11th Jun2021

ສານ ຂອງທ່ານ ນາຍົກລັດຖະມົນຕີ ແຫ່ງ ສປປ ລາວ ເນື່ອງໃນ ວັນຕ້ານການນໍາໃຊ້ແຮງງານເດັກສາກົນ (12 ມິຖຸນາ ) ປີ 2021

by somchan

ເນື່ອງໃນໂອກາດວັນຕ້ານການນໍາໃຊ້ແຮງງານເດັກສາກົນ ວັນທີ 12 ມິຖຸນາ ທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງ, ຂ້າພະເຈົ້າ ຕາງໜ້າໃຫ້ ພັກ ແລະ ລັດຖະບານ ຂໍຝາກຄວາມສາມັກຄີຮັກແພງ ແລະ ຄວາມຢ້ຽມຢາມຖາມຂ່າວອັບອົບອຸ່ນມາຍັງພວກລູກໆຫລານໆ ເດັກນ້ອຍລາວບັນດາ ເຜົ່າ ທຸກຖ້ວນໜ້າໃນທົ່ວປະເທດ.

(more…)

Off
06th Jun2021

ແຮງງານນອກລະບົບ ແລະ ຜູ້ທຸກຍາກ ອຸ່ນໃຈໄດ້ ລັດພວມເລັ່ງຊ່ວຍເຫລືອ

by somchan

ການແພ່ລະບາດພະຍາດໂຄວິດ-19 ຮອບສອງ ປີນີ້, ໄດ້ສົ່ງຜົນກະທົບຕໍ່ແຮງງານ ແລະ ຫົວໜ່ວຍທຸລະກິດຢ່າງໜັກ ເຮັດໃຫ້ມີແຮງງານຖືກໂຈະວຽກເຖິງ 50.000 ກວ່າຄົນ ສະເພາະຢູ່ນະຄອນຫລວງວຽງຈັນ ມີຫົວໜ່ວຍແຮງງານຈໍານວນໜຶ່ງໄດ້ຢຸດກິດຈະການ ເຊັ່ນ:ໂຮງງານຕັດຫຍິບ 11 ແຫ່ງ, ໂຮງງານຜະລິດເຫລັກ 2 ແຫ່ງ ແລະ ມີແຮງງານ 10.000 ຄົນຖືກໂຈະວຽກ. ແນ່ນອນເມື່ອ ບໍ່ໄດ້ເຮັດວຽກ ລາຍຮັບກໍ່ບໍ່ມີ ຈຶ່ງສົ່ງຜົນກະທົບຢ່າງໜັກຕໍ່ການດໍາລົງຊີວິດຂອງເຂົາເຈົ້າ. ສໍາລັບແຮງງານ ທີ່ຢູ່ລະບົບປະກັນສັງຄົມ ຫລື ເປັນສະມາຊິກປະກັນສັງຄົມແມ່ນໄດ້ຮັບການຊ່ວຍເຫລືອ ຕາມລະບຽບການຂອງກະຊວງແຮງງານ ແລະ ສະຫວັດດີການສັງຄົມ. ແຕ່ສິ່ງທີ່ໜ້າເປັນຫວງແມ່ນແຮງງານນອກລະບົບທີ່ມີເກືອບ 2 ພັນຄົນ ຈະໄດ້ຮັບການຊ່ວຍແນວໃດ. (more…)

Off
06th Jun2021

ປະຊາຊົນລາຍຮັບໜ້ອຍ ຈະໄດ້ຮັບນະໂຍບາຍສິນເຊື່ອໄລຍະລະບາດໂຄວິດ-19

by somchan

ຈາກການລະບາດພະຍາດໂຄວິດ-19 ແມ່ນໄດ້ສ້າງຜົນກະທົບຫຼາຍດ້ານຕໍ່ປະຊາຊົນລາວບັນດາເຜົ່າ ເພາະບໍ່ໄດ້ກະທົບພຽງແຕ່ສຸຂະພາບກາຍ ແລະ ຈິດໃຈຂອງຄົນໃນສັງຄົມເທົ່ານັ້ນ ມັນຍັງກະທົບຕໍ່ການດຳລົງຊີວິດ ບັນຫາປາກທ້ອງຂອງປະຊາຊົນອີກດ້ວຍ, ໂຄວິດ-19ກໍ່ຢ້ານປາກທ້ອງຂອງຄົນໃນຄອບຄົວກໍ່ສຳຄັນ ຈຶ່ງເຮັດໃຫ້ຜູ້ມີລາຍຮັບໜ້ອຍ ຜູ້ຫາເຊົ້າກິນຄ່ຳ ຖືກກະທົບຢ່າງໜັກ. (more…)

Off
02nd Jun2021

ຈັດຕັ້ງການສະເຫຼີມສະຫຼອງວັນເດັກສາກົນ ຕິດພັນກັບການເອົາໃຈໃສ່ເບິ່ງແຍງ ແລະ ການພັດທະນາເດັກນ້ອຍລາວ

by somchan

ວັນ​ເດັກ​ສາກົນ ແມ່ນ​ເຫດການໜຶ່ງ ທີ່​ມີ​ຄວາມຫມາຍ ແນ​ໃສ່​ບັນລຸ​ໃຫ້​ໄດ້ຈຸດປະສົງ ​ທັງ​ປົກ​ປ້ອງ ​ແລະ ​ສັນລະ​ເສີນ​ເດັກໃນ​ທົ່ວ​ໂລກ; ຍ້ອນ​ເຫັນ​ໄດ້ຄວາມ​ສໍາຄັນ​ຂອງ​ເດັກ ທີ່​ເປັນຫນໍ່​ແຫນ​ແຫ່ງ​ຊີວິດ​ໃນ​ມື້ນີ້ ​ເພື່ອ​ກາຍ​ເປັນ​ອະນາຄົດອັນ​ແຈ່ມ​ໃສຂອງ​ປະ​ເທດ​ຊາດ​ໃນ​ມື້ຫນ້າ ບັນດາ​ປະຊາ​ຊາດ​ໃນ​ທົ່ວ​ໂລກຈຶ່ງໄດ້​ມີ​ການສະ​ເຫລີມສະຫລອງວັນ​ເດັກສາກົນ ຕາມ​ເງື່ອນ​ໄຂ​ຕົວ​ຈິງ​ຂອງ​ປະ​ເທດ​ຕົນ. ແຕ່ວ່າ ການສະເຫຼີມສະຫຼອງວັນເດັກສາກົນ ໃນປີ 2021 ນີ້ ກໍອາດຈະມີຄວາມແຕກຕ່າງຈາກ ໃນທຸກໆປີທີ່ຜ່ານມາ, ເນື່ອງຈາກ ບັນດາປະຊາຊາດໃນໂລກ ລວມເຖິງ ສປປ ລາວ ລ້ວນແຕ່ໄດ້ຮັບຜົນກະທົບທີ່ໜັກໜ່ວງ ແລະ ກໍພວມຢູ່ໃນໄລຍະທີ່ຍັງມີການຕໍ່ສູ້ກັບໄພຄຸກຄາມ ຂອງການແຜ່ລະບາດຂອງພະຍາດໂຄວິດ-19; ດັ່ງນັ້ນ ຈິ່ງບໍ່ໄດ້ຮັບອະນຸຍາດໃຫ້ມີການໂຮມຊຸມນຸມ ແລະ ຈັດງານ ຫຼື ກິດຈະກຳຕ່າງໆ.

​​ສຳລັບ ຄວາມເປັນມາຂອງວັນເດັກສາກົນກໍຄື ເລີ່ມຈາກໃນ​ກອງ​ປະຊຸມສະມັດຊາ​ໃຫຍ່​ຂອງ​ສັນນິບາດ​ນາໆຊາດ, ​ໃນ​ວັນ​ທີ 16 ກັນຍາ 1924 ​ໄດ້​ຮັບຮອງ​ເອົາຖະ​ແຫງການ​ເຊີ​ແນວ ກ່ຽວກັບ​ສິດທິ​ຂອງ​ເດັກ ​ເປັນຄັ້ງທໍາ​ອິດ ເຊິ່ງ​ໄດ້​ປະກາດ​ວ່າ​ ເດັກ​ມີ​ຄວາມ​ຕ້ອງການ​ໃນການ​ປ້ອງ​ກັນ ​ແລະ ດູ​ແລ​ເບິ່​ແຍງ​ເປັນ​ພິ​ເສດ ລວມທັງ​ການ​ປົກ​ປ້ອງ​ທີ່​ເຫມາະສົມທາງ​ດ້ານ​ກົດໝາຍກ່ອນ​ເກີດ ​ແລະ ລັ​ເກີດ ຍ້ອນ​ວ່າ​ເດັກ​ຍັງ​ບໍ່​ທັນ​ມີ​ວຸດ​ທິພາ​ວະ ​ທີ່ສົມບູນ​ຄົບ​ຖ້ວນທາງ​ດ້ານ​ຮ່າງກາຍ ​ແລະ ຈິດ​ໃຈ.ໃນ​ປີ​ຕໍ່​ມາ​ອງປະຊຸມ​ໂລກຄັ້ງທໍາ​ອິດ ເພື່ອ​ຄວາມ​ເປັນ​ຢູ່​ທີ່​ດີ​ຂອງ​ເດັກ ໄດ້ຈັດ​ຂຶ້ນຢູ່ທີ່ເຊີ​ແນວ, ປະ​ເທດ​ສະ​ວິດ​ເຊີ​ແລນ ໃນ​ວັນ​ທີ 1 ມິຖຸນາ 1925 ແລະ ກໍໄດ້​ປະກາດ​ເອົາວັນດັ່ງກ່າວເປັນ​ວັນ​ເດັກ​ສາກົນ. ມາຮອດເດືອນ​ພະຈິກ 1949 ກອ​ປະຊຸມ​ໃຫຍ່​ຂອງ​ສະຫະພັນ​ແມ່ຍິງປະຊາທິປະ​ໄຕ​ສາກົນ ທີ່ນະຄອນຫລວງມົດ​ສະ​ກູ, ສະຫະພາບ​ໂຊ​ວຽດ ໃນເມື່ອກ່ອນ ກໍຄືລັດເຊຍ ໃນປັດຈຸບັນ ກໍໄດ້​ປະກາດ​ເອົາ​ວັນ​ທີ 1 ມິຖຸນາ ​ເປັນ​ວັນ​ເດັກ​ສາກົນ​ອີກ​ເທື່ອ​ໜຶ່ງ ຈຸດປະສົງກໍເພື່ອ​ປົກ​ປ້ອງ​ເດັກ-ສັນລະເສີນເດັກ ແລະ ເລີ່ມຈັດຕັ້ງປະຕິບັດນັບແຕ່​ປີ1950 ​ເປັນຕົ້ນ​ມາ.

ສຳລັບ ສປປ ລາວ ກໍໄດ້ມີມູນເຊື້ອຈັດຕັ້ງປະຕິບັດການສະເຫລີມສະຫລອງວັນເດັກສາກົນ ທີ 1 ມິຖຸນາ ນັບແຕ່ສະໄໝຕໍ່ສູ້ກູ້ຊາດຈົນເຖິງປະຈຸບັນ. ສະເພາະພາຍຫລັງ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975, ພັກ-ລັດ ໄດ້ຖືເອົາການສະເຫລີມສະຫລອງວັນເດັກສາກົນໃນແຕ່ລະປີ ເປັນໂອກາດອັນດີໃຫ້ໄດ້ທົບທວນຄືນການຈັດຕັ້ງປະຕິບັດແນວທາງນະໂຍບາຍຂອງພັກ, ກົດຫມາຍຂອງລັດ ແລະ ແຜນພັດທະນາເສດຖະກິດ-ສັງຄົມໃນແຕ່ລະໄລຍະ ລວມທັງເປົ້າໝາຍການພັດທະນາແບບຍືນຍົງ ທີ່ພົວພັນເຖິງວຽກແມ່ ແລະ ເດັກ ກໍຄືສົນທິສັນຍາສາກົນ ແລະ ພາກພື້ນອາຊຽນ ກ່ຽວກັບເດັກ ທີ່ ສປປ ລາວ ເປັນພາຄີ ເປັນຕົ້ນ ສົນທສັນຍາວ່າດ້ວຍສິດທິເດັກ ຈຸດປະສົງເພື່ອຮັບປະກັນການຢູ່ລອດ, ການພັດທະນາ, ການປົກປ້ອງ ແລະ ການມີສ່ວນຮ່ວມ ຂອງເດັກລາວບັນດາເຜົ່າ ໃຫ້ມີໄວເດັກທີ່ເຕັມໄປດ້ວຍຄວາມຜາສຸກ, ຄວາມອົບອຸ່ນ ແລະ ການດູແລເບິ່ງແຍງເປັນຢ່າງດີຈາກພໍ່-ແມ່, ຍາດຕິພີ່ນ້ອງໃນຄອບຄົວ, ສັງຄົມ ແລະ ການຈັດຕັ້ງທຸກຂັ້ນ. ນອກຈາກນັ້ນ, ພາກສ່ວນກ່ຽວຂ້ອງ ຍັງໄດ້ເຮັດໜ້າທີ່ໃນການສຳຫລວດກວດກາຄືນຄວາມຮັບຜິດຊອບຂອງຕົນໃນວຽກງານການເບິ່ງແຍງດູແລ ແລະ ການໃຫ້ບໍລິການຕໍ່ແມ່ ແລະ ເດັກ ໃນການປົກປ້ອງ ແລະ ປ້ອງກັນເດັກຈາກສິ່ງຫຍໍ້ທໍ້ ແລະ ໄພສັງຄົມທີ່ບໍ່ເພິ່ງປາດຖະຫນາທັງຫລາຍ ໃຫ້ມີປະສິດທິຜົນດີຂຶ້ນ ໂດຍຖືເອົາຜົນປະໂຫຍດສູງສຸດຂອງເດັກ ເປັນບ່ອນອີງໃນການພິຈາລະນາແລະ ແກ້ໄຂບັນຫາຕ່າງໆກ່ຽວຂ້ອງກັບເດັກທີ່ເກີດຂຶ້ນ.

