມາເຫັນວ່າຄະນະສະເພາະກິດຄວບຄຸມ, ຕ້ານ ແລະ ສະກັດກັ້ນ ພະຍາດ COVID-19 ຂັ້ນແຂວງ ໄດ້ເອົາໃຈໃສ່ປະຕິບັດຄຳສັ່ງເລກທີ 06/ນຍ ແລະ ຄຳສັ່ງເລກທີ 015/ຈຂ.ວຈ ໂດຍໄດ້ລົງຕິດຕາມຊຸກຍູ້ ບັນດາເມືອງ ໃນການຈັດຕັ້ງຜັນຂະຫຍາຍຄໍາສັ່ງຄຳແນະນໍາ, ຄວາມພ້ອມໃນການປ້ອງກັນ ສົມທົບກັບເມືອງແຈ້ງບ້ານທີ່ມີປະຊາຊົນຫຼາຍ, ເພື່ອຮັບຟັງການໃຫ້ສຸຂະສຶກສາມາດຕະການ, ວິທີປ້ອງກັນCOVID-19 ແບບເຂົ້າໃຈງ່າຍ, ມີການຮ່ວມມືຈາກພໍ່ແມ່ປະຊາຊົນ ຕີລາຄາໄດ້ 80% , ມີພະນັກງານແພດໝໍຮັບໃຊ້ນັບແຕ່ຂັ້ນແຂວງ, ຂັ້ນເມືອງ, ຂັ້ນບ້ານ, ມີອຸປະກອນຮັບໃຊ້ທີ່ຈໍາເປັນຈໍານວນຫນຶ່ງເຊັ່ນ: ຜ້າອັດປາກ, ເຈວລ້າງມື, ນ້ຳຢາຂ້າເຊື້ອ, ເຄື່ອງວັດແທກອຸນຫະພູມ, ໄລຍະຜ່ານມາແຂວງວຽງຈັນ ມີຈຳນວນຜູ້ທີ່ສົງໃສ ແລະ ເອົາຕົວຢ່າງໄປກວດ ລວມ 14 ຄົນ: ໃນນີ້ກວດຢູ່ໂຮງຫມໍແຂວງ 6 ຄົນ, ໂຮງຫມໍເມືອງ ໂພນໂຮງ 5 ຄົນ ແລະ ເມືອງ ວັງວຽງ 3 ຄົນ ( ຜົນການກວດບໍ່ພົບເຊື້ອ), ໃນກອງປະຊຸມຍັງໄດ້ວາງທິດທາງ-ແຜນການຈັດຕັ້ງປະຕິບັດໃນໄລຍະທີ 2 ແຕ່ວັນທີ 20 ເມສາ 2020 – ວັນທີ 3 ພຶດສະພາ 2020, ທີ່ຈະຕ້ອງໄດ້ພ້ອມກັນເອົາໃຈໃສ່ສືບຕໍ່ເຝົ້າລະວັງຢ່າງເຂັ້ມງວດຕື່ມອີກ ເພື່ອບໍ່ໃຫ້ປະຊາຊົນຖືເບົາ ຫຼື ເກີດຄວາມປະມາດ ໃນທ່າມກາງທີ່ທົ່ວໂລກຍັງສືບຕໍ່ມີການລະບາດເປັນວົງກວ້າງ, ຕອນທ້າຍຍັງໄດ້ຮັບຟັງການມີຄຳເຫັນຊີ້ນຳຂອງທ່ານເຈົ້າແຂວງຕື່ມອີກ.

Off

Comments are closed.