ການສະເຫຼີມສະຫຼອງວັນເດັກສາກົນ ຂອງທຸກໆປີ ພັກ, ລັດຖະບານ, ການຈັດຕັ້ງທາງສັງຄົມ ແລະ ພາກສ່ວນທີ່ກ່ຽວຂ້ອງຍັງໄດ້ມີການຈັດຕັ້ງເຄື່ອນໄຫວໂຄສະນາເຜີຍແຜ່ ກ່ຽວກັບແນວທາງນະໂຍບາຍຂອງພັກ-ລັດ, ບັນດານິຕິກຳ ກໍຄືສົນທິສັນຍາສາກົນຕ່າງໆທີ່ພົວພັນເຖິງເດັກ ເປັນຕົ້ນ ສົນທິສັນຍາວ່າດ້ວຍສິດທິເດັກ ແລະ ອະນຸສັນຍາທີ່ກ່ຽວຂ້ອງ ຜ່ານສື່ຕ່າງໆ ພ້ອມທັງຈັດງານໂຮມຊຸມນຸມ ແລະ ຈັດກິດຈະກຳຕ່າງໆ ເຊັ່ນ: ການສະແດງສິລະປະ-ວັນນະຄະດີ ໂດຍສະເພາະແມ່ນການຮ້ອງເພງ, ຂັບລຳ ແລະ ສະແດງບົດຟ້ອນ ນອກນີ້ ຍັງມີການຫຼີ້ນກິລາກາຍຍະກຳ ແລະ ອື່ນໆ ເພື່ອໃຫ້ເດັກມີຄວາມກ້າສະແດງອອກໃນສິ່ງທີ່ເປັນພອນສະຫວັນຂອງຕົນ ແລະ ເຮັດໃຫ້ເດັກໄດ້ມີສ່ວນຮ່ວມໃນການຄິດ, ຈິນຕະນາການ ແລະ ພັດທະນາຕົນເອງ; ໂດຍແນໃສ່ປູກຈິດສຳນຶກທີ່ຖືກຕ້ອງໃນທົ່ວສັງຄົມ ກ່ຽວກັບສິດທິຂອງເດັກ ແລະ ຄວາມຮັບຜິດຊອບຂອງແຕ່ລະພາກສ່ວນຕໍ່ເດັກ ກ້າວໄປເຖິງການປ່ຽນແປງຈິນຕະນາການອັນເກົ່າແກ່ຫລ້າຫລັງ ແລະ ຮີດຄອງປະເພນີດັ່ງເດີມທີ່ຍັງຫລົງເຫລືຢູ່ໃນຈິດສຳນຶກຂອງຄົນຈຳນວນໜຶ່ງໃນສັງຄົມ ທີ່ບໍ່ທັນເຫັນໄດ້ຄວາມສຳຄັນເທົ່າທີ່ຄວນຂອງເດັກໃນການປັບປຸງສະຖາບັນຄອບຄົວ ໂດຍການໃຫ້ໂອກາດເທົ່າທຽມກັນລະຫວ່າງເດັກຍິງ ແລະ ເດັກຊາຍ; ຍິ່ງໄປກວ່ານັ້ນ, ພັດຍັງໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ແລະ ຍັງມີກໍລະນີເຂົ້າຮ່ວມຄ້າຂາຍຢາເສບຕິດໃນກຸ່ມເດັກ, ການຄ້າຂາຍເດັກ, ການຄ້າປະເວນີ ແລະ ສິ່ງລາມົກອານາຈານກ່ຽວກັບເດັກ ກໍຄືການຂູດຮີດແຮງງານເດັກ.

ນອກນີ້ ການສະເຫຼີມສະຫຼອງວັນເດັກສາກົນ ຍັງຕ້ອງໄດ້ຄຳນຶ່ງເຖິງກຸ່ມເດັກທີ່ດ້ອຍໂອກາດ ເຊັ່ນ: ເດັກພິການ, ເດັກກຳພ້າກຳພ້ອຍ, ເດັກທີ່ຖືກປະຖີ້ມ, ເດັກທີ່ຢູ່ໃນກຸ່ມສ່ຽງ, ເດັກຢູ່ເຂດທຸກຍາກ ແລະ ເຂດຫ່າງໄກສອກຫລີກ ໃຫ້ໄດ້ຮັບຜົນປະໂຫຍດ ແລະ ການມີສ່ວນຮ່ວມຢ່າງເຕັມສ່ວນໃນທຸກກິດຈະກໍາການເຄື່ອນໄຫວປົກກະຕິຂອງເດັກໃນຂອບເຂດທົ່ວປະເທດ ເພື່ອຮັບປະກັນເຮັດໃຫ້ເດັກນ້ອຍລາວທຸກຄົນໄດ້ຮັບການຊ່ວຍເຫຼືອກ່ຽວກັບການກັນພະຍາດ ແລະ ສົ່ງເສີມສຸຂະພາບ ໄປພ້ອມກັບການປິ່ນປົວແບບມີຄຸນນະພາບ ແລະ ການບໍລິການດ້ານສາທາລະນະສຸກຢ່າງທົ່ວເຖິງເດັກທຸກຄົນໃນສັງຄົມ. ເຮັດໃຫ້ເດັກມີສຸຂະພາບ ແລະ ໂພຊະນາການທີ່ດີ. ເພື່ອສູ້ຊົນພັດທະນາເດັກຮຸ້ນໃໝ່ ໃຫ້ມີຄວາມແຂງແຮງທາງຮ່າງກາຍ, ມີພະລານາໄມສົມບູນ, ມີຄວາມສີວິໄລທາງດ້ານຈິດໃຈ, ມີແນວຄິດ ແລະ ຄຸນສົມບັດສິນທຳປະຕິວັດ, ມີຊີວະທັດ ແລະ ໂລກະທັດທີ່ກ້າວໜ້າ ຮູ້ນຳໃຊ້ວິທະຍາສາດເຕັກໂນໂລຊີ ຢ່າງຖືກຕ້ອງ ແລະ ເໝາະສົມ.

ເຖິງວ່າ ການສະເຫຼີມສະຫຼອງວັນເດັກສາກົນ ໃນປີນີ້ ຈະບໍ່ໄດ້ຮັບອະນຸຍາດໃຫ້ມີການໂຮມຊຸມນຸມ ແລະ ຈັດງານ ຫຼື ກິດຈະກຳຕ່າງໆ ກໍຕາມ ສິ່ງສຳຄັນກໍຄື ຍັງຕ້ອງໄດ້ສືບຕໍ່ໃຫ້ຄວາມສຳຄັນ ແລະ ເອົາໃຈໃສ່ໃນການຈັດຕັ້ງປະຕິບັດແນວທາງນະໂຍບາຍຂອງພັກ, ກົດຫມາຍຂອງລັດ ແລະ ແຜນພັດທະນາເສດຖະກິດ-ສັງຄົມໃນແຕ່ລະໄລຍະ ລວມທັງເປົ້າໝາຍການພັດທະນາແບບຍືນຍົງ ທີ່ພົວພັນເຖິງວຽກແມ່ ແລະ ເດັກ ກໍຄືສົນທິສັນຍາສາກົນ ແລະ ພາກພື້ນອາຊຽນ ກ່ຽວກັບເດັກ ທີ່ ສປປ ລາວ ເປັນພາຄີ ເປັນຕົ້ນ ສົນທິສັນຍາວ່າດ້ວຍສິດທິເດັກ ຈຸດປະສົງເພື່ອຮັບປະກັນການຢູ່ລອດ, ການພັດທະນາ, ການປົກປ້ອງ ແລະ ການມີສ່ວນຮ່ວມ ຂອງເດັກລາວບັນດາເຜົ່າ ໃຫ້ມີໄວເດັກທີ່ເຕັມໄປດ້ວຍຄວາມຜາສຸກ, ຄວາມອົບອຸ່ນ ແລະ ການດູແລເບິ່ງແຍງເປັນຢ່າງດີຈາກພໍ່-ແມ່, ຍາດຕິພີ່ນ້ອງໃນຄອບຄົວ, ສັງຄົມ ແລະ ການຈັດຕັ້ງທຸກຂັ້ນ. ນອກຈາກນັ້ນ, ພາກສ່ວນກ່ຽວຂ້ອງ ຍັງໄດ້ສືບຕໍ່ເຮັດໜ້າທີ່ຂອງຕົນໃນວຽກງານການເບິ່ງແຍງດູແລ ແລະ ການໃຫ້ບໍລິການຕໍ່ແມ່ ແລະ ເດັກ ໃນການປົກປ້ອງ ແລະ ປ້ອງກັນເດັກຈາກສິ່ງຫຍໍ້ທໍ້ ແລະ ໄພສັງຄົມທີ່ບໍ່ເພິ່ງປາດຖະຫນາທັງຫລາຍ ໃຫ້ມີປະສິດທິຜົນດີຂຶ້ນ ໂດຍຖືເອົາຜົນປະໂຫຍດສູງສຸດຂອງເດັກ ເປັນບ່ອນອີງໃນການພິຈາລະນາ ແລະ ແກ້ໄຂບັນຫາຕ່າງໆກ່ຽວຂ້ອງກັບເດັກທີ່ເກີດຂຶ້ນ. ພ້ອມທັງ ສຸມໃສ່ໂຄສະນາເຜີຍແຜ່ ກ່ຽວກັບແນວທາງນະໂຍບາຍຂອງພັກ-ລັດ, ບັນດານິຕິກຳ ກໍຄືສົນທິສັນຍາສາກົນຕ່າງໆທີ່ພົວພັນເຖິງເດັກ ເປັນຕົ້ນ ສົນທິສັນຍາວ່າດ້ວຍສິດທິເດັກ ແລະ ອະນຸສັນຍາທີ່ກ່ຽວຂ້ອງ ຜ່ານສື່ຕ່າງໆ ໂດຍແນໃສ່ປູກຈິດສຳນຶກທີ່ຖືກຕ້ອງໃນທົ່ວສັງຄົມ ກ່ຽວກັບສິດທິຂອງເດັກ ແລະ ຄວາມຮັບຜິດຊອບຂອງແຕ່ລະພາກສ່ວນຕໍ່ເດັກ ໃຫ້ເຫັນໄດ້ຄວາມສໍາຄັນຂອງເດັກ ທີ່ເປັນຫນໍ່ແຫນງແຫ່ງຊີວິດໃນມື້ນີ້ ເພື່ອກາຍເປັນອະນາຄົດອັນແຈ່ມໃສຂອງປະເທດຊາດໃນມື້ຫນ້າ.

Off
02nd Jun2021

ປ່າໄມ້ມີບົດບາດສຳຄັນ ຕໍ່ການພັດທະນາ ເສດຖະກິດ-ສັງຄົມແຫ່ງຊາດ, ຕໍ່ການຮັກສາດິນ, ແຫລ່ງນໍ້າ ແລະ ຊີວິດນາໆພັນ ໃຫ້ມີຄວາມອຸດົມສົມບູນ ແລະ ຍືນຍົງ

by somchan

ການປູກຕົ້ນໄມ້ນອກຈາກຈະປູກໄດ້ທຸກໆວັນແລ້ວ ກໍຕ້ອງໄດ້ມີການຄຸ້ມຄອງ ແລະ ປົກປັກຮັກສາ ເພື່ອໃຫ້ມັນເຕີບໃຫຍ່ກາຍເປັນປ່າໄມ້ ໃຫ້ຄວາມອຸດົມສົມບູນພ້ອມທັງສາມາດຕອບສະໜອງຄວາມຮຽກຮ້ອຕ້ອງການວັດຖຸດິບດ້ານໄມ້ ແລະ ຜະລິດຕະຜົນ ປ່າໄມ້ໄດ້ຢ່າງຍືນຍົງ ແລະ ບໍ່ມີວັນບົກແຫ້ງແລ້ວ ຍັງເຮັດໃຫ້ຊັບພະຍາກອນປ່າໄມ້ ເຊິ່ງເປັນສ່ວນປະກອບອັນ ສຳຄັນໃນການພັດທະນາເສດຖະກິດຂອງຊາດ ມີຄວາມຍືນຍົງ ແລະ ເປັນການປ້ອງກັນການປ່ຽນແປງດິນຟ້າອາກາດ ພ້ອມທັງປົກປັກຮັກສາສິ່ງແວດລ້ອມທຳມະຊາດໃຫ້ມີຄວາມອຸດົມສົມບູນ ເຊິ່ງສາມາດເວົ້າໄດ້ວ່າ ປ່າໄມ້ມີບົດບາດສຳຄັນ ຕໍ່ການພັດທະນາ ເສດຖະກິດ-ສັງຄົມແຫ່ງຊາດ, ຕໍ່ການຮັກສາດິນ, ແຫລ່ງນໍ້າ ແລະ ຊີວິດນາໆພັນ ໃຫ້ມີຄວາມອຸດົມສົມບູນ ແລະ ຍືນຍົງ.

 

 ເມື່ອເວົ້າເຖິງການປູກຕົ້ນໄມ້  ບໍ່ວ່າຈະເປັນ ການປູກໄວ້ຮົ່ມ, ປະດັບເອ້ສວຍງາມ, ເພື່ອກິນໝາກ ກໍຄືໄມ້ອຸດສາຫະກຳ ບໍ່ຈຳເປັນຕ້ອງປູກໃນວັນປູກຕົ້ນໄມ້ແຫ່ງຊາດຢ່າງດຽວ ທຸກຄົນສາມາດປູກໄດ້ທຸກໆວັນ ແຕ່ສິ່ງສຳຄັນຄື ເມື່ອປູກແລ້ວ ກໍລ້ວນແຕ່ຕ້ອງມີການຄຸ້ມຄອງ, ບົວລະບັດ ແລະ ປົກປັກຮັກສາເອົາຈິງເອົາຈັງ ຈຶ່ງຈະບັນລຸຜົນຕາມເປົ້າໝາຍຄືເຮັດໃຫ້ຕົ້ນໄມ້ທີ່ປູກນັ້ນສາມາດເຕີບໃຫຍ່ເນື່ອງຈາກທີ່ຜ່ານມາມີຫລາຍບ່ອນປະຕິບັດໄດ້ດີ, ແຕ່ກໍ່ຍັງມີຈໍານວນໜຶ່ງເຫັນວ່າຍັງບໍ່ທັນເຮັດໄດ້ດີເທົ່າທີ່ຄວນ ເປັນຕົ້ນແມ່ນຂອດການຄຸ້ມຄອງ-ບົວລະບັດ ແລະ ປົກປັກຮັກສາເບ້ຍໄມ້, ຕົ້ນໄມ້ທີ່ປູກລົງດີນ ເພື່ອການປະດັບເອ້ ເພື່ອຄວາມສວຍງາມ ແລະ ໃຫ້ຮົ່ມໃນເຂດທາງຫລວງບາງເສັ້ນຍັງບໍ່ທັນ ບັນລຸເປົ້າໝາຍການສ້າງເຂດສີຂຽວ ຫຼືເວົ້າວ່າ ມີພຽງຈຳນວນໜຶ່ງເທົ່ານັ້ນທີ່ລອດຕາຍ.

 

 ສຳລັບຍຸດທະສາດປ່າໄມ້ ຂອງ ສປປ ລາວ ໄດ້ກຳນົດຄາດໝາຍສູ້ຊົນໃນແຕ່ລະໄລຍະ ເພື່ອຍົກລະດັບຄວາມປົກຫຸ້ມປ່າໄມ້ ຂອງເນື້ອທີ່ທົ່ວປະເທດ ຕາມທິດການພັດທະນາ ແບບຍືນຍົງ ແລະ ການເຕີບໂຕສີຂຽວ ຂອງອົງການສະຫະປະຊາຊາດ, ໃນນັ້ນປະກອບມີ ປ່າສະຫງວນ, ປ່າປ້ອງກັນ, ປ່າຜະລິດ, ການຟື້ນຟູປ່າທຳມະຊາດ ແລະ ອື່ນໆ ດ້ວຍການສົ່ງເສີມ ພາກສ່ວນຕ່າງໆໃນສັງຄົມໃຫ້ເຂົ້າຮ່ວມປູກຕົ້ນໄມ້ ຕາມທ່າແຮງ ແລະ ເງື່ອນໄຂຕົວຈິງ.

 ການປູກໄມ້ ແລະ ຟື້ນຟູປ່າ ເຖິງວ່າມີຂະແໜງການກ່ຽວຂ້ອງ ຮັບຜິດຊອບໂດຍກົງ, ແຕ່ວຽກງານດັ່ງກ່າວ ກໍແມ່ນຄວາມຮັບຜິດຊອບ ຂອງຄົນລາວທຸກຄົນ ທີ່ຈະຕ້ອງປະກອບສ່ວນ. ທັງນີ້, ກໍຍ້ອນວ່າປ່າໄມ້ ແມ່ນຊັບພະຍາກອນ ທໍາມະຊາດອັນລໍ້າຄ່າ, ເປັນມໍລະດົກຕົກທອດ ຈາກບັນພະບຸລຸດຂອງພວກເຮົາ; ປ່າໄມ້ເປັນເຫງົ້າພະລັງ ຂອງລະບົບນິເວດທຳມະຊາດ ແລະ ມີບົດບາດສຳຄັນ ທີ່ສຸດຕໍ່ການພັດທະນາ ເສດຖະກິດ-ສັງຄົມແຫ່ງຊາດ, ຕໍ່ການປົກປັກຮັກສາດິນ, ແຫລ່ງນໍ້າ ແລະ ຊີວິດນາໆພັນ ໃຫ້ມີຄວາມອຸດົມສົມບູນ ແລະ ຍືນຍົງ, ກໍຄືຄວາມສຳຄັນຕໍ່ການປ້ອງກັນການປ່ຽນແປງດິນຟ້າອາກາດ;  ນອກນີ້ ປ່າໄມ້ຍັງປະກອບສ່ວນຢ່າງໃຫຍ່ຫລວງຕໍ່ການພັດທະນາຊີວິດການເປັນຢູ່ຂອງປະຊາຊົນໃນຊົນນະບົດ ເຊິ່ງບໍ່ພຽງແຕ່ນຳໃຊ້ໄມ້ ເພື່ອປຸກສ້າງເຮືອນຊານເທົ່ານັ້ນ, ແຕ່ຍັງອາໄສເປັນ ແຫລ່ງທຳມາຫາກິນ, ເປັນແຫລ່ງ ຊອກຫາຢາພື້ນເມືອງ ແລະ ເຄື່ອງປ່າຂອງດົງ ເພື່ອສ້າງລາຍຮັບ ໃຫ້ຄອບຄົວປະກອບສ່ວນເຂົ້າໃນການແກ້ໄຂຄວາມທຸກຍາກເປັນກ້າວໆ.

Off
02nd Jun2021

ຮ່ວມກັນປູກຕົ້ນໄມ້ ຢ່າງເປັນຂະບວນຟົດຟື້ນ

by somchan

 ວັນທີ 1 ມິຖຸນາ ຂອງທຸກປີ ເປັນວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ; ເວົ້າສະເພາະ ວັນປູກຕົ້ນໄມ້ແຫ່ງຊາດ ໃນແຕ່ລະປີ ໂດຍອີງໃສ່ ແນວທາງນະໂຍບາຍຂອງພັກລັດ ໃນການຜັນຂະຫຍາຍເນື້ອໃນກໍານົດກ່ຽວກັບການເກັບແກ່ນໄມ້, ຜະລິດເບ້ຍໄມ້, ການປູກໄມ້, ການຟື້ນຟູປ່າຊຸດໂຊມ ໃນເຂດປ່າຜະລິດ ແລະ ເຂດນອກ ເພື່ອສ້າງບາດກ້າວໃໝ່ ຄືບັນລຸເປົ້າໝາຍໃນການຂະຫຍາຍເນື້ອທີ່ປ່າປົກຫຸ້ມໃນຂອບເຂດທົ່ວປະເທດ.

 ພາຍຫລັງປະເທດຊາດ ໄດ້ຮັບການສະຖາປະນາ ເປັນສາທາລະນະລັດ ປະຊາທິປະໄຕ ປະຊາຊົນລາວ; ພັກ ແລະລັດຖະບານ ກໍ່ໄດ້ເອົາໃຈໃສ່ປົກປັກຮັກສາ, ຟື້ນຟູຊັບພະຍາກອນປ່າໄມ້ ໃຫ້ມີຄວາມຍືນຍົງ, ເພີ່ມຄວາມອຸດົມສົມບູນ ຕິດພັນກັບການພັດທະນາປະເທດຊາດ, ແນໃສ່ເຮັດໃຫ້ອັດຕາສ່ວນການປົກຫຸ້ມຂອງປ່າໄມ້ເພີ່ມຂຶ້ນໃນແຕ່ລະປີ ເຊິ່ງສະແດງໃຫ້ເຫັນຈະແຈ້ງກໍຄື ມະຕິກອງປະຊຸມໃຫຍ່ຂອງພັກທຸກຄັ້ງ ລ້ວນແຕ່ໄດ້ເນັ້ນໃສ່ການປົກປັກຮັກສາ ແລະ ຟື້ນຟູປ່າໄມ້ໃຫ້ມີຄວາມຍືນຍົງ ນອກນີ້ ລັດຖະບານຍັງໄດ້ມີນະໂຍບາຍ ໃນການປູກໄມ້, ການຄຸ້ມຄອງ, ປົກປັກຮັກສາແລະ ນຳໃຊ້ປ່າໄມ້ ້ວການຫລຸດຜ່ອນການຂຸດຄົ້ນໄມ້ ຈາກປ່າທຳມະຊາດ ແລ້ວຫັນມາປູກໄມ້ ເປັນການທົດແທນ ແລະ ນຳໃຊ້ເພື່ອໃຫ້ເປັນແຫລ່ງວັດຖຸດິບສະໜອງແກ່ໂຮງງານ ອຸດສາຫະກຳແລະ ເພື່ອເປັນການປົກປັກຮັກສາສິ່ງແວດລ້ອມ.

 ໃນນັ້ນ ສິ່ງສຳຄັນແມ່ນ ລັດຖະບານ ໄດ້ອອກຄຳສັ່ງວ່າດ້ວຍວຽກງານປ່າໄມ້ ແລະ ຂໍ້ກຳນົດລະບຽບການປົກປັກຮັກສາປ່າໄມ້ເພື່ອເພີ່ມການປົກຫຸ້ມຂອງປ່າໄມ້ໃຫ້ຫລາຍຂຶ້ນ; ໂດຍສະເພາະແມ່ນ ຄຳສັ່ງ ເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ,ກວດກາການຂຸດຄົ້ນໄມ້,ເຄື່ອນຍ້າຍໄມ້ແລະທຸລະກິດໄມ້; ພ້ອມດຽວກັນ ຍັງໄດ້ອອກ ມະຕິຕົກລົງ ວ່າດ້ວຍວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ແລະ ຄຳສັ່ງກ່ຽວກັບການສ້າງຂະບວນການປູກໄມ້ ແລະ ຟື້ນຟູປ່າທຳມະຊາດ ເນື່ອງໃນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ເພື່ອໃຫ້ບັນດາກະຊວງ,ສຳນັກງານ-ອົງການອ້ອມຂ້າງສູນກາງ ພ້ອມທັງບັນດາພະແນກກະສິກຳ ແລະ ປ່າໄມ້ແຂວງ, ນະຄອນຫລວງ ຈັດຕັ້ງປະຕິບັດ, ປຸກລະດົມ ແລະ ນຳພາມວນຊົນເຂົ້າຮ່ວມຂະບວນການປູກໄມ້.

 ການກຳນົດເອົາ ວັນທີ 1 ມິຖຸນາ ເປັນວັນປູກຕົ້ນໄມ້ແຫ່ງຊາດແມ່ນເພື່ອສ້າງອະນາຄົດອັນສົດໃສໃຫ້ ແກ່ລູກຫລານຜູ້ເກີດໃໝ່ໃຫຍ່ລຸນ, ທັງເປັນການປຸກລະດົມ ແລະ ເສີມຂະຫຍາຍວຽກງານບູລະນະ ແລະ ປົກປັກຮັກສາປ່າໄມ້ໃຫ້ນັບມື້ດີຂຶ້ນ; ພ້ອມດຽວກັນຍັງກົງກັບວັນເດັກນ້ອຍສາກົນ ເຊິ່ງພັກ-ລັດ ກໍໄດ້ມີນະໂຍບາຍໃຫ້ທົ່ວສັງຄົມພ້ອມກັນສະເຫຼີມສະຫຼອງໃຫ້ແກ່ເດັກນ້ອຍລາວ ທີ່ເປັນອະນາຄົດ ຂອງຊາດ ແລະ ເປັນຜູ້ສືບທອດຂອງພັກ; ນອກນີ້ ຍັງເປັນການສ້າງຈິດສຳນຶກ ໃຫ້ອະນຸຊົນ, ເຍົາວະຊົນຮຸ່ນຫລັງ ໃຫ້ມີຄວາມຮັກ ແລະ ຜູກພັນກັບທຳມະຊາດ, ໂດຍສະເພາະ ຕໍ່ປ່າໄມ້ເຊິ່ງເປັນແຫລ່ງນໍ້າ, ແຫລ່ງອາຫານ ແລະ ແຫລ່ງອາກາດອັນສົດຊື່ນ ໃຫ້ແກ່ເຂົາເຈົ້າໃນອະນາຄົດ ; ນັບຕັ້ງແຕ່ການອອກລະບຽບການ ໃນການຄຸ້ມຄອງແຫລ່ງແກ່ນພັນໄມ້ ເພື່ອຕອບສະໜອງການຜະລິດເບ້ຍໄມ້ ໃນແຕ່ລະປີ ແລະ ລະບຽບການສົ່ງເສີມການປູກໄມ້ເປັນສິນຄ້າ, ການປົກປັກຮັກສາສິ່ງແວດລ້ອມ ເພື່ອຮອງຮັບການປູກໄມ້ ໃຫ້ໄດ້ຕາມແຜນການ; ນອກນັ້ນຍັງມີກອງທຶນພັດທະນາປ່າໄມ້ແລະ ຊັບພະຍາກອນປ່າໄມ້ ທີ່ໄດ້ຍູ້ແຮງ ວຽກງານປູກໄມ້ ແລະ ປົກປັກຮັກສາປ່າໄມ້ ໃນບັນດາແຂວງ ໃຫ້ແຂງແຮງຂຶ້ນຕື່ມ. ອັນພົ້ນເດັ່ນແມ່ນລັດຖະບານໄດ້ເປີດກວ້າງການລົງທຶນ ແລະ ດຶງດູດການລົງທຶນພາຍໃນ ແລະ ຕ່າງປະເທດ ເຊິ່ງດ້ມີບັນດານັກລົງທຶນຕ່າງປະເທດ, ອົງການຈັດຕັ້ງສາກົນກໍ່ໄດ້ໃຫ້ຄວາມສຳຄັນໃນການປູກຕົ້ນໄມ້ໃຫ້ເປັນປ່າ, ລວມທັງການປົກປັກຮັກສາປ່າໄມ້ໃນ ສປປ ລາວເຮັດໃຫ້ການປູກໄມ້ ເພີ່ມຂື້ນໃນແຕ່ລະປີ.

 ແຕ່ເຖິງຢ່າງໃດກໍຕາມ ການປູກໄມ້ໃນແຕ່ລະປີທີ່ຜ່ານມາເຫັນວ່າຍັງບໍ່ທັນໄດ້ມີປະສິດທິຜົນພໍປານໃດ ເນື່ອງຈາກວ່າມີແຕ່ການປູກ ແຕ່ບໍ່ມີການບົວລະບັດຮັກສາ ດ້ວຍເຫດນັ້ນ ຈິ່ງມີພຽງຈຳນວນໜຶ່ງເທົ່ານັ້ນທີ່ລອດແລະເຕີບໃຫຍ່; ດັ່ງນັ້ນ ການປູກກໍຕ້ອງໄດ້ປະຕິບັດໄປພ້ອມໆກັບການບົວລະບັດຮັກສາ ໃຫ້ຕົ້ນໄມ້ທຸກຕົ້ນສາມາດເຕີບໃຫຍ່ ຈິ່ງຈະສົມກັບການລົງທຶນລົງຮອນ ຈຳນວນຫຼວງຫຼາຍ ໃນແຕ່ລະປີ.

 

Off
26th May2021

ທຸກໆວັກແຊງປ້ອງກັນພະຍາດໂຄວິດ-19 ທີ່ຖືກນໍາໃຊ້ໃນ ສປປ ລາວ ແມ່ນມີຄວາມປອດໄພ ແລະ ມີປະສິດທິພາບ

by somchan

 ວັກແຊງປ້ອງກັນແມ່ນເຄື່ອງມືສຳຄັນທີ່ຈະຊ່ວຍປ້ອງກັນການເຈັບເປັນ ແລະ ເສຍຊີວິດຈາກພະຍາດໂຄວິດ-19; ພ້ອມທັງ ມີສ່ວນຊ່ວຍໃນການຄວບຄຸມ, ສະກັດກັ້ນການແຜ່ລະບາດຂອງພະຍາດດັ່ງກ່າວ; ຖ້າຫາກທ່ານຮັກຄອບຄົວຂອງທ່ານ ກໍຮີບຮ້ອນພາກັນໄປຮັບສັກວັກຊີນປ້ອງກັນພະຍາດໂຄວິດ-19. ໃນປັດຈຸບັນນີ້ ສປປ ລາວ ກໍແມ່ນອີກໜຶ່ງປະເທດ ທີ່ໄດ້ມີຄວາມກ້າວໜ້າຢ່າງວ່ອງໄວໃນການດໍາເນີນການສັັກວັກຊີນໃຫ້ປະຊາຊົນ ເພື່ອຕໍ່ສູ້ກັບພະຍາດໂຄວິດ-19; ເຊິ່ງເລີ່ມແຕ່ຕົ້ນປີ 2021 ເປັນຕົ້ນມາ, ສປປ ລາວ ໄດ້ຮັບວັກຊິນຕ້ານໂຄວິດ-19 ແລະ ໄດ້ເລີ່ມສັກວັກແຊງໃຫ້ຜູ້ທີ່ເປັນກຸ່ມສ່ຽງສູງທີ່ສຸດຕໍ່ການຕິດເຊື້ອພະຍາດໂຄວິດ-19 ແລະ ຜູ້ທີ່ມີຄວາມສ່ຽງທີ່ຈະເກີດອາການຮຸນແຮງຈາກການຕິດເຊື້ອເຊັ່ນ: ບຸກຄະລາກອນທາງການແພດ, ຜູ້ສູງອາຍຸທີ່ມີອາຍຸຫຼາຍກວ່າ 60 ປີ ແລະ ຄົນທີ່ເປັນພະຍາດຊໍ້າເຮື້ອ. ລວມທັງ ບຸກຄະລາກອນທີ່ມີຄວາມສ່ຽງ ໂດຍອີງໃສ່ລັກສະນະຂອງວຽກ ແລະ ຄວາມສ່ຽງຕໍ່ການຕິດເຊື້ອພະຍາດໂຄວິດ-19 ເຊັ່ນ ບຸກຄະລາກອນທີ່ເຮັດວຽກຢູ່ເຂດສູນຈໍາກັດບໍລິເວນ ເເລະ ພະນັກງານການທູດ. ໃນປັດຈຸບັນ ກໍໄດ້ສຸມໃສ່ສັກວັກຊິນໃຫ້ກັບປະຊາຊົນທົ່ວໄປ ໂດຍໄດ້ຂະຫຍາຍຈຸດສັກວັກຊິນໄປທົ່ວປະເທດ. ເຖິງຢ່າງໃດກໍຕາມ ກໍຍັງມີຫຼາຍຄົນໃນສັງຄົມ ທີ່ມີຄວາມສົນໃຈຈະສັກວັກແຊງກໍຍັງມີຂໍ້ສົງໄສກ່ຽວກັບ ຄວາມປອດໄພ, ຄຸນນະພາບ, ຄ່າໃຊ້ຈ່າຍ, ຂໍ້ຫ້າມໃນການຮັບວັກຊິນ ລວມທັງຂໍ້ຄວນປະຕິບັດຫລັງຈາກໄດ້ຮັບວັກແຊງ.

ຕໍ່ກັບຄວາມສົນໃຈຂອງສັງຄົມນັ້ນ ບັນດາແພດຫມໍ ແລະ ຊ່ຽວຊານທາງດ້ານການແພດ, ຕະຫຼອດຮອດເຈົ້າໜ້າທີ່ອົງການອານາໄມໂລກ ກໍໄດ້ມີການຢືນຢັນວ່າ: ທຸກໆວັກຊີນທີ່ຖືກນໍາໃຊ້ໃນ ສປປ ລາວ ແມ່ນມີຄວາມປອດໄພ ແລະ ມີປະສິດທິພາບ. ເຊິ່ງກ່ອນທີ່ຈະຖືກນໍາໃຊ້ໃຫ້ບໍລິການແກ່ປະຊາຊົນໃນ ສປປ ລາວ ແມ່ນໄດ້ມີການຜ່ານຂະບວນການອະນຸມັດນໍາໃຊ້ສຸກເສີນຈາກ ກົມອາຫານ ແລະ ຢາ, ກະຊວງສາທາລະນະສຸກ ແລະ ການຮັບຮອງຂຶ້ນທະບຽນນໍາໃຊ້ສຸກເສີນຈາກ ອົງການອະນາໄມໂລກ; ເຊິ່ງໃນປັດຈຸບັນ, ວັກແຊງ ແອສຕາເຊເນກາ (Astra Zeneca), ວັກຊິນ ສະປູດນິກບີ ແລະ ວັກແຊງ ຊີໂນຟາມ ທີ່ຖືກນໍາໃຊ້ໃນ ສປປ ລາວ ກໍ່ລ້ວນແຕ່ໄດ້ຮັບການຂຶ້ນທະບຽນນຳໃຊ້ສຸກເສີນຈາກອົງການອະນາໄມໂລກ ໂດຍມີຂະບວນການປະເມີນວັກຊິນວ່າໄດ້ຕອບສະໜອງເງື່ອນໄຂມາດຕະຖານດ້ານຄຸນະພາບ, ຄວາມປອດໄພ ແລະ ປະສິດທິພາບທີ່ຍອມຮັບໄດ້, ຂະບວນການຂຶ້ນທະບຽນດັ່ງກ່າວແມ່ນ ຈະອີງໃສ່ຜົນການຕັດສິນໃຈທີ່ໄດ້ຈາກການປະເມີນຂໍ້ມູນການທົດລອງທາງຄລີນິກ, ຂະບວນການຜະລິດ ແລະ ຂະບວນການຄວບຄຸມຄຸນະພາບ. ໂດຍມີກຸ່ມທີ່ປຶກສາດ້ານວິຊາການ ທີ່ເປັນກຸ່ມຊ່ຽວຊານທີ່ປຶກສາອິດສະຫລະຈາກທົ່ວໂລກ ມາເຮັດໜ້າທີ່ປະເມີນວັກຊິນ ດ້ວຍການຊັ່ງຊາດ້ານຜົນປະໂຫຍດ ທຽບໃສ່ກັບຄວາມສ່ຽງ, ຖ້າເຫັນວ່າຜົນປະໂຫຍດສູງກວ່າຄວາມສ່ຽງ ແລະ ບັນລຸຕາມມາດຕະຖານເງື່ອນໄຂທີ່ກໍານົດໄວ້ທັງໝົດ, ວັກຊິນດັ່ງກ່າວກໍ່ຈະໄດ້ຮັບຮອງຂຶ້ນທະບຽນ.

ເຊິ່ງໃນນີ້ ສຈ ປອ ດຣ ມາຍຟອງ ມາຍຊາຍ ຮອງອະທິການບໍດີ ມະຫາວິທະຍາໄລວິທະຍາສາດສຸຂະພາບ, ທັງເປັນ ປະທານສະມາຄົມແພດພະຍາດຊືມເຊື້ອລາວ ໄດ້ໃຫ້ທັດສະນະກ່ຽວກັບຄວາມສຳຄັນຈຳເປັນ, ຄວາມປອດໄພ ແລະ ມີປະສິດທິພາບ ຂອງວັກຊິນປ້ອງກັນພະຍາດໂຄວິດ-19 ທີ່ຖືກນໍາໃຊ້ໃນ ສປປ ລາວ ວ່າ:

 

ການໃຫ້ບໍລິການສັກວັກແຊງກັນພະຍາດໂຄວິດ-19 ເປັນບາດກ້າວອັນສຳຄັນສຳລັບ ສປປ ລາວ ໃນເປົ້າໝາຍການຢຸດຕິການເເຜ່ລະບາດຂອງພະຍາດໂຄວິດ-19. ໜຶ່ງໃນກຸ່ມບູລິມະສິດທີ່ຕ້ອງໄດ້ຮີບຮ້ອນມາຮັບວັກຊີນກັນພະຍາດໂຄວິດ-19 ແມ່ນ ຜູ້ທີ່ເປັນພະຍາດຊໍາເຮື້ອ ເພາະກຸ່ມດັ່ງກ່າວເມື່ອມີການຕິດເຊື້ອໂຄວິດ-19 ແລ້ວອາການຈະຮຸນແຮງ ແລະ ອາດເຖິງແກ່ຊີວິດໄດ້. ສໍາລັບທ່ານທີ່ມີຜົນກວດເປັນບວກກໍ່ຍິ່ງຕ້ອງມີການໃຫ້ຄວາມຮ່ວມມືກັບແພດໝໍເຂົ້າຮັບການປິ່ນປົວແຕ່ຫົວທີ ເພື່ອຫຼີກລ່ຽງຄວາມຮ້າຍແຮງທີ່ຈະເກີດຈາກພະຍາດດັ່ງກ່າວ. ເພາະວ່າ ຄວາມປະໝາດ, ຖືເບົາ ຫຼື ຄໍາວ່າ ບໍ່ເປັນຫຍັງດອກ ຄືຈຸດເລີ່ມຕົ້ນຂອງຄວາມອັນຕະລາຍທີ່ພາໃຫ້ເກີດການແຜ່ລະບາດ ແລະ ນຳໄປສູ່ການເສຍຊີວິດໄດ້.

ການໄປສັກວັກແຊງຢູ່ທຸກໜ່ວຍບໍລິການທີ່ທາງການກຳນົດແມ່ນບໍ່ໄດ້ເສຍຄ່າ, ສ່ວນນັກທ່ອງທ່ຽວທີ່ເຂົ້າມາລາວ ແລະ ຍັງບໍ່ໄດ້ເດີນທາງກັບປະເທດ ກໍສາມາດຮັບວັກແຊງຕາມຈຸດທີ່ທາງການກຳນົດ. ສຳລັບຜູ້ທີ່ແພ້ອາກາດ ເປັນຕຸ່ມ ເປັນຜື່ນ ກໍສາມາດສາມາດຮັບວັກຊິນ ແອສຕາເຊເນກາ ເພາະວັກຊິນຊະນິດນີ້ນຳໃຊ້ໃຫ້ຜູ້ມີພະຍາດປະຈຳໂຕ ແລະ ຜູ້ສູງອາຍຸ; ສ່ວນຜູ້ມີພະຍາດປະຈຳໂຕເຊັ່ນ: ເບົາຫວານ, ຄວາມດັນເລືອດ, ພະຍາດເລືອດ, ປະຫວັດເປັນມະເຮັງຜ່ານມາ, HIV, ອັກເສບຕັບຜ່ານມາ ຫລື ອັກເສບອື່ນໆ ກໍ່ສາມາດຮັບວັກຊິນໄດ້. ສ່ວນຜູ້ທີ່ຫ້າມບໍ່ໃຫ້ສັກວັກແຊງ ໄດ້ແກ່ ແມ່ຍິງທີ່ກຳລັງຖືພາ, ຜູ້ມີອາຍຸຕໍ່າກວ່າ 18 ປີ, ມີປະຫວັດແພ້ວັກແຊງກັນພະຍາດຢ່າງຮຸນແຮງ ແຕ່ຖ້າແພ້ແບບເບົາບາງ ແມ່ນໃຫ້ປຶກສາແພດ ເພື່ອພິຈາລະນາຕາມຕົວຈິງ, ແມ່ຍິງທີ່ກຳລັງລ້ຽງລູກດ້ວຍນົມແມ່ ຫ້າມສັກວັກຊິນ Sinopharm, ຜູ້ທີ່ກຳລັງນອນປິ່ນປົວໃນໂຮງໝໍ, ຜູ້ທີ່ເປັນພະຍາດກ່ຽວກັບເລືອດ. ສໍາລັບອາການຂ້າງຄຽງພາຍຫລັງຮັບວັກຊິນ ກໍ່ມີອາການເຈັບ ຫລື ແດງ ບ່ອນທີ່ສັກ, ປວດຕາມກ້າມຊີ້ນ, ມີໄຂ້ອ່ອນໆ, ເມື່ອຍ, ປວດຮາກ, ວິນຫົວ ຊຶ່ງຈະມີອາການບໍ່ເກີນ 2 ມື້. ແຕ່ຖ້າຫາກມີອາການ 3 ມື້ຂຶ້ນໄປ ໃຫ້ເຂົ້າໄປພົບແພດທັນທີ. ພາຍຫລັງຮັບສັກວັກຊິນແລ້ວໃຫ້ງົດເຄື່ອງດື່ມທີ່ມີທາດເຫລົ້າເປັນເວລາ 1 ອາທິດ. ສ່ວນອາຫານອື່ນໆແມ່ນສາມາດກິນໄດ້ປົກກະຕິ.

Off
24th May2021

ມູນເຊື້ອ ແລະ ຜົນງານ ຂອງກຳລັງເຫຼົ່າຮົບວິຊາສະເພາະສື່ສານ ທີ່ຕິດພັນກັບມູນເຊື້ອ, ຜົນງານຂອງກຳລັງປ້ອງກັນຄວາມສະຫງົບປະຊາຊົນ ໃນໄລຍະ 60 ປີຜ່ານມາ.

by somchan

ໃນໄລຍະ 60 ປີທີ່ຜ່ານມາ, ພາຍໃຕ້ການນໍາພາຂອງພັກປະຊາຊົນປະຕິວັດລາວ ກໍາລັງປ້ອງກັນຄວາມສະຫງົບປະຊາຊົນລາວ ໄດ້ຜ່ານຜ່າການທົດສອບ, ປັບປຸງ, ກໍ່ສ້າງ ແລະ ພັດທະນາຢ່າງບໍ່ຢຸດຢັ້ງ ແລະ ກາຍເປັນກໍາລັງທີຫນັກແຫນ້ນເຂັ້ມແຂງຂອງພັກ, ໄດ້ປະກອບສ່ວນສ້າງຜົນງານອັນໃຫຍ່ຫຼວງເຂົ້າໃນພາລະກິດຕໍ່ສູ້ຕ້ານຈັກກະພັດລ່າເມືອງຂຶ້ນ, ຈັກກະພັດຜູ້ຮຸກຮານ ແລະ ລູກແຫຼ່ງຕີນມືຂອງພວກເຂົາ; ດ້ວຍຄວາມກ້າຫານ ແລະ ເສຍສະຫຼະ ຈົນສາມາດກູ້ຊາດ, ກອບກູ້ເອົາຄວາມເປັນເອກະລາດ ແລະ ປົດປ່ອຍປະເທດຊາດໄດ້ຢ່າງສົມບູນ. ພ້ອມທັງ ໄດ້ປະກອບສ່ວນເຂົ້າໃນການດຳເນີນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະການປະຕິບັດໜ້າທີ່ປົກປັກຮັກສາຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມ ຂອງປະເທດຊາດ ຈົນເຖິງປັດຈຸບັນ.

ຕິດພັນກັບມູນເຊື້ອການກຳເນີດ, ເຕີບໃຫຍ່ຂະຫຍາຍຕົວ ແລະ ຜົນງານຂອງກຳລັງປ້ອງກັນຄວາມສະຫງົບປະຊາຊົນນັ້ນ; ສໍາລັບກຳລັງ ຫຼື ກົມສື່ສານ ປ້ອງກັນຄວາມສະຫງົບ ເຊິ່ງແມ່ນກົມວິຊາສະເພາະນື່ງ ໃນກົງຈັກການຈັດຕັ້ງ ຂອງກະຊວງປ້ອງກັນຄວາມສະຫງົບ ກໍໄດ້ປະກອບສ່ວນໃນການປະຕິບັດພາລະບົດບາດ, ໜ້າທີ່ ເປັນເສນາທິການໃນການຮັບປະກັນການຕິດຕໍ່ສື່ສານ ໃຫ້ແກ່ກໍລັງປ້ອງກັນຄວາມສະຫງົບ ນັບຕັ້ງແຕ່ສະໄຫມຕໍ່ສູ້ກູ້ຊາດຕ້ານພວກຈັກກະພັດລ່າເມືອງຂື້ນ ຈົນມາຮອດໄລຍະປະຈຸບັນ; ເຊິ່ງຫຼົ່ຮົບວິຊາສະເພາະສື່ສານ ປ້ອງກັນຄວາມສະຫງົບ ໄດ້ກໍາເນີດເກີດຂື້ນຄຽງຄູ່ກັບການກໍາເນີດຂອງກໍາລັງປ້ອງກັນຄວາມສະຫງົບປະຊາຊົນລາວ. ໃນສະໄຫມຕໍ່ສູ້ກູ້ຊາດນັ້ນ ການຕິດຕໍ່ສື່ສານ ຂອງກໍາລັງປ້ອງກັນຄວາມສະຫງົບ ໃນເບື້ອງຕົ້ນແມ່ນນໍາໃຊ້ຄົນເປັນພາຫານະໃນການລໍາລຽງຂໍ້ມູນຂ່າວສານ, ນໍາສົ່ງເອກະສານ, ນໍາສົ່ງມະຕິຄໍາສັ່ງ, ຂໍ້ຕົກລົງ ແລະ ຄໍາເຫັນ ຕ່າງໆ ຈາກສູນກາງລົງໄປຫາທ້ອງຖິນ ແລະ ຈາກທ້ອງຖິ່ນ ຂຶ້ນໄປຫາສູນກາງ, ເຖິງວ່າຈະພົບກັບອຸປະສັກ ແລະ ຄວາມຫຍຸ້ງຍາກປານໃດກໍຕາມ ແຕ່ກຳລັງນັກຮົບສື່ສານປ້ອງກັນຄວາມສະຫງົບ ກໍສາມາດເຮັດຫຼ້ອນໜ້າທີ່ການເມືອງ ແລະ ຮັກສາຄວາມລັບໄດ້ເປັນຢ່າງດີ. ໂດຍພາຍໃຕ້ການນໍາພາຂອງຄະນະພັກ ກໍຄື ການນໍາກະຊວງປ້ອງກັນຄວາມສະຫງົບ ໃນແຕ່ລະຮຸ້, ແຕ່ລະສະໄຫມ ວຽກງານຕິດຕໍ່ສື່ສານ ຂອງກະຊວງປ້ອງກັນຄວາມສະຫງົບ ກໍ່ໄດ້ມີການປັບປຸງ, ພັດທະນາ ແລະ ເຕີບໃຫຍ່ຂະຫຍາຍຕົວມາແຕ່ລະໄລຍະ ຄວບຄູ່ກັບການພັດທະນາກໍາລັງປ້ອງກັນຄວາມສະຫງົບປະຊາຊົນລາວ; ເພື່ອປະກອບສ່ວນເຂົ້າໃນການປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຂອງສັງຄົມ ກໍຄືປະເທດຊາດ. ສະແດງອອກບາງດ້ານເຊັ່ນ: ດ້ານຫນ້າທີ່ການເມືອງ ນັບຕັ້ງແຕ່ກໍາລັງປ້ອງກັນຄວາມສະຫງົບປະຊາຊົນລາວ ໄດ້ຮັບການສ້າງຕັ້ງຂຶ້ນ, ກໍາລັງສື່ສານກໍ່ແມ່ນພາກສ່ວນນຶ່ງທີ່ໄດ້ປະກອບສ່ວນເຂົ້າ ໃນຜົນງານລວມຂອງກຳລັງປ້ອງກັນຄວາມສະຫງົບ ໂດຍສະເພາະແມ່ນ ໃນໄລຍະການປະຕິວັດຊາດປະຊາທິປະໄຕ ກໍ່ຄື ໄລຍະປົກປັກຮັກສາ ແລະ ສ້າງສາປະເທດຊາດ, ກໍາລັງສື່ສານ ປ້ອງກັນຄວາມສະຫງົບ ເວລາໃດກໍ່ໄດ້ຄຽງບ່າ, ຄຽງໄລ່ກັບກໍາລັງວິຊາສະເພາະອື່ນ ທັງເຮັດວຽກງານສູ້ຮົບຕີສັດຕູ, ທັງຮັບປະກັນວຽກງານວິຊາສະເພາະ.

ໃນສະພາບເງື່ອນໄຂຄວາມຮຽກຮ້ອງຕ້ອງການຂອງພາລະກິດຕໍ່ສູ້ກູ້ຊາດຕ້ານພວກຈັກກະພັດລ່າເມືອງຂື້ນແບບໃຫມ່, ດ້ວຍຄວາມຈໍາເປັນຂອງວຽກງານ ຕິດຕໍ່ສື່ສານໃນກໍາລັງປ້ອງກັນຄວາມສະຫງົບ, ຄະນະນໍາກອງຮ້ອຍສັນຕິລາດໃນເວລານັ້ນ ໄດ້ຕົກລົງແຕ່ງຕັ້ງຈູງານສື່ສານ ນື່ງຂື້ນກັບກອງປ້ອງກັນໃກ້ຊິດ ໃນວັນທີ 11ມັງກອນ 1967 ທີ່ເມືອງວຽງໄຊ ແຂວງຫົວພັນ. ຈຸງານທີ່ແຕ່ງຕັ້ງໃນເວລານັ້ນມີພະນັກງານເຮັດວຽກງານຕິດຕໍ່ສື່ສານພຽງແຕ່ 4ສຫ, ທີ່ຂື້ນກັບກອງປ້ອງກັນໃກ້ຊິດ ຫມາຍຄວາມວ່າການຕິດຕໍ່ສື່ສານຂອງກໍາລັງ ປກສ ມີຕົ້ນກໍາເນີດມາຈາກພະນັກງານທີ່ເຮັດວຽກງານໃກ້ຊິດ ເພາະໃນສະໄຫມສົງຄາມ ພະນັກງານທີ່ເຮັດວຽກງານປ້ອງກັນຜູ້ນໍາໃນເວລານັ້ນ ແມ່ນຜູ້ທີ່ເຮັດວຽກງານຕິດຕໍ່ສື່ສານໃຫ້ແກ່ທ່ານຜູ້ນໍາ ທັງເຮັດວຽກງານເປັນຜູ້ນໍາສົ່ງເອກະສານ, ສົ່ງມະຕິຄໍາສັ່ງ, ແຈ້ງການຂອງຂັ້ນເທີງຫາຂັ້ນລຸ່ມ. ດ້ວຍຄວາມຈໍາເປັນ ແລະ ຄວາມຮຽກຮ້ອງ ຕ້ອງການຂອງຫນ້າທີ່ວຽກງານນັບມື້ນັບເພີ່ມຂື້ນ ຈໍາເປັນຕ້ອງມີຈຸງານສື່ສານ ຂອງກໍາລັງ ປກສ ໃນເວລານັ້ນ ໂດຍແມ່ນ ທ່ານ ຊົມຊື່ນ ຄໍາພິທູນ ຫົວຫນ້າຫ້ອງສັນຕິລາດ ເປັນຜູ້ອານຸມັດສ້າງຕັ້ງ, ພາຫານະທີ່ນໍາໃຊ້ກໍ່ມີພຽງແຕ່ໂທລະສັບ TA 57 ທີ່ສື່ສານຂອງກອງທັບມອບໂອນໃຫ້.

ຜ່ານຂະບວນການຕໍ່ສູ້ປົດປ່ອຍຊາດ ໃນແຕ່ລະໄລຍະຢ່າງລະອິດລະອ້ຽວ ແລະ ຜ່ານການປົກປັກຮັກສາລະບອບໃຫມ່ໄວ້ໃຫ້ຫມັ້ນຄົງ, ກົງຈັກການຈັດຕັ້ງຂອງກົມສື່ສານກໍ່ໄດ້ມີການປັບປຸງ ຄວບຄູ່ກັບການປັບປຸງກົງຈັກການຈັດຕັ້ງຂອງກະຊວງ. ຈາກເມື່ອກ່ອນເປັນຈຸງານສື່ສານ, ຈາກຈຸງານສ້າງຕັ້ງເປັນຫມູ່, ຈາກຫມູ່ສ້າງຕັ້ງເປັນກອງຮ້ອຍ, ຈາກກອງຮ້ອຍເປັນພະແນກ ແລະ ຈາກພະແນກໄດ້ສ້າງຕັ້ງເປັນກົມ ຊີ້ນໍາພະຫາພາກ ເພື່ອເສນາທິການດ້ານວຽກງານຕິດຕໍ່ສື່ສານຂອງກໍາລັງປ້ອງກັນຄວາມສະຫງົບ ໃຫ້ມີຄວາມຮັບປະກັນຄວາມປອດໄພ, ວ່ອງໄວ, ຊັດເຈນ ແລະ ກ້າວເປັນທັນສະໄຫມເທື່ອລະກ້າວ, ປະຈຸບັນ, ກົມສື່ສານ ແມ່ນກົມວິຊາສະເພາະນື່ງໃນກົງຈັກການຈັດຕັ້ງຂອງກະຊວງປ້ອງກັນຄວາມສະຫງົບ ເຊິ່ງປະກອບມີ 9 ພະແນກ ແລະ 1 ຫ້ອງການ, ມີ 31 ຫນ່ວຍງານຂື້ນກັບ. ສະເພາະຢູ່ບັນດາ ປກສ ແຂວງແມ່ນໄດ້ຈັດຕັ້ງເປັນພະແນກ ແລະ ປະກອບມີ 3 ຫນ່ວຍງານ, ຂື້ນກັບຫ້ອງການກອງບັນຊາການ ປກສ ແຂວງ, ຢູ່ ປກສ ເມືອງ ແມ່ນຈັດຕັ້ງເປັນຫນ່ວຍງານ ຂື້ນກັບຫ້ອງການ ປກສ ເມືອງ. ຜ່ານຂະບວນການວຽກງານຕ່າງໆ ພະນັກງານ-ນັກຮົບສື່ສານໄດ້ມີຄວາມເຕີບໃຫຍ່ເຂັ້ມແຂງດ້ານຈໍານວນ ແລະ ຄຸນນະພາບ ບໍ່ສະເພາະແຕ່ຢູ່ສູນກາງ ແຕ່ມີຮອດຢູ່ທ້ອງຖີ່ນ, ມີຫຼາຍສະຫາຍໄດ້ກາຍເປັນພະນັກງານຫຼັກແລ່ງຂອງກໍາລັງປ້ອງກັນຄວາມສະຫງົບ, ນອກນັ້ນ ຍັງໄດ້ປະກອບສ່ວນເຂົ້າວຽກງານລວມຂອງຊາດ ເປັນຕົ້ນ: ປະກອບສ່ວນເຂົ້າໃນການແລກປ່ຽນເງິນພາຍຫຼັງປົດປ່ອຍ, ເຂົ້າຮ່ວມປັກລັກຫມາຍຊາດແດນແຫ່ງຊາດ, ເຂົ້າຮ່ວມປ້ອງກັນແຂກຜູ້ນໍາຂັ້ນສູງຂອງຕ່າງປະເທດທີ່ມາຢ້ຽມຢາມ, ເຂົ້າຮ່ວມປ້ອງກັນກອງປະຊຸມລະດັບສາກົນ, ພິເສດ ແມ່ນປ້ອງກັນກອງປະຊຸມສຸດຍອດອາຊຽນຄັ້ງທີ 10, ຄັ້ງທີ 28 ແລະ ຄັ້ງທີ 29, ກອງປະຊຸມສຸດຍອດອາຊີເອີລົບ ຄັ້ງທີ່ 9, ປ້ອງກັນງານມະຫາກໍາກິລາຊີເກມຄັ້ງທີ 25, ງານສະເຫຼີມສະຫຼອງວຽງຈັນເປັນນະຄອນຫຼວງຄົບຮອບ 450 ປີ, ປ້ອງກັນວັນສ້າງຕັ້ງເມືອງວຽງໄຊຄົບຮອບ 50 ປີ, ລ້າສຸດແມ່ນເຂົ້າຮ່ວມປ້ອງກັນກອງປະຊຸມໃຫຍ່ຄັ້ງທີ 11 ຂອງພັກ ແລະ ປ້ອງກັນການປ່ອນບັດເລືອກຕັ້ງສຊິກສະພາຄັ້ງທີ 9, ສາມະຊິກສະພາຂັ້ນແຂວງຄັ້ງທີ 2 ແມ່ນໄດ້ມີຄວາມຮັບປະກັນເປັນຢ່າງດີ. ພ້ອມດຽວກັນ ກຳລັງສື່ສານປ້ອງກັນຄວາມສະຫງົບ ກໍໄດ້ມີການເຕີບໃຫຍ່ຂະຫຍາຍຕົວທັງປະລິມານ ແລະ ຄຸນນະພາບ, ໄດ້ຮັບການກໍ່ສ້າງ ແລະ ບໍາລຸງຍົກລະດັບ ຢູ່ພາຍໃນ ແລະ ຕ່າງປະເທດ, ຈາກເມື່ອກ່ອນພະນັກງານທີ່ຖືກແຕ່ງຕັ້ງໃຫ້ເຮັດວຽກງານສື່ສານ ມີພຽງແຕ່ 4 ສະຫາຍ ເພື່ອຕິດຕໍ່ທາງໂທລະສັບ ຢູ່ທີ່ເມືອງ ວຽງໄຊ ແຂວງຫົວພັນ ປະຈຸບັນ ໄດ້ມີພະນັກງານທີ່ເຮັດວຽກງານສື່ສານ ຂອງກໍາລັງປ້ອງກັນຄວາມສະຫງົບ ໃນທົ່ວປະເທດ 600 ກວ່າສະຫາຍ, ຍິງ 100 ກວ່າສະຫາຍ. ໃນນັ້ນກໍ່ມີທັງລະດັບ ປະລິນຍາໂ, ະລິນຍາ, ຊັ້ນສູງ, ຊັ້ນກາງ, ຊັ້ນຕົ້ນ ແລະ ຈົບລະບົບບໍາລຸງ. ສະເພາະການກໍ່ສ້າງພາຍໃນກົມ ໄດ້ເປີດຊຸດຮຽນໂທລະເລກຊັ້ນຕົ້ນ ໄດ້ 3 ຊຸດ, ເປີດຊຸດບໍາລູງວຽກງານໂທລະຄົມ 14 ຊຸດ, ເປີດຊຸດບໍາລຸງວຽກງານສ້ອມແປງ 2 ຊຸດ, ເປີດຊຸດຮຽນລະບົບກໍ່ສ້າງຊັ້ນກາງດອນຕີ້ວຂະແຫນງສື່ສານ 1 ຊຸດ, ບໍາລຸງສື່ສານຊັ້ນກາງ 1 ຊຸດ, ເປີດຮຽນລະບົບກໍ່ສ້າງນາຍສີບ ສື່ສານ 1 ຊຸດ ແລະ ຝຶກອົບຮົມໄລຍະສັ້ນຂະແໜງຕ່າງໆທີ່ກ່ຽວຂ້ອງ 11 ຊຸດ. ນອກນັ້ນ, ຍັງໄດ້ນໍາເອົາຫຼັກສູດສື່ສານເຂົ້າສິດສອນຢູ່ໂຮງຮຽນ ປກສ ຊັ້ນຕົ້ນ, ຊັ້ນກາງຂອງກໍາລັງປ້ອງກັນຄວາມສະຫງົບຈໍານວນນື່ງ. ທາງດ້ານວຽກງານວິຊາສະເພາະ ຈາກເມື່ອກ່ອນ, ການຕິດຕໍ່ສື່ສານຂອງກໍາລັງປ້ອງກັນຄວາມສະຫງົບ ແມ່ນໃຊ້ຄົນເປັນພາຫານະເພື່ອຕິດຕໍ່ ຈົນເຖີງ ປີ 1967 ຈີ່ງມີລະບົບໂທລະສັບ ທີ່ໄດ້ຮັບການມອບໂອນຈາກກອງທັບປະຊາຊົນລາວ. ຈາກນັ້ນກໍ່ໄດ້ມີການພັດທະນາ ກ້າວຂື້ນມາແຕ່ລະໄລຍະສາມາດຮັບປະກັນໄດ້ການເປັນເສນາທິການໃຫ້ແກ່ການນໍາຂັ້ນຕ່າງໆ ດ້ວຍດີຕະຫຼອດມາ ແລະ ມາເຖີງ ປະຈຸບັນ ອາດເວົ້າໄດ້ວ່າ ກຳລັງສື່ສານປ້ອງກັນຄວາມສະຫງົບ ໄດ້ມີລະບົບສື່ສານທີ່ທັນສະໄຫມ ທຽບທັນກັບບັນດາປະເທດໃນພາກພື້ນ; ໃນນີ້ ໄດ້ມີລະບົບໂທລະເລກ, ລະບົບໂຟນີ, ໄປສະນີ, ໂທລະສັບ, ແຟັກຄືກັນກັບພາກສ່ວນອື່ນໆ ເຮັດໃຫ້ວຽກງານການຕິດຕໍ່ສື່ສານຂອງກໍາລັງປ້ອງກັນຄວາມສະຫງົບ ມີຄວາມຮັບປະກັນໂດຍພື້ນຖານ, ສິ່ງສໍາຄັນກົມສື່ສານກະຊວງປ້ອງກັນຄວາມສະຫງົບ ເວລາໃດກໍ່ໄດ້ມີການຮ່ວມມືກັບພາກສ່ວນທີ່ກ່ຽວຂ້ອງ, ຮູ້ຮ່ວມມື ແລະ ຮູ້ຍາດແຍ່ງເອົາການຊວ່ຍເຫຼືອຈາກບັນດາປະເທດ ເພື່ອນມິດເພື່ອມານໍາໃຊ້ ເຮັດໃຫ້ວຽກງານຕິດຕໍ່ສື່ສານຂອງກໍາລັງນັບມື້ນັບມີການພັດທະນາເປັນກ້າວໆມາ.

ຈາກການເຕີບໃຫຍ່ຂະຫຍາຍຕົວ ແລະ ຜົນງານໃນການປະກອບສ່ວນຂອງກົມສື່ສານ ໃນໄລຍະ 60 ປີຜ່ານມາ ພັກ-ລັດຖະບານ ກໍ່ຄືການນໍາກະຊວງປ້ອງກັນຄວາມສະຫງົບ ຈຶ່ງຕົກລົງຍ້ອງຍໍ ຂັ້ນຕ່າງໆ ໃຫ້ແກ່ກົມກອງ ແລະ ບຸກຄົນ ຄື ປະເພດກົມກອງລວມຫມູ່ມີ ທຸງໄຊຊະນະເລີດ 1 ຜືນ, ຫຼຽນໄຊອິດສະຫຼະ ຊັ້ນ3ມີ 1 ຫນ່ວຍ, ຫຼຽນໄຊແຮງານ ຊັ້ນ 2 ມີ 4 ຫນ່ວຍ, ຫຼຽນໄຊແຮງານ ຊັ້ນ 3 ມີ 1 ຫນ່ວຍ, ໃບຍ້ອງຍໍປະເພດຕ່າງໆ 17 ໃບ, ທຸງທີ່ລະນຶກເຫຼົ່າຮົບສື່ສານຄົບຮອບ 35 ປີ ເນື່ອງໃນໂອກາດວັນສ້າງຕັ້ງກອງທັບ 1 ຜືນ, ທຸງທີລະນຶກເຫຼົ່າຮົບສື່ສານຄົບຮອບ 40 ປີ ເນື່ອງໃນໂອກາດວັນສ້າງຕັ້ງກອງທັບ 1 ຜືນ ແລະ ທຸງທີ່ລະນຶກວັນສ້າງຕັ້ງກໍາລັງ ປກສ ຄົບຮອບ 55 ປີ 1 ຜືນ; ປະເພດບຸກຄົນ ມີ ຫຼຽນໄຊພິລະອາດຫານ ຊັ້ນ2 ມີ 2 ຫນ່ວຍ, ຫຼຽນໄຊພິລະອາດຫານ ຊັ້ນ3ມີ 2 ຫນ່ວຍ, ຫຼຽນໄຊແຮງງານ ຊັ້ນ 1 ມີ 10 ຫນ່ວຍ, ຫຼຽນໄຊແຮງານ ຊັ້ນ 2 ມີ 55 ຫນ່ວຍ, ຫຼຽນໄຊແຮງານ ຊັ້ນ 3 ມີ 94ຫນ່ວຍ, ຫຼຽນກາປະເພດຕ່າງໆ 150 ຫນ່ວຍ ແລະ ໃບຍ້ອງຍໍປະເພດຕ່າງໆ 567 ໃບ.

ເພື່ອເປັນການຮັກສາ ແລະ ເສີມຂະຫຍາຍມູນເຊື້ອຂອງກໍາລັງປ້ອງກັນຄວາມສະຫງົບປະຊາຊົນ ໂດຍສະເພາະແມ່ນຂອງກຳລັງເຫຼົ່າຮົບສື່ສານປ້ອງກັນຄວາມສະຫງົບ; ໃນຕໍ່ຫນ້າ ກົມສື່ສານ ຈະສືບຕໍ່ເອົາໃຈໃສ່ໃນການສຶກສາອົບຮົມການເມືອງແນວຄິດໃຫ້ພະນັກງານ-ນັກຮົບທີ່ເຮັດວຽກງານສື່ສານ ຮັບປະກັນໃຫ້ມີຄວາມຫນັກແຫນ້ນດ້ານການເມືອງແນວຄິດ, ມີຄວາມຈົ່ງຮັກພັກດີຕໍ່ພັກ, ຕໍ່ປະເທດຊາດ, ຕໍ່ປະຊາຊົນ, ມີທັດສະນະຫຼັກຫມັ້ນຊົນຊັ້ນ, ຮູ້ຈໍາແນກມິດສັດຕູຈະແຈ້ງ, ມີນ້ໍາໃຈຮັກຊາດ, ຮັກລະບອບປະຊາທິປະໄຕປະຊາຊົນ, ມີຄວາມອົດທົນຜ່ານຜ່າຄວາມຫຍຸ້ງຍາກ, ກ້າເສຍສະຫຼະຜົນປະໂຍດເພື່ອປະເທດຊາດ, ເດັດດ່ຽວຕ້ານທຸກກົນອຸບາຍຂອງສັດຕູ, ຕ້ານປະກົດການຫຍໍ້ທໍ້ໃນສັງຄົມ ແລະ ກົມກອງ. ສືບຕໍ່ໃນການປັບປຸງກໍ່ສ້າງຫນ່ວຍພັກປອດໃສ, ເຂັ້ມແຂງ, ຫນັກແຫນ້ນ ໃຫ້ບັນລຸ 90% ຶ້ນໄປ. ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ 5 ຂອງອົງຄະນະພັກກະຊວງ ແລະ ມະຕິກອງປະຊຸມໃຫຍ່ຄັ້ງທີ 9 ຂອງຄະນະພັກຮາກຖານກົມສື່ສານໃຫ້ເປັນຮູບປະທໍາ. ດ້ານວຽກງານວິຊາສະເພາະ ຈະສືບຕໍ່ປັບປຸງກໍາລັງວິຊາສະເພາະໃຫ້ມີຄວາມເຕີບໃຫຍ່ເຂັ້ມແຂງທາງດ້ານປະລິມານ ແລະຄຸນະພາບ, ສ້າງໃຫ້ໄດ້ພະນັກງານວິຊາສະເພາະທີມີຄວາມຮູ້, ມີຄວາມສາມາດ, ມີຄວາມສໍານານງານດ້ານວິຊາສະເພາະໃຫ້ເກັ່ງ ເພື່ອຮອງຮັບກັບການພັດທະນາດ້ານເຕັກໂນໂລຊີການສື່ສານ-ຂໍ້ມູນຂ່າວສານ ໃນປະຈຸບັນ ແລະ ອານາຄົດ. ສືບຕໍ່ໃນການຮັບປະກັນ ການເປັນເສນາທິການດ້ານການຕິດຕໍ່ສື່ສານຂອງກໍາລັງປ້ອງກັນຄວາມສະຫງົບໃຫ້ໄດ້ດີ, ດ້ວຍການຄົ້ນຄວ້າ, ວາງແຜນ, ນໍາໃຊ້ເຕັກນິກ-ເຕັກໂນໂລຊີສື່ສານ ທີ່ທັນສະໄຫມ ມາຮັບໃຊ້ກໍາລັງປ້ອງກັນຄວາມສະຫງົບ ຕາມເງື່ອນໄຂ ແລະ ຄວາມສາມາດຕົວຈີງ ໃນແຕ່ລະໄລຍະ. ສືບຕໍ່ເພີ່ມທະວີໃນການພົວພັນຮ່ວມມືແລກປ່ຽນບົດຮຽນດ້ານຕ່າງໆ ກັບພາກສ່ວນທີ່ກ່ຽວຂ້ອງທີ່ຕິດພັນກັບວຽກງານວິຊາສະເພາະ ທັງພາຍໃນ ແລະ ຕ່າງປະເທດ ເພື່ອມາປັບປຸງວຽກງານວິຊາສະເພາະສື່ສານ ຂອງກໍາລັງໃຫ້ທຽບທັນກັບສາກົນ ແລະ ພາກພື້ນ ຕາມແນວທາງນະໂຍບາຍຂອງພັກ. ເອົາໃຈໃສ່ໃນການຮັບປະກັນຊີວິດການເປັນຢູ່ ຂອງພະນັກງານ-ນັກຮົບໃຫ້ໄດ້ດີແລະ ຄົ້ນຄວ້ານໍາໃຊ້ທ່າແຮງທີ່ມີເພື່ອຊອກແລ່ງລາຍຮັບເພີ່ມໃຫ້ແກ່ກົມກອງ ຕາມເງື່ອນໄຂຕົວຈີງ.

Off
07th May2021

ພວກເຮົາຕ້ອງຜ່ານຜ່າຄວາມຫຍຸ້ງຍາກນີ້ໄປພ້ອມໆກັນ

by somchan

ໃນທ່າມກາງສະພາບທີ່ທົ່ວສັງຄົມ ພ້ອມກັນປະຕິບັດມາດຕະການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19, ພວກເຮົາເຫັນໄດ້ຄວາມສາມັກຄີ ອູ້ມຊູຊ່ວຍເຫລືອເຊິງກັນ ແລະ ກັນ, ໃນຍາມຫຍຸ້ງຍາກຄືແນວນີ້, ຫລາຍຄົນ, ຫລາຍຄອບຄົວ ແລະ ພາກສ່ວນຕ່າງໆທົ່ວສັງຄົມ ທີ່ມີເງື່ອນໄຂ ໄດ້ເສຍສະລະກໍາລັງຊັບ, (more…)

Off
25th Apr2021

ມີສະຕິໃນການນຳໃຊ້ ແລະ ຕິດຕາມຂໍ້ມູນຂ່າວສານ ໃນສື່ສັງຄົມອອນລາຍ

by somchan

ທ່ານຜູ້ຟັງ ! ສື່ສັງຄົມອອນລາຍ ແມ່ນສື່ແບບໃຫມ່ທີ່ບຸກຄົນ, ນິຕິບຸກຄົນ ແລະ ອົງການຈັດຕັ້ງຕ່າງໆ ມີການນຳໃຊ້ເພື່ອສື່ສານຕິດຕໍ່ພົວພັນ, ເຜີຍແຜ່ຂໍ້ມູນຂ່າວສານ ດ້ວຍອຸປະກອນຄອມພິວເຕີ ແລະ ອຸປະກອນສື່ສານອື່ນໆ. ສື່ສັງຄົມອອນລາຍ ແລະ ອິນເຕີເນັດ ແມ່ນພາຫະນະການສື່ສານອີກອັນໜຶ່ງໃນປັດຈຸບັນ, ທີ່ນັບມື້ໄດ້ເຂົ້າມາມີບົດບາດສຳຄັນໃນການເຄື່ອນໄຫວດຳລົງຊີວິດປະຈຳວັນຂອງຄົນ ກໍຄືການພົວພັນສື່ສານໃນສັງຄົມທີ່ເປັນປະໂຫຍດ ແລະ ອຳນວຍຄວາມສະດວກຢ່າງຫຼວງຫຼາຍ; ພ້ອມທັງມີບົດບາດສໍາຄັນໃນການຕອບສະໜອງຂໍ້ມູນຂ່າວສານ, ສາລະໜ້າຮູ້ ທາງດ້ານວິທະຍາສາດ, ວັດທະນະທໍາ, ວິຖີຊີວິດ, ການເມືອງ, ເສດຖະກິດ ແລະ ອື່ນໆ. ເຊີ່ງສາມາດສົ່ງ-ຮັບຂໍ້ມູນທີ່ເປັນຮູບພາບ, ແສງ, ສີ, ສຽງ ພ້ອມກັນໄດ້ວ່ອງໄວທີ່ສຸດ ດ້ວຍໂທລະສັບມືຖື, ຄອມພີວເຕີ ແລະ ອຸປະກອນການສື່ສານອື່ນໆ; ການນຳໃຊ້ສື່ສັງຄົມອອນລາຍໃນປັດຈຸບັນ ນັບມື້ແຜ່ຂະຫຍາຍຢ່າງກວ້າງຂວາງ ໂດຍສະເພາະແມ່ນ ເຟສບຸກ ເນື່ອງຈາກມີຄວາມສະດວກສະບາຍ, ວ່ອງໄວ ແລະ ຫລາກຫລາຍ ລວມທັງຜູ້ນຳໃຊ້ສ່ວນຫລາຍກໍນິຍົມຊອກຮູ້, ຕິດຕາມຂໍ້ມູນຂ່າວສານ ແລະ ຕິດຕາມສະພາບເຫດການຕ່າງໆທີ່ເກີດຂຶ້ນໃນສັງຄົມ. ດັ່ງນັ້ນ ຈຶ່ງມີການຈັດຕັ້ງຕ່າງໆ, ບຸກຄົນ ແລະ ນິຕິບຸກຄົນ ຈຳນວນຫຼາຍໄດ້ສ້າງເຟສບຸກ ຫລື ເວັບເພດ ຂອງຕົນເອງຂຶ້ນມາເພື່ອນໍາສະເໜີຂໍ້ມູນຂ່າວສານຕ່າງໆຢ່າງຫລວງຫລາຍ, ສາມາດຕອບສະໜອງຂໍ້ມູນຂ່າວສານໃຫ້ແກ່ສັງຄົມໄດ້ຢ່າງວ່ອງໄວ.

ເຖິງຢ່າງໃດກໍຕາມ ຜ່ານມາກໍມີກຸ່ມຄົນບໍ່ດີຈໍານວນໜຶ່ງ ໄດ້ມີການນໍາໃຊ້ສື່ອອນລາຍ ເພື່ອສ້າງຂ່າວປອມ ທັງໃນຮູບແບບທີ່ເປັນຂ່າວລື ແລະ ຂ່າວລວງ ເພື່ອສ້າງຄວາມປັ່ນປ່ວນໃຫ້ແກ່ສັງຄົມ, ສ້າງກະແສໃຫ້ມີຄົນສົນໃຈ ແລະ ຕິດຕາມຫລາຍ ເຊິ່ງພຶດຕິກຳດັ່ງກ່າວນັ້ນມັນຂັດກັບແນວທາງນະໂຍບາຍຂອງພັກ ແລະ ກົດໝາຍຂອງລັດ ແຫ່ງ ສປປ ລາວ; ໂດຍສະເພາະ ກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກໍາທາງຄອມພິວເຕີ, ກົດໝາຍວ່າດ້ວຍສື່ມວນຊົນ, ກົດໝາຍວ່າດ້ວຍການປົກປ້ອງຂໍ້ມູນເອເລັກໂຕຣນິກ ແລະ ອື່ນໆ. ພ້ອມດຽວກັນນີ້ ກໍມີຜູ້ບໍລິໂພກຂໍ້ມູນຂ່າວສານໃນສື່ສັງຄົມອອນລາຍຈຳນວນໜຶ່ງຂາດການພິຈາລະນາ, ຂາດສະຕິ ພາກັນຫຼົງເຊື່ອ ແລະ ກາຍເປັນຄົນທີ່ຂາດຄວາມຮັບຜິດຊອບ, ຂາດຈັນຍາບັນ ແລະ ຄຸນສົມບັດ; ໂດຍມີການກົດແຊ໌, ສະແດງຄວາມຄິດເຫັນຕ່າງໆນາໆ ແລະ ທຳລາຍກຽດສັກສີຂອງຄົນອື່ນ. ສຳລັບສະພາບການທີ່ພົ້ນເດັ່ນໃນໄລຍະປັດຈຸນີ້ ກໍແມ່ນການໂຄສະນາ, ເຜີຍແຜ່ ຂ່າວລື, ຂ່າວລວງ ກ່ຽວກັບບັນຫາການແຜ່ລະບາດຂອງພະຍາດໂຄວິດ-19, ທີ່ພວມເປັນກະແສຢູ່ໃນສື່ສັງຄົມອອນລາຍ ໃນປັດຈຸບັນ; ເຊິ່ງບັນດາບຸກຄົນ, ນິຕິບຸກຄົນ ແລະ ອົງການຈັດຕັ້ງທາງສັງຄົມທຸກພາກສ່ວນ ຕ້ອງໄດ້ພິຈາລະນາໃຫ້ລະອຽດຖີ່ຖ້ວນ ກ່ອນຈະນຳສະເໜີ, ສະແດງຄຳຄິດເຫັນ ຫຼື ເຜີຍແຜ່ຂໍ້ມູນຕ່າງໆ ໃນສື່ສັງຄົມອອນໄລ. ສ່ວນປະຊາຊົນ ກໍຄືຜູ້ບໍລິໂພກຂໍ້ມູນຂ່າວສານ ຢູ່ຕາມສື່ສັງຄົມອອນໄລ ນັ້ນກໍຕ້ອງໄດ້ມີສະຕິ ເພາະວ່າ ໃນປັດຈຸບັນນີ້ແມ່ນໄດ້ມີປະກົດການໂຄສະນາ, ເຜີຍແຜ່ ຂ່າວລື, ຂ່າວລວງ ເພື່ອສ້າງຄວາມສັບສົນ, ຍຸແຍ່ໃຫ້ເກີດຄວາມແຕກຕື່ນໃນສັງຄົມ. ເຊິ່ງໃນແຕ່ລະວັນ ໄດ້ມີການນຳສະເໜີ, ເຜີຍແຜ່ ຂໍ້ມູນຂ່າວສານ ຕາມຄວາມຮັບຮູ້ເຂົ້າໃຈຂອງສ່ວນບຸກຄົນ ແລະ ບໍ່ມີມູນຄວາມຈິງ ເປັນຈຳນວນຫຼວງຫຼາຍ ເຮັດໃຫ້ສັງຄົມ ກໍຄືຜູ້ບໍລິໂພກຂໍ້ມູນຂ່າວສານ ມີຄວາມເຂົ້າໃຈຜິດ ແລະ ສັບສົນຕໍ່ຄວາມປອດໄພໃນການດຳລົງຊີວິດ, ການເຄື່ອນໄຫວປະຕິບັດໜ້າທີ່ວຽກງານ ແລະ ການທຳມາຫາກິນ. ສຳລັບ ຄວາມສົນໃຈໃນການຕິດຕາມສະພາບ ແລະ ສະຖານະການບ້ານເມືອງ ຂອງປະຊາຊົນ ນັ້ນເປັນເລື່ອງທີ່ດີ ເພື່ອຄວາມຮັບຮູ້, ເຂົ້າໃຈ ບັນຫາຕ່າງໆ ທີ່ເລິກເຊິ່ງ ແລະ ສາມາດກຽມຕົວຮັບມືກັບບັນຫາໄດ້ຢ່າງທັນການ; ແຕ່ຖ້າຫາກຂາດສະຕິ, ຂາດການພິຈາລະນາໃຫ້ຖີ່ຖ້ວນ ກໍຈະເກີດມີຄວາມເຂົ້າໃຈພິດ ແລ້ວກໍອາດຈະໄປສູ່ການສ້າງກະແສດ້ວຍການເລົ່າ ຫຼື ໂຄສະນາທາງສື່ສັງຄົມອອນໄລ. ດັ່ງນັ້ນ ເພື່ອຮັບປະກັນຄວາມແນ່ນອນວ່າ ຂໍ້ມູນຂ່າວສານທີ່ບັນດາທ່ານໄດ້ອ່ານ, ໄດ້ເບິ່ງ, ໄດ້ຟັງ ນັ້ນຖືກຕ້ອງຕາມຄວາມເປັນຈິງ ຂໍໃຫ້ຕິດຕາມຈາກສື່ຕ່າງໆ ທີ່ເປັນທາງການ ແລະ ການໃຫ້ສຳພາດ ຫຼື ການຖະແຫຼງຂ່າວ ຂອງເຈົ້າໜ້າທີ່ ທີ່ໄດ້ຮັບຫມອບຫມາຍ ຈາກການຈັດຕັ້ງຂັ້ນຕ່າງໆ ທີ່ກ່ຽວຂ້ອງ.

ໃນຂະນະດຽວກັນ ກໍຍັງມີເວັບໄຊ, ເວັບເພດ ແລະ ສື່ອອນລາຍ ຈໍານວນໜຶ່ງ ເຄື່ອນໄຫວເຜີຍແຜ່ຂໍ້ມູນຂ່າວສານໃຫ້ມວນຊົນໂດຍບໍ່ໄດ້ຮັບອະນຸຍາດຢ່າງຖືກຕ້ອງຕາມກົດໝາຍ. ຍິ່ງໄປກວ່ານັ້ນ ຍັງມີສື່ອອນລາຍ ຈໍານວນບໍ່ໜ້ອຍໄດ້ເຜີຍແຜ່ຂ່າວປອມ, ຂ່າວປັ້ນແຕ່ງ, ຂ່າວຫລອກລວງ, ຂ່າວບິດເບືອນຄວາມຈິງ, ຂ່າວລື, ຂ່າວສຽດສີ ໃສ່ຮ້າຍປ້າຍສີ ຕ່າງໆນາໆ ອັນໄດ້ສ້າງຄວາມເສຍຫາຍໃຫ້ແກ່ບຸກຄົນ, ນິຕິບຸກຄົນ ແລະ ການຈັດຕັ້ງຕ່າງໆ ທັງສ້າງຄວາມສັບສົນໃນສັງຄົມ .ກໍລະນີນີ້ ໃນກົດໝາຍວ່າດ້ວຍ ການຕ້ານ ແລະ ສະກັດກັ້ນ ອາຊະຍາກໍາທາງຄອມພິວເຕີ ໄດ້ລະບຸໄວ້ຢ່າງຈະແຈ້ງວ່າ: ພຶດຕິກໍາທີ່ເປັນອາຊະຍາກໍາທາງລະບົບຄອມພິວເຕີ ມີຄື: ການເປີດເຜີຍມາດຕະການປ້ອງກັນການເຂົ້າເຖິງລະບົບຄອມພີວເຕີ, ການເຂົ້າເຖິງລະບົບທີ່ບໍ່ໄດ້ຮັບອະນຸຍາດ, ການຕັດຕໍ່ເນື້ອໃນ, ຮູບ, ພາບການເຄື່ອນໄຫວ, ສຽງ ແລະ ວີດີໂອຕ່າງໆ ໂດຍບໍ່ໄດ້ຮັບອະນຸຍາດ, ການສ້າງຄວາມເສຍຫາຍ ຜ່ານສື່ອອນລາຍ ລວມເຖິງການເຜີຍແຜ່ສິ່ງລາມົກອານາຈານຕ່າງໆ ຜ່ານລະບົບຄອມພີວເຕີ; ເຊີ່ງຜູ້ລະເມີດ ຫລື ກະທໍາຜິດ ຈະຖືກດໍາເນີນຄະດີ ທາງແພງ ແລະ ອາຍາ ຢ່າງເຂັ້ມງວດ.

ປະຈຸບັນ ການພັດທະນາ, ການຄຸ້ມຄອງ ແລະ ການນໍາໃຊ້ເຕັກໂນໂລຊີການສື່ສານຂໍ້ມູນຂ່າວສານ ຫຼື ICT ໄດ້ສົ່ງຜົນກະທົບຢ່າງໃຫຍ່ຫຼວງ ຕໍ່ການພັດທະນາເສດຖະກິດ-ສັງຄົມຂອງໂລກ, ເວົ້າສະເພາະ ສປປ ລາວ ສະພາບການຄຸ້ມຄອງ, ການນໍາໃຊ້ອິນເຕີເນັດ ແລະ ສື່ສັງຄົມອອນລາຍ ຍັງແມ່ນບັນຫາທ້າທາຍທີ່ສຸດ, ທັງແມ່ນຄວາມຈຳເປັນພາວະວິໄສ ແລະ ຮຽກຮ້ອງໃຫ້ຜູ້ບໍລິການຜູ້ໃຊ້ບໍລິການອິນເຕີເນັດທຸກຄົນ, ທຸກພາກສ່ວນເຄົາລົບ ແລະ ປະຕິບັດຕາມກົດຫມາຍວ່າດ້ວຍເຕັກໂນໂລຊີການສື່ສານຂໍ້ມູນຂ່າວສານຢ່າງເຂັ້ມງວດ ເພື່ອຄວາມປອດໄພຂອງຕົນ ແລະ ຂອງສັງຄົມ ກໍຄືປະເທດຊາດ. ເພາະວ່າ ເຕັກໂນໂລຢີການສື່ສານ ຍິ່ງມີຄວາມກ້າວໜ້າກໍຍິ່ງເປັນສິ່ງທ້າທາຍຕໍ່ການຄຸ້ມຄອງ; ເນື່ອງຈາກ ສື່ສັງຄົມອອນລາຍ ມີຫຼາຍຂໍ້ມູນຂ່າວສານ ມີລັກສະນະບິດເບືອນຄວາມຈິງ ເປັນໄພອັນຕະລາຍຕໍ່ສັງຄົມ ເປັນຕົ້ນແມ່ນ ການໃສ່ຮ້າຍປ້າຍສີ ສ້າງຄວາມເສື່ອມເສຍກຽດສັກສີ, ການກໍ່ອາຊະຍາກຳທາງລະບົບຄອມພີວເຕີ ແລະ ອື່ນໆ.ມີຫຼາຍກໍລະນີທີ່ຜູ້ໃຊ້ໄດ້ເອົາຂໍ້ຄວາມ, ເນື້ອໃນ ແລະ ຮູບພາບເຫດການ ຫຼື ການຕັດຕໍ່ ເພື່ອສ້າງຄວາມເສື່ອມເສຍຕໍ່ກຽດສັກສີຂອງບຸກຄົນ, ການຈັດຕັ້ງ, ສັງຄົມ ແລະ ສົ່ງຕໍ່ເນື້ອໃນ, ຮູບພາບຕໍ່ໆກັນໄປ ແບບຮູ້ເທົ້າບໍ່ເຖິງການ ຫຼື ດ້ວຍເຈດຕະນາ ເພື່ອຫວັງປັ່ນປ່ວນ, ບິດເບືອນຫຼອກລວງສັງຄົມ, ຫວັງທຳລາຍຄວາມສະຫງົບສຸກ ແລະ ຄວາມໝັ້ນຄົງຂອງປະເທດຊາດ.         ສະນັ້ນ ເພື່ອນຳໃຊ້ ແລະ ບໍລິໂພກຂໍ້ມູນຂ່າວສານທາງສື່ອອນລາຍ ໃຫ້ເກີດປະໂຫຍດໃຫ້ແກ່ການສ້າງສາ, ພັດທະນາປະເທດຊາດ ແລະ ຕົນເອງ, ພ້ອມທັງສະກັດກັ້ນປະກົດການຫຍໍ້ທໍ້ໃນສັງຄົມ.ບັນດາບຸກຄົນ, ນິຕິບຸກຄົນ ແລະ ການຈັດຕັ້ງ ຕ້ອງນຳໃຊ້ ສື່ອອນລາຍ ໃນທາງສ້າງສັນ, ໃຊ້ເປັນເວທີປຶກສາຫາລືທີ່ມີປະໂຫຍດ ແລະ ຖືກຕ້ອງຕາມກົດໝາຍ. ພ້ອມນີ້ການຈັດຕັ້ງ, ບຸກຄົນ, ຕິນິບຸກຄົນ ທີ່ເຄື່ອນໄຫວວຽກງານ ສື່ມວນຊົນຜ່ານລະບົບອິນເຕີເນັດ ຕ້ອງປະຕິບັດໃຫ້ຖືກຕ້ອງຕາມກົດໝາຍ ແລະ ລະບຽບການ ເພື່ອເຮັດໃຫ້ການເຄື່ອນໄຫວເຜີຍແຜ່ຂໍ້ມູນຂ່າວສານ ມີຄວາມຖືກຕ້ອງກັບຄວາມເປັນຈິງ, ສາມາດກວດສອບໄດ້ ແລະ ເປັນປະໂຫຍດຕໍ່ຜູ້ບໍລິໂພກ ກໍຄືປະເທດຊາດ.

Off
Pages:«12345»